Read Komrem ṬONGPHÔNG 7 Bible Online

ṬONGPHÔNG 7 - Komrem bible

ṬONGPHÔNG 7

¹Khava sōa raleichung tui-ôngpui chung, thingkung rakip chunga thli heite ahrâng makna sik raleichung thli 4 intu ngeva 4 ralei rakir 4 a akangir kahmu hei.

²Khana akahring Pathen mêrchîkna leh inthoia nisōtinga akajōng ngeva ahlop inkhat ke’n kaleihmu. Ama’n ralei leh tui-ôngpui kasukset sik a Pathen in ratha apek ngeva 4 hei kha rasa inhnaktak a abek heia

³ngeva khan anhnenga, “Raleichung, tui-ôngpui, thingkunghei achang inum, Pathen sōk-hei machea achîkna kankatat mak hma seng sukset mak hi ruh,” ati.

⁴Khana anmachea Pathen chîkna intat hei seng 144,000 hei kha animan theia kae. Anmani Israel phung 12 heia inphut kae,

⁵phung rakip a mi 12,000 sâm: Judah, Reuben, Gad, Asher, Naphtali, Manasseh, Simeon, Levi, Isaachar, Zebulun, Joseph leh Benjaminhei hi kae.

⁹Hivasōa ke’n ka-ena, tûte tatei tor mak sik, mipui katamtak kahmu hei! Anmani kha jât rakip, phung rakip, mi rakip, ṭong rakip a inphut pōn bang ansia kemōngte len in-ongna hmaikunga kahno bō anchoia kangir hei.

¹⁰Anmani’n rasa inhnaktak a an-ôn: “Len in-ongna chunga a’n-ong ni-Pathen leh kemōngtea inphut hukmanhringna kahong jo!”

¹¹Khana len in-ongna kimvea khan akahring ranhring 4 leh upahei khana ngeva kangir heia, anhmai andima inkun heia Pathen kha ankamuk a,

¹²“Amen! Choi ka-ânna, lûrna, singna, manpâkna, kajana, ratha hratna, torna, are-rea ni-Pathen ta changṭhak rasoh! Amen!” antia kae.

¹³Khana upahei kâra inkhat in ader enga, “Hiva pōn bang kasi mihei hi tuhei mo, khontinga inphut akahong hei mo?” ati.

¹⁴“Apu, ke’n manhret mak hei eng. Nang in namanhret hei,” tia kamasôn. Khana ama’n kahnenga ati, “Hiva mihei hi suk manrimna inphut a kahringa akahong hei kha kae. Anmani’n kemōngte thisen vâng anpōnsi anta’nsôp inthenga antamanchek jo hei kae.

¹⁵Khava jâra anmani Pathen len in-ongna hmaikunga akangir heia sûn leh jân bek-inna anrajena ka-om hei. Len in-ongna chunga a’n-ongpa khan anmani a-ompui heia akahuk sik hei kae.

¹⁶Anmani anvon ṭâmhêr mak jo ning, antui um hrehêr mak jo ning; khan chu kanisat in kâng mak jo hei ning,

¹⁷ajârchu len in-ongna laiṭim a ka-om kemōngte kha, ankakhem akachang sik jo kae, khana ama’n tui kahring lōngna hmun a aṭhōi sik hei. Khana Pathen in anhmit rathli ahni manhi pek sik jo hei kae.”