Read Komrem RUTH 2 Bible Online

RUTH 2 - Komrem bible

RUTH 2

¹Naomi puise Elimelech innkō kasōk mikanei, aṭong kase arahming Boaz inti inkhat leika-om.

²Ni khat Ruth in Naomi hneng derna aneia, “Hleia sâng kakhôm he’n sapâr antadahlon akahrut sik a vase rong . Kei leh ṭōn anikatlopui sik mi inkhat kavahmu nger sik,” ati. Naomi’n amasôna, “Vase roh, kahmōinu,” ati.

³Khana Ruth kha hleipuk a vakasea sakakhôm hei kahnunga antamathlâk sapâr hei ahrut heia kae. Amanu kha Boaz intipa hleipuk a avakase kachang jo.

⁴Pha chomkhat sōa Boaz atak-khet Bethlehema inphut ahlei hmun a heikatlung jo, khana ṭōn leikatlo hei kha inpâk a achibei hei, “RŌNGPU’n ompui chei rasoh!” ati. “RŌNGPU’n mahâmṭhat pek che rasoh,” tia anmasôn.

⁵Khava sakakhôm katinta hneng Boaz in ader, “Sova nuhngâknu so tu mo?”

⁶Mipa khan amasôn, “Naomi leh ahong inṭhōi hei Moab a nuhngâk kae.

⁷Amanu’n ṭōn katlohei kahnung juia savui hrutna sik a kahnenga ader enga kae. Ama jîngkâra inphut ṭōn atloa tûnpek a khan kabânga inhngana hmun a a’nhnga kae.”

⁸Khava sōa Boaz in Ruth hneng ati, “Ke’n ṭong ajing manthei che rong. Hiva hleia tei loa hmun ralak a sâng vahrut mak roh. Hina ṭōn katlohei hi leh tlosap ruh;

⁹khon mo sâng anta-ât en hei roh khana anmani leh omsap ruh. Kami he’n nang andeikathok makna sik che kamanthei jo hei. Natui ahre pha, se ina anmani tui mansipsa tuibea va-in roh.”

¹⁰Ruth in inkuna ahmai in raleia amantôna Boaz hneng ati, “Heisik a mo kei sik a hingtuk a namandonpek eng? Heisik a mo ram hlop nuhmei inkhat sik a khangtuk a lungset narôn sik?”

¹¹Boaz in amasôn, “Napuise athia inphut naterpi hneng natlopek heirakip kalei thei jo. Nang in heikhonga mo nanu napa khana naram natui nadahlonna hmalai namanhret hêrmak mihei kâra nahonga nava om hi kamanhret jo.

¹²Naṭōntlo jâra RŌNGPU’n vâng pek che rasoh. Ahrungna sik chea nahonghnai, Israelhei RŌNGPU Pathena inphut pui katluk tloman nahmu chang rasoh!”

¹³Ruth in amasôn, “Nang kei hnenga lungset kathem hêr che, apu. Nasōk inkhat leh kei hi kan in-ang makjen ravâng ṭong innem vâng narakôk enga kahōidet a kathei jo.”

¹⁴Busâk pha Boaz in Ruth hneng ati, “Hong roh, buhlom har hi antui leh vasâk roh.” Khava jâra Ruth in ṭōn katlohei kâra in-ong jo, Boaz in amanu kha thangpêr ajing apek a kae. Amanu’n avon akhop mak lai seng aleisâk, khana a’nhlei ajing um aleisâk nôk a kae.

¹⁵Amanu’n sabor hrut sik a ase pha Boaz in ṭōn katlohei hneng ṭong apek hei, “Saphe a’nbuk hei kha’m inhrut rasoh, abângna sik a ahnenga heite hrimak ruh. Khava tei loa, saphe kâra inphut ajing ajing losōtpek una ahrutna sik a dahlon pek ruh.”

¹⁷Khang’khan Ruth in khōhlei katlunga sabor ahrut, khana avōk rachi pha kilograme 10 kapō ahmu jo.

¹⁸Ama’n ahmu hei kha arôna khōpuia kasea aterpi hneng ava malâr jo. Amanu’n sâk inhlei ahei rôn kha’m ahnenga apek jo.

¹⁹Naomi’n ader, “Khona inphut mo hihei rakip hi navakhôm mantûp? Tu hleipuk a mo ṭōn navatlo? Nang hnenga malung kanei mi kha Pathen in vâng pek rasoh.” Khava jâra Ruth in Naomi hneng Boaz intipa hleipuk a ṭōn kavatlo kae atipek.

²⁰Naomi’n ka-ônga, “RŌNGPU’n Boaz chunga vâng pek rasoh. RŌNGPU’n akahring leh akathihei chunga a’ntepna ajuia kae. Khana ahrisa nôk a, “Mipa kha keini leh a’nhnaitak innshung mi kae, eini ka-ensui sik hei kâra inkhat kae.”

²¹Khava sōa Ruth in ati, “Akaṭhapen chu, sâng khôm kha anchaimak kârseng, aṭōn katlohei leh sâng kakhômsapna sik a amanthei eng.”

²²Naomi’n Ruth hneng ati, “Ôk, kasanu, Boaz hleipuk a nuhmeihei leh ṭōn navatlo sik kha kaṭhadet sik. Mihlop hleipuk a nase’nchu andeikathok sik che.”

²³Khava jâra Ruth in anmani leh ṭōn antlosap jo khana bunim leh gehu ankhômsō mak hma seng sabor aleihrut a kae. Khana aterpi leh leika-om sōm heia kae.