Read Komrem SAMUEL INKHATNA 12 Bible Online

SAMUEL INKHATNA 12 - Komrem bible

SAMUEL INKHATNA 12

¹Khava sōa Samuel in Israel mipui hnenga ahri, “Tlo roh nantati kha ke’n katlo jo. Nanvai karôn sik a reng inkhat kapek jo chei,

²tûnchu nankaching sik a ama nannei jo. Kei chu, kater jo eng khana kasam kabang jo, kasapahei chu nankâra ka-om hei. Ke’n karether chang laia inphut tûn katlung nanhlam kakei hongkachang jo eng.

³Kei hin ka-om jo eng. Heikhat kaṭhena a-om inchu, tûn RŌNGPU leh akadeisōt rengpa hmaikunga amaher ruh. Ke’n tu inkhat sehrat pui leh shakōrtung kalo jo mo? Ke’n tu inkhat kahōn achangmak leh kasuk manrim aka-om mo? Ke’n tu inkhat a marûk a sêr kalo aka-om mo? Ke’n heikhat kalôna a-om inchu, kaleilo kha ke’n kapek male sik.”

⁴Mipui he’n anmasôn, Changmak, nang in ahōn mak che, asuk manrim mak che; tu inkhat neinâk heikhat lomak che.”

⁵Samuel in amasôn hei, “Ke’n ṭhenakase kachangna nanhmusōtna eng kha tuning RŌNGPU leh akadeisōt reng in sâkhi jo hei kae. Anmani’n anmasôn, “Kadik, RŌNGPU’n nisâkhi kae,” anti.

⁶Samuel in amanjōm a, “Egypt ram a inphut nanpusōn ankaṭhōisōt Moses leh Aaron indeisōt kha RŌNGPU kha kae.

⁷Tûn nan-omna khan ngir ruh, nangni leh nansōn nanpâr hei hukna sik a RŌNGPU’n atlosōt jo ṭōn kahrat rakip mandonsōtna chei vânga hin RŌNGPU hmaikunga themmô kapek sik chei.

⁸Jacob leh a-innshung he’n Egypt a anselai khana Egypt he’n ansuk manrim hei lai, nanpusōn he’n inthōpui derna RŌNGPU hneng kapeng hei, khana ama’n Moses leh Aaron atir hei, khana anmani’n Egypt a inphut anhei ṭhōisōt heia hiva ram a hin aman om hei.

⁹Tâk mipui he’n RŌNGPU an-Pathen kha anmahngi jo, khava jâra ama’n Philistihei kha, Moab reng leh Hazor khōpuia rehlam kakeipa Sisera kha nanpu sōnhei chunga re ajōng mantlo hei khana amantor hei.

¹⁰Khava sōa RŌNGPU hnenga inthōpuina kader a kapeng heia anti, ‘Keini kaset jo ung, ajârchu nanga inphut inhe jo ung, RŌNGPU, khana Baal leh Astarte limhei kankamuk jo hei. Kan-inrepui heia inphut ahuk roh, nang kankamuk sik che!’

¹¹Khana RŌNGPU’n Gideon, Barak Jephtha, khana achaina pena kei ajōngtir eng. Keini inkhat et in nankadōi heia inphut kanhuk chei, khana nangni kamōng tak a ka-om chei.

¹²Tâk-kha Ammon Reng Nahash in nangni buhlu sik a atlo kha nanhmu pha, RŌNGPU kha nanreng inkhat a lomak cheia kei hneng nanhonghri, ‘Keini’n kanvai karôn sik a reng inkhat kanmadu.’

¹³“Tûnchu nantakadei reng kha hin ka-om jo; ama sik a derna nannei, khana tûnchu RŌNGPU’n ama hi nanhnenga apek jo chei.

¹⁴RŌNGPU nan-Pathen kha nankaja a, nanrajena, aṭong narangeia, aṭongpek nanjuia, khana nangni leh nanreng in nanjui inchu, nanchunga heirakip inzen sik.

¹⁵Tâk-kha RŌNGPU ṭong nanrangei mak a aṭongpek nanjuimak a achang inchu, ama’n nangni leh nanreng chunga adōi sik chei.

¹⁶Khava jâra nan-omna hmun a ngir ruh, RŌNGPU’n atlo sik ṭōn kalenhei kha nanhmu sik.

¹⁷Hivahi khōchar pha kae, changmak mo? Tâk ke’n derna kanei sik, RŌNGPU’n khō inphe leh khō ajōng mansur sik. Hivahi asōk pha, nangni’n reng inkhat nantader kha RŌNGPU dōina setna kalentak nantlo jo tia nanhong manhret sik.”

¹⁸Khava jâra Samuel in derna anei jo, khava ning bât khan RŌNGPU’n khō inphe leh khō ajōng mansur jo. Khava sōa chu mi rakip in RŌNGPU leh Samuel kha anṭit jo hei,

¹⁹khana Samuel hneng anti, “Apu, lungsettak a keini kanthimakna sik a RŌNGPU na-Pathen hnenga aderpek roh. Tûnchu kanmanhret jo, kansetna alak-hei chunga reng inkhat kandera setna kantlo jo.”

²⁰Samuel in amasôn hei, “Ṭitmak ruh. Khang khava ṭhatmak kha nantlo jo ravâng, RŌNGPU a inphut inhe mak ruh, tâk nanmalung pumpuia ama razen ruh.

²¹Akadik mak pathenhei kahnung juimak hei ruh; inthōpui tor mak hei chei ning khana ahuk tor mak hei tin, ajârchu anmani kha akadik khet changmak hei.

²²RŌNGPU’n inthenga intepna anei, nangni dahlon mak chei ning, ajârchu nangni hi ama mi manchang sik cheia intluk a kae.

²³Kei sik a chu, nangni sik derna neiloa oma, ama dōina setna tlo sik hi RŌNGPU’n ahnōm pek mak a kae. Khava kanek a, akaṭha leh akadik nantatlo sik kha kamanthei sik chei.

²⁴RŌNGPU ṭong jui ruh khana nanmalung pumpuia taksentak a ama razen ruh. Nangni sik a ṭōn kalen atlo hei kha mandonsōt ruh.

²⁵Tâk setna kha khanga nantlo’nchu, nangni leh nanreng suk manhmang sik chei kae.”