Read Komrem ṬONGPHÔNG 2 Bible Online

ṬONGPHÔNG 2 - Komrem bible

ṬONGPHÔNG 2

¹“Ephesus bekrup ngeva hneng mazet roh: “Hivahi akut changtinga ârsi 7 kachoi khana sana thaihmei kung 7 kâra akalôn lele ama ṭong kae.

²Naṭōn leitlo ke’n kamanhret; khangtuk hrep de akahrat chea khangtuk ṭōn intatak natlo kha ke’n kamanhret. Khan chu sonle chu changloa sonle kachang ung kati hei, nang in na-enmansin heia, mimalei kasei anchang kha nasursōt heia, mikaṭhamak-hei nang in namadim tor mak kha kamanhret.

³Kei sik jâra khōdeng theina nade manrima, masō lo jena nadehrat a kae.

⁴Tâk-kha nachunga kahnōm makna hi ka-om: nang in hma inkeia nalungset eng kapōa tûnchu alungset mak jo che.

⁵Mandon roh natlûkna kasôt jo! Namalung thleng ina hma naleitlo kha tlo nôk roh. Nang in namalung nathleng mak inchu, nathaihmei vâr matungna kha ahmun a inphut akalosōt sik a nahnenga kei akajōng sik eng kae.

⁶Tâk-kha ke’n kamater kapōa nang in Nikolaitanhei tatlo kha namater, hinahin naṭhatna inkhat ka-om.

⁷“Khava jâra nang in kōr nanei inchu, Rathla’n bekrup-hei hnenga ahri kha, rangei roh! “Torna akanei jo hei hnenga khan Pathen rahōn shunga akahmông hringna thingkung kara kha ansâkna sik a ratha kapek sik hei kae.

⁸“Smyrna bekrup ngeva hneng mazet roh! “Hivahi anphutna leh a’nchaina, akathia akahring nôkpa ṭong kae.

⁹Namalung inrimna hei ke’n kamanhret; nang sara nachang ke’n kamanhret, tâk kadiktak a chu kahao che! Jehudi chu changlo heia kachang ung kati he’n nang kadōia akaṭhamak antahri kha kamanhret, anmani Seitan ta kachang rup-hei kae!

¹⁰Khōdeng nathei sik kha heite ṭitmak roh. Rangei roh! Seitan in nang enmansinna sik nankâra mi ṭhahrep hlungkura akhum sik chei, ni 10 katlunga nanmalung inrim sik. Thina katlunga taksenthei chang roh, ke’n hringna kha torna inpâkmana kapek sik che.

¹¹“Khava jâra, nang in kōr nanei inchu, Rathla khan bekrup-hei hnenga ahri kha rangei roh! “Torna kanei mihei khachu vōi 2 thina khan manrim nôk mak jo hei ning.

¹²“Pergamum bekrup ngeva hneng mazet roh: “Hivahi alang hnia kangei chemjâm kaneipa ṭong kae.

¹³Na-omna hmun kha Seitan len in-ongna hmun achang kha ke’n kamanhret. Taksen ka-om tak kasâkhi kachang Antipas kha, anleithat katlunga nataksenna eng nang in masō mak chea kei sik a akadik kachang che.

¹⁴Tâk-kha nachunga kahnōm makna ajing ka-om: ti chu Israel mihei ansetna sik a limsyem kamukna thlai mansâkna sik leh omchen kadik mantlona sik a Balak ṭong intheipa, Balaam mantheina akajui mi ṭhahrep nang leh inṭhōia ka-omsap cheia kae.

¹⁵Kha leh in-anghrep a Nikolaitanhei intheina ṭong kajui um nankâra ka-om.

¹⁶Khava jâra namalung thleng roh! Kha achangmak inchu, kabeia akasōk chemjâm vâng khan khava mihei intukpui sik nahnenga inrangtak a akajōng sik eng kae.

¹⁷“Khava jâra nang in kōr nanei inchu, Rathla khan bekrup-hei hnenga ahri kha rangei roh! “Torna kanei mihei kha ke’n a’nthup manna kapek sik hei. Khana akachenpa tei loa tûte taman hretmak rahming ther inzet hlungvâr inkhat et um kapeksa sik hei.

¹⁸“Thyatira bekrup ngeva hneng mazet roh: “Hivahi ahmit hmeimale kapō, ankepha sum-êng innôt kavâr kapō, Pathen Sapa inphut ṭong kae.

¹⁹Naṭōntlo kha kamanhret. Nalungsetna, taksenthei nachang, na-inṭangna, khana nathōk hratna ke’n kamanhret. Hma inkeia naṭōntlo kanek a, tûnhin rahnak a ṭōn natlo ti hi kamanhret.

²⁰Tâk-kha nachunga kahnōm makna hi ka-om: Pathen ṭong thangkakōi a’nchang saknu Jezebel kha nahnōm pek. Amanu’n limsyem hnenga inthoina hme kasâk sik a leh ṭhatmak omchen katlo sik a kasōk hei amanthei heia hlam kadikmak a aṭhōi heia kae.

²¹A-omchen kadikmak a inphut amalung athlengna sik ke’n pha kapek, tâk amanu’n amalung thlenghnōm mak.

²²Khava jâra amanu leh akajôngsap hei kha inhnaktak a khōdeng antheina sik ke’n amanu kha jekhum chunga kahlon mathlâk sik jo. Anmani’n amanu leh inṭhōia omchen kaṭhamak antlona inphut anmalung anthleng mak inchu, tûnchu hi ke’n katlo sik jo.

²³Mihring malung mandon leh tamadu rangei inhret kei kachangna hi bekrup rakip in anmanhretna sik, amanu sahei kha kathat sik jo hei. Nangni’n nantatlo dungjui et a ke’n nankhenga kamale sik chei.

²⁴“Tâk-kha Thyatira ka-om nangni alakseng inchu hiva akanimak a intheina kahnung hi juimak cheia kae; milak he’n, ‘Seitan lungri inthûk’ antati kha nangni’n juimak chei. Ke’n nangni chunga rônkahrik ahlop dapek mak chei ning kati kae.

²⁵Tâk, kajōng mak kârseng, nangni’n nantanei kha kahnettak a leimatu tlit ruh.

²⁶A’nchai ning katlung kalungdo ṭōn katlo ṭhak, torna kanei mihei kha, ke’n kapa hnenga inphut kachen jo torna ratha khet kha kapek sik hei: jât-hei chunga ratha neina, thir khōnghre vânga vai rôna, bephu kapōa ahar-ahak a vōkkhōina ratha kapek sik hei. Khan chu ke’n jîngkâr vârpa kha’m kapeksa sik hei.

²⁹“Khava jâra nang in, kōr nanei inchu, Rathla’n bekrup-hei hnenga ahri kha rangei roh!