Read Komrem ṬONGPHÔNG 6 Bible Online

ṬONGPHÔNG 6 - Komrem bible

ṬONGPHÔNG 6

¹Khava sōa kemōngte khan achîkna a’ntat 7 kâra hma-inkei kha asuk khōia amahlang kahmu, khana ranhring 4 hei kâra inkhat in “Hong roh!” tia khō inri kapō rasa kha kathei.

²Ke’n ka-ena, shakor kabang inkhat leika-om. Akachōngpa khan sâi inkhat achoi, khana lenlukhu inkhat anpek a kae. Ama re kator inkhat kapōa torna kanei sik a shakor achōnga kasesōt jo.

³Khava sōa kemōngte khan 2 tlukna achîkna intat kha asuk khōia amahlâng; khana ranhring 2 tlukna khan, “Hong roh!” ati ke’n kathei.

⁴Khana shakor kasen ahlop inkhat heikasōk a kae. Raleichunga mihring inkhat leh inkhat inthat tōna sik re intlona sik, torna ratha kha anpek a kae. Khana khava chunga akachōngpa kha chemjâm kalentak anpek a kae.

⁵Khava sōa kemōngte khan 3 tlukna achîkna intat kha asuk khōia amahlang; khana ranhring 3 tlukna khan kahnenga, “Hong roh!” ati ke’n kathei. Khana ke’n ka-ena shakor kadum inkhat leika-om. Achunga akachōngpa kut chunga khan khartena inkhat achoi.

⁶Ranhring 4 hei kâra inphut rasa khan, “Gehu saida khat ni khat ratha hlō sik, khan chu satun saida thum ni khat ratha hlō sik kae. Tâk-kha olive theikung leh vomhrui rahōn kha manset mak hei roh” ati.

⁷Khava sōa kemōngte khan achîkna intat 4 tlukna kha asuk khōia amahlâng; khana ranhring 4 tlukna khan “Hong roh!” ati eng kathei.

⁸Khana ke’n ka-ena shakor akadângper inkhat leika-om. Khava shakor chunga kachōngpa rahming kha akathi inti, khana kathikhō he’n akahnung ahei juia kae. Anmani kha raleichung sem manlia sem khat re vâng, ṭâm vâng, natse vâng, khan chu ramsha vâng thatna sik a torna ratha anpek jo hei.

⁹Khava sōa kemōngte khan 5 tlukna achîkna intat kha asuk khōia amahlang. Pathen ṭongkahri inthanglele, ansâkhi tlona chunga taksenthei kachang, anta leithat jo hei rathlahei maichâm thōia an-om kha ke’n kahmu.

¹⁰Anmani’n rasa inhnaktak a an-ôna, “Akahratpen Rōngpu, a’ntheng leh akadik! Keini anthat ung jâra ralei mihei chunga ṭong natan sik leh nakarâk sik hei kha heituk mo alakasôt sik?” anti.

¹¹Pōn bang inkhat et anpek heia, anmani kapōa ansōk changpui hei leh Christian sōpuihei antathat sik hei kha anja alatluk mak kârseng pha bongkhat antalahngâk sik a ṭong anmanthei hei.

¹²Khana Kemōngte khan 6 tlukna achîkna intat kha asuk khōia amahlâng ke’n kaleihmu. Khana lingnu inhnaktak innok, khana kani kha sahme pōn kaphok akadup kapōa kadup jo, khan chu thla kha thisen kapōa kasen jo.

¹³Khana thli inhnak in theichangkung akanok pha akahmin mak kara akatla kapōa, marvâna inphut ârsihei kha raleichunga jōngkatla heia kae.

¹⁴Marvân inhmu mak jo kapher inze kapōa inzea, hme leh tlâng khana tuikekhum ram rakip anhmun inthon jo hei.

¹⁵Khava pha raleichung renghei leh rehlam kakeihei, akalen akahrâng, akahao, sōk-hei leh sōk mak heirakip, hme leh dâma hlungkōk hlungkâk a inthup jo hei.

¹⁶Anmani’n hmebung leh hlungpuihei anbek a, “Len in-ongna chunga a’n-ongpa hmit-hmua inphut leh kemōngte hnuk natna inphut ani kathup sik a kanchunga hongtla ruh, ajōng makhu ruh!

¹⁷Ajârchu ahnuk natna kani ṭit ka-om tak kha tûn kajōng jo, khava sik a tu mo akangirtor sik?” anti.