Read Komrem ṬONGPHÔNG 3 Bible Online

ṬONGPHÔNG 3 - Komrem bible

ṬONGPHÔNG 3

¹“Sardis bekrup ngeva hneng hi mazet roh: “Hivahi ârsi 7 leh Pathen rathla 7 kaneia inphut ṭong kae. Ke’n heimo natlo kamanhret; nang in akahring eng nati ravâng, akathisa nachang ke’n kamanhret!

²Khava jâra thōi roh, tûn katlung naneihrep kha athicher mak hma manngar roh. Ajârchu nang in naleitlo kha Pathen hmaikunga pui katluk lachang mak ti ke’n kahmu sōt a kae.

³Khava jâra heimo ale’nthei che, heikhong mo naleithei kha mandon roh; jui roh, khana namalung thleng roh. Nang jena inphut na’nṭhang mak inchu, inru inkhat kapōa kei nachunga kajōng sik eng, khana heitik akajōng sik eng nang in manhret mak tin che.

⁴Achang ravâng Sardis a ka-om nangni ṭhahrep inchu pōn kha inthenga akada ka-om chei. Nangni pōn kachek invon pum a kei leh akalengsap sik me kae, ajârchu nangni khava sik a rahōi kasōk chei.

⁵Torna kaneihei kha hiva kapōa pōn kachek an-invon sik, khana hringna lekharabu shunga inphut anrahming losōtpek mak hei ning. Khana kapa hmaikunga leh angevahei hmaikunga anmani keita hei kae tia inlârtak a kaphông sik.

⁶“Nang in kōr nanei inchu, Rathla’n bekrup-hei hnenga ahri kha rangei roh!

⁷“Philadelphia bekrup ngeva hneng hi mazet roh: “Hivahi a’ntheng leh akadik inkhat a inphut ṭong kae. David shokir kachoi, amahlâng kha tûte’n khâr theimak, akhâr kha tûte’n mahlâng theimak.

⁸Ke’n naṭōntlo kha kamanhret; nang in ratha ajingte nanei ti kamanhret; nang in kaṭong manthei kha najuia kei taksenthei hongkachang che. Tûte’n antakhâr tor mak kot kha ke’n nahma kamahlang.

⁹Rangei roh! Seitan ta kachang rup-hei, Jehudi chu changlo heia kachang ung katia malei kaseihei kha, nangni inmuk sik a, nanhmai kunga inkun sik a, kamanhong sik hei kae. Kalungsetna chei hi anmani seng in antamanhret sik kae.

¹⁰Ajârchu nande hratna sik a kaṭong pek chei kha nanjui, raleichung mi rakip enmansinna sik a, vânhnōi pumpui chunga malung inrimna ajōng katlung sik a inphut kahuksōt sik chei.

¹¹Kei inranga kajōng sik eng. Nang in natorna tloman kha tûte’n amarûk tor makna sik, nachen kha inda kaṭha roh.

¹²Ke’n kapa bek-inn shunga anmani kha torna chopui kamanchang sik hei, khana anmani’n kha dahlon hêrmak hei ning. Ke’n marvâna ka-Pathena inphut akajōng sik ka-Pathen rahming, ka-Pathen khōpui rahming Jerusalem, hei kha anchunga kamazet sik. Anchunga karahming ther kha’m kamazetsa sik.

¹³“Khava jâra, nang in kōr nanei inchu, Rathla khan bekrup-hei hnenga ahri kha rangei roh!

¹⁴“Laodicea bekrup ngeva hneng hi mazet roh: “Hivahi Pathen kutsyem, heirakip kungpui, akadik sâkhi leh taksen ka-om tak Amen a inphut ṭong kha kae.

¹⁵Ke’n naṭōntlo kha kamanhret; nang akadai ngâr um changmak che khan chu akalum ngâr um changmak che ti kamanhret. Nang inkhat jôk nachang sik kamadu che!

¹⁶Tâk-kha nang kalumpor che, akalum ngâr um changmak che akadai ngâr um changmak che, kabeia inphut kamasâsōt sik jo che!

¹⁷Nang in, ‘Kei kahao eng khana kanei; kamadu rangei rakip kanei,’ nati. Tâk-kha heituk-hrep a a’nreng che khana lungset aka-om che mo! kha nang in manhret mak che! Nang nahmit kacho, pōnsi derkei kase, sara che kae.

¹⁸Khava jâra nahaona sik kei hnenga inphut sana intheng inchôk roh, tia kamanse che kae. Inzakpui ka-om nataksa katōmna sik, pōn kachek a na’ntōmna sik, inchôk roh. Khan nôk chu nahmit avârna sik, hmit hlei nakano sik inchôk roh.

¹⁹Ke’n kamalungset seng kamanse heia, karâkna kapek hei. Khava jâra malung kahluttak a nasetna inphut namalung thleng roh.

²⁰Rangei roh! Kei kot kunga kangir enga kot karaki; karasa katheia kot inhlâng mi inkhat a-om inchu, kei a-inna kahlut sik enga kha ama leh kasâksap sik, ama’n kei leh asâksap sik a kae.

²¹Torna kanei mi kha, tûn ke’n torna kaneia kapa len in-ongna hnenga ka’n-ong jo kapōa, ke’n kalen in-ongna hnenga a’n-ongna sik kapek sik.

²²“Khava jâra nang in kōr nanei inchu, Rathla khan bekrup-hei hnenga ahri kha rangei roh!”