Read Komrem ṬONGPHÔNG 21 Bible Online

ṬONGPHÔNG 21 - Komrem bible

ṬONGPHÔNG 21

¹Khava sōa marvân ther leh ralei ther ke’n kahmu. Hma-inkei marvân leh ralei marō, khana tuipui inhmu mak jo.

²Hmōinu inkhat apuise intō sik a, a’nret a a’ntlukdek kapōa Jerusalem ther, Khōpui Intheng kha marvâna Pathena inphut ajōng kaṭum kha ke’n kahmua kae.

³Khana len in-ongna inphut rasa inhnaktak a jōng kaṭong ke’n katheia hing’hin ahri: “Tûnchu Pathen inn kha mihring leh ka-omsap jo! Ama’n anmani a-ompui sik hei, khana anmani ami kachang sik hei. Pathen khet in a-ompui sik hei, khana ama an-Pathen kachang sik.

⁴Ama’n anhmit rathli rakip ahni manhi pek sik hei. Thina om nôk mak jo ning, khan chu malung inrimna, natna leh ṭana om nôk mak jo ning. Neinâk marō rakip inhmu mak jo.”

⁵Khava sōa len in-ongna chunga a’n-ongpa khan ahri, “Tûnchu heirakip ke’n athera kasyem jo!” Ama’n ahri nôk, “Hivahi mazet roh, ajârchu hiva ṭonghei hi akadik leh taksenthei hei kae!”

⁶Khan chu ama’n ati, “Hi intlo jo! Kei ahma inkei leh ahnung kakhôr, a’nphutna leh a’nchaina eng kae. Tu achang inum tui kahre mi kha ke’n hringna tuiripût a mankasea a-ina sik ratha kapek sik.

⁷Khava torna kanei mihei khan hivahi keia inphut achen sik: Kei anpa Pathen kachang sik eng, khana anmani kasa kachang sik hei.

⁸Tâk-kha ṭit kasehei, mikahōnhei, mikathat-hei, omchen kase hei, dôi kachoihei, limsyem inmuk hei, khana malei kaseihei seng omna sik a hmun kha hmei leh kât kângna dîr kha kae, khavakha vōi 2 tlukna thina kha kae.”

⁹Ngeva 7 tlukna khan a’nchaina hrise thlengkam 7 kasip phet achoia kahnenga kahonga ati, “Hong roh, ke’n Kemōngte nuhmei sik hmōinu kha manhmu che rong.”

¹⁰Khana rathla khan akhimna thōia ada jo eng, khana ngeva khan tlângbung inshângjap inkhat chunga aṭhōi jo enga kae. Khana Pathen hnenga inphut marvâna ajōng kaṭum, khōpui intheng, Jerusalem kha amanhmu eng,

¹¹khōpui kha Pathen lûrna leh inṭhōia kavâr. Hlung mantam jasper kapō, crystal kapōa intheng.

¹²Khōpui kurbang kha kalen, inshâng hranghra, sōngkot 12 ka-om, sōngkot-hei kha ngeva 12 he’n anhrung hei. Sōngkot-hei chunga khan Israel phung 12 hei rahming inzet a kae.

¹³Ahmai rakip a sōngkot 3 sasâm et ka-om: nisōting 3, thlâng ting 3, tlaitlâk ting 3, sak ting 3 ka-om.

¹⁴Khōpui kurbang kha hlung innhmun 12 chunga intung, khava hlunghmunhei chunga khan kemōngte sonlehei rahming 12 inzet a kae.

¹⁵Kahnenga ṭongkahri ngeva khan khōpui, sōngkot leh abanghei tena sik a sana khōnghre inkhat anei.

¹⁶Khōpui kha adung avai in-anghrep a, rakir 4 akanei kae. Ngeva khan khōpui kha atena khōnghre vâng khan ate pha, adung avai khana a’nshâng in-anghrep a kilometre 2,400 kasei.

¹⁷Ngeva khan kurpui bang kha’m atea, metre 60 inshâng, khava ngeva tate kha ama tena hisâp dungjuia kae.

¹⁸Abang kha jasper hlung vâng insyem, khana khōpui kha thle-en intheng kapōa sana intheng vânga insyema kae.

¹⁹Khōpui kurbang innhmun hei kha hlung mankatam ajât rakip vâng manret hei kae. Hma inkeipen innhmun hlung kha jasper vânga inphut, abâna 2na kha sapphir, 3na kha agat, 4na kha emerald,

²⁰5na kha onyx, 6na kha carnelian, 7na kha quartz, 8na kha beril, 9na kha topaz, 10na kha Chalcedony, 11na kha turquoise, 12na kha amethist kae.

²¹Sōngkot 12 hei kha hira-mukta 12 hei kae, sōngkot inkhat et kha hira-mukta inkhat sâma a’nsyem hei.

²²Khōpui shunga khan bek-inn hmumak eng ajârchu khava bek-inn kha kemōngte leh Akahratpen Rōngpu Pathen kha kachang jo hei.

²³Khōpuia khan kani leh thla rangei mak, ajârchu Pathen lûrna khan khavakha asat manvâr jo khana kemōngte kha thaihmei vâr kachang jo.

²⁴Vânhnōi mihringhei kha avâra khan kalônle sik hei, khana ralei reng he’n annei leh anhao hei anta hongrôn manhlut sik kae.

²⁵Khōpui sōngkot-hei ani tina inhlâng ṭhak sik; inkam hêrmak jo ning, ajârchu khana khan jân om mak jo ning.

²⁶Jât rakip in anlenna leh anhaona hei kha khōpui shunga khan anta heirôn manhlut sik kae.

²⁷Tâk-kha khōpui shunga khan a’nnim heite hlutthei mak ning, khan chu malei kasei leh inzakna ṭōnkatlo hlutthei mak ning. Kemōngte hringna lekharabu shunga arahming a’nzet hei rōk kha khōpui shunga akahlut sik hei kae.