Read Komrem SAMUEL INKHATNA 1 Bible Online

SAMUEL INKHATNA 1 - Komrem bible

SAMUEL INKHATNA 1

¹Ephraim tlângram shunga Rama inti khōpuia aka-om Ephraim phunga inphut Elkana inti mi inkhat leika-om. Ama kha Elihu tupa khana Jehoram sapa kae, Zuph phungṭhena Tohu innshung mi kae.

²Elkana hin nuhmei 2 amanbo hei. Hannah leh Peninnah kae. Peninnah hinchu sa anei, tâk Hannah hinchu sa neimak.

³Akum katai Elkana hin Rama a inphut Shiloa Chunghnung RŌNGPU kamukna leh inthoina tōkna sik a kase ri, khana khan Eli sapa 2 hei Hophni leh Phinehas hei kha RŌNGPU thempu inṭanga leika-om hei.

⁴Elkana hin inthoina ran atōk kataia, ran hme kha a nuhmei Peninnah hneng chen inkhat khana asahei seng sik a chen inkha-khat asempek hei.

⁵Khana Hannah kha alungset hêr ravâng chen inkhat rōk apek ri, ajârchu RŌNGPU’n sa mannei mak a kae.

⁶Ama in-erpuinu, Peninnah khan ama kha RŌNGPU’n sa amannei mak jâra, êngset leh hnōisetak a atloa kae.

⁷Hing’hin akum akum kha leikathleng jo; anmani RŌNGPU inna anse pha, Peninnah hin Hannah kha khang hrep a amalung manhōi pek mak a, kaṭap a heite sâkri mak a kae.

⁸Apuise Elkana khan ader, “Hannah, heisa mo akaṭap che? Heisa mo bu nasâk mak? Heisa mo namalung ahei tik a akana? Sapa 10 kanei kanek a ke’n nang jôk kamandon che changmak mo?”

⁹Ni khat hin, Shiloa RŌNGPU inna bu ansâksō lim leh Hannah kha kangirsōt jo. Amalung kana reia rahnak a kaṭap a RŌNGPU hneng aleider. Khava pha khan, Eli thempu kha kot kunga a’n-ongna chunga le’n onga kae.

¹¹Hannah’n ka-ôrtak a intepna inkhat aneia, “Ô Chunghnung RŌNGPU, nasōknu inrengna hi jōng enroh, ajōng mandon roh! Amahngi mak roh! Sapa inkhat napek eng inchu, ahringkhō katlung bit a ke’n ama kha nahnenga katōk sik tia intep eng, khana asam ep hêrmak ning.”

¹²Hannah’n pha kasôttak RŌNGPU hneng ader manjōm, khana Eli’n amanu ahner makhap kha a-ena kae.

¹³Amanu’n rasa sōkloa derna anei, ahner chu inhling, tâk ṭongsōt mak a kae. Khava jâra Eli’n amanu kha ju inrui kae tia amandon,

¹⁴Khana ati, “Naju inrui malârna kha bâng jo roh! Naju inrui kha bâng ina hlimseng jo roh.”

¹⁵“Changmak, kei ju inruimak eng, apu,” tia amasôn. “Kei ju inmak eng! Kei malung inreng mi eng kae; kei derna kanei kae, ka’nrengna RŌNGPU hneng kabun mathlâk kae.

¹⁶Kei hi nuhmei hnemna kase inkhat a amandon mak roh. Hinga ke’n derna kaneina ajârchu kei hi hinghrep a kamalung inrenga kae.”

¹⁷Eli’n ati, “Malung kamōnga se jo roh, Israel Pathen in naderna kha pek che rasoh.”

¹⁸Amanu’n amasôn, “Nang in ahei tik a lungset a amandon roh.” Khava sōa amanu kase jo, bu ajing asâk jo, amalung inreng nôk mak joa kae.

¹⁹Ajîng kania jîngkâr hmatak a Elkana leh a-innshung mi kathōi heia, RŌNGPU ankamuk sōa Rama a an-innting inle jo hei. Elkana in a nuhmei Hannah kha rakhum a’nchunpuia, RŌNGPU’n amanu derna amasôn pek joa kae.

²⁰Khang’khan Hannah kha nai avona, sapa inkhat anei jo. Amanu’n arahming Samuel ati, ahri manchênna, “Ke’n ama hi RŌNGPU hnenga inphut kadersōt kae,” ati.

²¹Elkana leh a-innshung mi Shiloa RŌNGPU hnenga kum a inthoina leh ama intepna ahlopdet a inthoina tōkna sik a pha kha kahong nôk jo.

²²Tâk hiva pha a hin Hannah chu semak jo. Apuise hneng ahri, “Naipang hi alendet pha leh ke’n ama RŌNGPU inna ahringkhōa aka-omthang sik a kaṭhōi sik jo.”

²³Elkana’n amasôn, “Kaṭha jo, namandonna kha tlo jo roh; navei manlenmak kârseng inna om jo roh. RŌNGPU’n na’ntepna kha pui mathluk pek che rasoh.” Khava jâra Hannah kha inna ka-oma asapa aveia kae.

²⁴Avei manlendet pha, Shiloa aṭhōi jo, sehratche kum 3 katluk jo inkhat leh jâmdi kilograme 10, khana ju kasiptak shavunpeng inkhat leh. Amanu’n Samuel kha anaipang chang laia hin Shiloa RŌNGPU inna aṭhōi jo.

²⁵Sehratche kha anthatsōa, naipang kha Eli hnenga anṭhōi manhlut jo.

²⁶Hannah’n ahnenga ati, “Apu, arangei roh. Namandonsōt eng mo? Kei hi vōi khat hinahin akangira RŌNGPU hneng akader nuhmei eng kha kae.

²⁷Hiva naipang sik a kaleider kae, khana ke’n kaleider kha apek jo eng.

²⁸Khava jâra ke’n ama hi RŌNGPU hneng katōksōt kae. Ahring lai seng RŌNGPU ta akachang sik kae.” Khava sōa anmani khava hmun a RŌNGPU ankamuk jo.