Read Komrem ṬONGPHÔNG 18 Bible Online

ṬONGPHÔNG 18 - Komrem bible

ṬONGPHÔNG 18

¹Hivasōa marvâna inphut ngeva ahlop inkhat ajōng kaṭum ke’n kahmu. Ama ratha anei hranghra, khana ara-âng in ralei pumpui asat manvâra kae.

²Ama’n rasa inhnaktak a a-ôn: “Amanu katlu jo! Babylon Kalen kha katlu jo! Amanu kha tûnchu a’nthengmak rathla ravaihei kha’n anhnong jo; a’nthengmak mater ka-om va rakip omna kachang jo.

³Ajârchu jât rakip in aju kha an-in jo, khavakha ahur leh ajôngna ju kha kae. Raleichung renghei kha’n amanu leh jông leh kîk antlo, khana raleichunga invei katlo he’n amanu hur jâra anhaosō joa kae.”

⁴Khava sōa marvâna inphut rasa hlop inkhat ke’n katheia, hinga ahri: “Kamihei, heisōk ruh! Amanu hnenga inphut heisōk ruh! amanu setnahei kha chenpui hêrmak ruh; amanu karâkna kha chenpui hêrmak ruh!

⁵Ajârchu amanu setnahei kha marvân katlung inbuk inshâng jo, khava jâra amanu ṭhatmakna hlamhei kha Pathen in amandonsōt jo.

⁶Amanu’n arazenna chei kapōhrep a nangni’num ama hneng razen ruh; amanu’n atlo rakip chen inhnia tlopek una male ruh. Nanta-in sik a amantluk pek chei kōklei chen inhnia akahrat juhning mansip pek ruh.

⁷Amanu abinga kalûr leh ka-êma aleiom kapōhrep a khōdeng theina leh malung inrimna kha’m pek ruh. Ajârchu amanu’n abinga ahri: ‘Kei rengnu inkhat a hin a’n-ong eng kae! Kei renghmeinu inkhat changmak eng, malung inrimna nei hêrmak ning!’

⁸Hiva jâra natse, malung inrim, khana ṭâm katla hin, ni khat rōk shunga amanu chunga akatlungpet sik kae. Amanu hmeia anrokhum sik jo, ajârchu amanu chunga ṭongkatan, Rōngpu Pathen kha, akahrat kae.”

⁹Amanu hurna leh jôngna shunga aleikatla raleichung renghei kha’n amanu rôna hmeikhu kha anhmu pha, khōpui sik a khan kaṭap sik hei.

¹⁰Amanu demanrim kha anmani’n anṭit jâra, kahlatak a kangir heia anhri. “Heituk-hrep a ṭit ka-om jo mo! Heituk a kaja aka-om mo! Hiva Babylon khōpui hi akalenpen leh akalûrpen kae! Pung khat rōk shunga karâkna hing’hin nahmu joa kae!”

¹¹Raleichunga invei katlohei kha’num, anneinâk hei kha tûte’n anrachôk mak jo jâra anmalung inrima kaṭap hei, ṭajai ansui;

¹²tûte’n ansana, dangka, hira-mukta, hruipōn jât rakip, hruipōn innem, vapuirei pōn, thing mankatam vânga ansyem hei; saipui ha vânga ansyem hei, sum-êng vânga ansyem neinâk-hei seng rachôkmak jo hei;

¹³khan chu ṭhingṭhe, maru-marâng, ro manhnamna, bero, marim katui; thai, ju, gehu, sâng, sehrat, kemōng, shakor leh gâri, sōk-hei, khana mihringhei katlunga tûte’n rachôkmak jo hei.

¹⁴Invei katlohei kha’n amanu hneng anhri: “Naneinâk kaṭha namadu rakip inhmu mak jo, nanei rakip naṭhatna kasesōt jo, khan chu nang in khahei kha hmu nôk mak jo tin che nu!” anti.

¹⁵Khava khōpuia inphut invei katloa akahao mihe’n, amanu demanrim kha anṭit jâra, kahlatak a kangir sik hei, anmani kaṭap heia ṭajai ansui sik.

¹⁶Khana anmani’n, “Heituk-hrep a lung nat ka-om, heituk-hrep a ṭit aka-om jo mo! Amanu hlung mantam, hira-mukta, sana vânga a’ntōm, Pōn innem, vapuirei hruipōn innem vânga ale’nret ri kae!

¹⁷Khana pung inkhat rōk shunga amanu nei khaseng kha inhmangsō jo!” Rakōng kapu rakip leh akatôrhei khana achunga akachōng seng, khana tui-ôngpui chunga anhringna sik kajongle hei seng kahlatak a kangir hei,

¹⁸amanu ro mankângna hmeikhu kha anmani’n anhmu jâra kaṭap heia, “Hiva khōpui kalen kapō khōpui alak inkhat om hêrmak!” anti.

¹⁹Khana anlu chunga vaiphin ankathek a, kaṭap heia ṭajai ansuia anti, “Hiva khōpui kalen sik hin heituk-hrep a malung natna ka-om, heituk-hrep a ṭit ka-om jo mo nu! Hiva khōpuia inphut tui-ôngpui chunga rakōng katôr rakip in amanu nei jâra antahao kae! Khana pung khat rōk shunga anei rakip inhmang joa kae!”

²⁰Amanu inhmang jâra marvân inpâk ruh! Pathen mihei, sânkathemhei leh sonlehei, inpâk jo ruh! Ajârchu amanu’n nanchunga aleitlona dungjuia Pathen in achunga masetna apek jo kae!

²¹Khava pha ngeva kahrattak inkhat in chakri rehrep hlungtum inkhat ahrut a tui-ôngpui shunga ahlon manhlut a ahri, “Babylon khōpui kalentak kha hiva kapōa hnuk nattak a hlon mathla sik kae, khana a’nhmu nôk hêrmak sik jo kae.

²²Hlakasak hei serângdâr, rōsem, bunglir, pengkun mahring nanga inphut inthei nôk mak jo ning! Inveina ṭōn katlohei inhmu nôk mak jo ning! khan chu sasum rasa inthei nôk hêrmak jo ning!

²³Nashunga hmeivâr indet nôk hêrmak jo ning; hmōipa leh hmōinu rasa inthei nôk hêrmak jo ning. Nang inveina chu vânhnōi raleichunga ratha kaneipen kha kae, khana nadôi choi kadikmak khan vânhnōi ralei mi nahōn mathlâksō joa kae!”

²⁴Pathen mihei leh sânkathemhei thisen kha khōpuia khan a’nhmusōt jâra Babylon kha karâkna apek kae; kadik, raleichunga antathat rakip hei thisen kha khan inhmua kae.