Read Komrem RUTH 4 Bible Online

RUTH 4 - Komrem bible

RUTH 4

¹Boaz in khōpui keithe tlânga intûpna hmun a kasea va’n-ong jo. Khana Elimelech hei innkō leh a’nhnaipen, Boaz in aleihridekpa kha khan kahong, abek a ati, “Hin hong hi roh, kaṭhōnpa, khana in-ong hi roh.” Khana ama kha vakasea va’n-ong jo.

²Khava sōa Boaz in khōpuia hlamkakei 10 he’m abek a khan aman ong hei. Anmani an-inong jo pha,

³A-innkōpa hneng ati, “Tûnchu Naomi hi Moab a inphut hong inle jo; ni innkōpa Elimelech hleipuk kha ajōr hnōm jo,

⁴khana nang in namanhret sik hlam kasōk tia kamandon. Tûn nang in khavakha namadu’n chu hinna in-ong mihei hmaikunga rachôk jo roh. Tâk narachôk hnōm mak inchu hri jo roh, ajârchu hiva rachôkna ratha kanei hi ahma kakeia nang che kae, abânna kei eng kae.” Mipa khan ati, “Kei in karachôk sik.”

⁵Boaz in ati, “Kaṭha jo, tâk-kha hleipuk kha Naomia inphut narachôk inchu, Moab jōr renghmeinu Ruth um narachôksa jo kae, kha achang inchu hleipuk kha akathipa rahminga ka-om sik.

⁶Mipa khan amasôn, “Kha achang inchu hleipuk rachôkna ratha kanei kha kamasō sik jo, ajârchu kasa he’n khavakha chenmak hei ning. Nang in rachôk jo roh; ke’n karachôk mak a kaṭha sik.”

⁷Khava laia khan chu, karōi jōr sik a-enum, thleng sik a-enum, akajor sikpa khan akekōk alosōt a a’ncho sik hneng apek sik hi tlongai kae. Hing’hin Israel he’n ṭongchaina anmalâra kae.

⁸Khava jâra mipa khan Boaz hneng “Nang in rachôk jo roh,” ati pha akekōk alosōt a Boaz hneng apek jo.

⁹Khava sōa Boaz in hlamkakeihei leh alak ka-om hei seng hneng ati, “Tuning nangni sâkhi jo chei kae, ti chu Elimelech leh asapa Chilion leh Mahlon karōi rakip Naomia inphut kei in karachôk jo kae.

¹⁰Khava chunga, Mahlon nuhmei renghmei, Moab jōrnu hi kanuhmei akachang jo kae. Hivahin karōi kha akathihei innshunga ka-om sik, khana a-innshung kha amihei kâra leh akhōpui shunga ka-om ṭhak sik. Tuning hiva sâkhi hi nangni akachang chei kae.”

¹¹Hlamkakeihei leh alakseng khan anti, “Ôk, keini sâkhi ung kae. RŌNGPU’n nanuhmei kha Jacob hnenga sa katamtak injōrpek hei Rachel leh Leah kapōa manchang pek che rasoh. Ephrath phungṭhen shunga mikanei hongchang roh khana Bethlehema rahming inthang hongchang roh.

¹²RŌNGPU’n hiva nuhngâknua inphut apek sik che sahei khan nang innshung kha Judah leh Tamar hei sapa Perez innshung kapōa syem hei rasoh.”

¹³Khava jâra Boaz in Ruth kha anuhmei sik a a-inna aṭhōi jo. RŌNGPU’n vâng apek a achung kahrik a sapa inkhat anei jo.

¹⁴Nuhmei he’n Naomi hneng anti, “RŌNGPU manpâk a om rasoh! Nang ka-ensui sik a tupa inkhat tuning apek jo che. Naipangpa hi Israel shunga rahming inthang hongchang rasoh!

¹⁵Nahmōinu’n lungset a arôn che, khana sapa 7 hei tatlo sik kanek a ama’n atlochet a kae. Nahnenga hringkhōther anikapek sik leh nater pha nakahrung sik a, tupa inkhat apek jo che.”

¹⁶Naomi’n nai kha aloa, apomtlit a kae, khana arazen kaṭha a kae.

¹⁷A-inn vena nuhmei he’n pasenai rahming kha Obed tia anphō jo. Anmani’n mi rakip hneng, “Naomi’n sapa inkhat anei jo,” tia anhri. Obed hi Jesse pa hongkachang, Jesse hin David pa kae.

¹⁸Hivahi Perez inphut David katlunga innshung hrui kae: Perez, Hezron, Ram, Amminadab, Nahshon, Salmon, Boaz, Obed, Jesse khana David kae.