Read Komrem ṬONGPHÔNG 17 Bible Online

ṬONGPHÔNG 17 - Komrem bible

ṬONGPHÔNG 17

¹Khava sōa thlengkam 7 kanei ngeva 7 hei kâra inkhat kahnenga kajōnga ahri, “Hong roh, tuidung katamtak hei hnenga a’nsak khōpui kalen, rahming inthang notinu kha, heikhong hrep a karâkna a’npek sik mo ti ke’n manhmu che rong.

²Raleichung reng he’n hiva notinu hi leh omchen kadikmak antlo, khana vânhnōi raleichung mihe’n amanu jôngna ju kha an-ina inphut inrui jo hei.”

³Khana Rathla khan kei akhimna thōia ada jo eng, ngeva khan nêrdiram chârna aṭhōi jo eng. Khava hmun a khan nupui inkhat ranhring kasen chunga kachōng, ranhring taksa pumpuia Pathen hnōisena rahming a’nzet hei ke’n kahmu; ranhring kha alu 7 leh raki 10 anei.

⁴Nuhmeinu kha vapuirei pōn leh pōn akasensor vâng inret a, sana leh hlung mantam, khan chu hira-mukta vâng a’nsyem neinâk vânga intōma kae. Akut chunga khan ajôngna kara, a’nthengmak neinâk leh malōk sōkna kasip sana kōklei inkhat achoi.

⁵Amanu machea khan rahming inkhat ṭong in-ip manhmuna inzet: “Babylon Kalen vânhnōia mikase rakip leh noti rakip hei annu.”

⁶Khana Jesu ṭong kadik jui jâra antathat hei leh Pathen mihei thisen ka-inna a’nruinu kha ke’n kahmu. Ke’n khava nuhmei kha, kahmu pha inlak hêra kamandon.

⁷Ngeva khan ader eng, “Heisa mo inlak hêra namandon? Ke’n nuhmei kha leh a’n-ongna ranhring alu 7 leh araki 10 ṭong in-ip kha kamanthei sik che.

⁸Ranhring nahmu kha vōi khat leikahring, tâk tûnchu hringmak jo, ama kha suk manhmang theina sik adongna kase dôpkhura inphut ahei kasōkvet jo kae. Ralei ale’nphut mak hma hringna lekharabu shunga rahming ale’nzet inhlutmak raleichunga akahring he’n, ranhring kha anhmu pha inlak hêra anmandon et sik. Khavakha pha khat a leikahring; tûnchu hringmak jo, tâk avea laho’nlâr nôk sik.

⁹“Hivahin manhret theina leh singna sik kha ka-om. Alu 7 kha hmebung 7 kae, khahei chunga nuhmei kha in-ong. Khan nôk chu anmani kha reng 7 kha’m kachang hei:

¹⁰5 hei chu katlu jo hei, 1 inchu vai alarôn, 1 chu lahong sōk mak; ama ahong sōk pha, pha bongkhat rōk ama’n vai alarôn sik.

¹¹Vōi khat aleikahringa, tûnchu akahringmak jo ranhring kha reng 8 tlukna kae, ama hi suk manhmang sik a akasōksōt 7 hei kâra inkhat kae.

¹²“Nang in nahmu raki 10 hei kha reng 10 vairôn ala’nphut mak hei kha kae, tâk ranhring kha leh pung khat rōk vai karôn sik renghei kha kae.

¹³Hiva 10 hei hin ankhenga malung inre et a ṭōn mantlukna anneia, anratha leh anṭong neina kha ranhring hneng anpek a kae.

¹⁴Anmani’n Kemōngte kadōia re antlo sik; tâk Kemōngte leh abeksōt hei, akadei hei leh akataksena akajui he’n antor sik hei, ajârchu ama hi renghei Reng leh rōngpuhei Rōngpu kha kae.”

¹⁵Ngeva kha’num kahnenga ahri, “Nang in nahmu nuhmei in-ongna tui kha, jât-hei, mipuihei, phunghei, khana ṭonghei kae.

¹⁶Nang in nahmu raki 10 leh ranhring khan, notinu kha anmater sik; anmani’n anei rakip kha anchômsōt sik a kha akarōk a anda sik; khan chu anmani’n aravōi ansâk sik a kha hmei vâng anro manhmang sik jo.

¹⁷Ajârchu Pathen ṭong kha hui atlungmak kârseng anmani intōk a ṭōn antlosap a khana ranhring hneng anvai rônna ratha kha anpek a Pathen mantlukna kha tlosōtna sik ama’n anmalunga tlo hnōmna kha adapek hei.

¹⁸“Nang in nahmu nuhmei kha raleichunga vaikarôn khōpui kalentak kha kae.”