Read Komrem ṬONGPHÔNG 19 Bible Online

ṬONGPHÔNG 19 - Komrem bible

ṬONGPHÔNG 19

¹Khava sōa marvâna inphut mipui katamtak hei rasa inhnaktak kapōa kathei, “Hallelujah! Hukmanhringna, lûrna, khana ratha hratna ni-Pathen ta kae!

²Ama ṭongtan chu akadik leh a’ntlun kae! Ajârchu noti kalennu ajôngna vânga raleichung kasukset kha ama’n karâkna apek jo. Amanu’n Pathen sōk-hei aleithat hei khava jâra Pathen in karâkna apek kae,” anti.

³Khana anmani’n an-ôn nôk, “Hallelujah! Khōpui kalen kângna hmeikhu kha are-rea kakhû ṭhak a kae.”

⁴Upa 24 hei leh ranhring 4 hei kha inkun heia len in-ongna chunga a’n-ong Pathen kha ankamuk a, “Amen! Hallelujah!” anti.

⁵Khava sōa len in-ongna inphut rasa inkhat in ajōng hri, “Pathen kajana kanei asōk rakip leh ami rakip, kasin-kalen in, ni-Pathen manpâk ruh!”

⁶Khava sōa mipui katamtak rasa kapōa tôngtui rasa kapō, khōjang kapōk, khō inri rasa kapō ke’n katheia hing’hin ahri, “Hallelujah! Ajârchu ni-Pathen Akahratpen Rōngpu kha Reng kae!

⁷Eini katlai senga inpâk rih; alenna choi ka-ân rih! Ajârchu Kemōngte luhôngna sik pha kha kahnai jo, ahmōinu kha abinga intluk jo.

⁸Amanu hruipōn intheng akadi rik-rak a’nretna sik a anpek jo.” (Khava hruipōn khachu Pathen mihei akaṭha tlona kha kae.)

⁹Khava pha ngeva khan kahnenga ahri, “Hi mazet roh: Kemōngte hmōiṭhōina reveia a’nbek mihei kha mikahōihei kae.” Khana ngeva khan ahri nôk, “Hivahi akadik Pathen ṭonghei kha kae.”

¹⁰Ama inmuk sik kei akekunga inkun jo eng, tâk ama’n kahnenga ahri, “Kha tlomak roh! Ke’m nang leh khana Jesu tamalârsōt akadik intu inhnet hei seng leh a’n-ang, sōk inkhat eng kae. Pathen jôk kamuk roh!” Ajârchu Jesu tamalârsōt akadik kha sânkathemhei manhlimna kapek kha kae.

¹¹Khava sōa marvân inhlânga, shakor kabang inkhat aka-om ke’n kahmu. Achunga kachōngpa kha Akadik leh Taksenthei inti; Ama’n akadik vâng ṭong atana, are kha atuk a kae.

¹²Ahmit hmeimale vâra kavâr, khana alua lenlukhu hei inkhu. Ama’n rahming inkhat achunga amazet, tâk khavakha ama tamanhret tei loa tûte’n manhret mak hei.

¹³Apōn invonna kha thisen in akatōm sō. Arahming kha “Pathen Ṭong” inti.

¹⁴Marvân remi he’n shakor anchōnga a’ntheng hruipōn innem kabang vâng inret heia, akahnung anjui.

¹⁵Abeia inphut chemjâm kangeijap inkhat heikasōk, khan vâng ama’n jât-hei ator sik hei. Ama’n anchunga thir khōnghre inkhat vâng vai arôn sik hei, khana Pathen Akahratpen hnuk natna vomhrui thei-epna vâng vomhrui kha a-ep mathlâk sik kae.

¹⁶Apōn chunga leh arakō chunga: “renghei Reng leh rōngpuhei Rōngpu,” inti rahming inzet a kae.

¹⁷Khava sōa kani chunga kangir marvân ngeva inkhat kahmu. Ama’n bōirōk a kajōng va rakip hneng inhnaktak a a-ôn, “Pathen sâktlâng kalena hong intûp ruh!

¹⁸Renghei, rehlam kakeihei, remihei, shakorhei leh anchunga kachōnghei, sōk-hei leh masōhei, akasin leh akalen mi rakip taksa ravōi kasâk sik a hong ruh!”

¹⁹Khava sōa ke’n shakor chunga kachōngpa leh aremihei re intukpui sik a ranhringhei leh ralei renghei khan chu anremihei kaleihmu hei.

²⁰Khava ranhring kha ahmai kunga ṭōntlo inlak katlo sânkathem inhlempa kha leh inṭhōia ansur heia kura ankhum jo hei. (Khava aṭōntlo inlak tlona vâng khan ama’n ranhring limsyem chîknabi kaneihei leh ranhring inmuk hei kha amathlem mathlâk heia kae.) Hmei kângna dîr shunga ranhring leh sânkathem inhlempa kha anhring pum a anhlon manhlut jo hei.

²¹Shakor chunga kachōngpa beia inphut ahei kasōk chemjâm vâng khan anmani remihei kha athatsō jo hei; khana antaksa kalōng ravōihei kha vahei kha’n torchena ansâk jo heia kae.