Read Komrem SAMUEL INKHATNA 13 Bible Online

SAMUEL INKHATNA 13 - Komrem bible

SAMUEL INKHATNA 13

¹Saul in reng arôn manphut a khan ama pui katluk mi kachang jo khana kum hni Israel a vai aleirôn.

²Saul in mi 3,000 akadei hei, mi 2,000 ama leh inṭhōia Bethel tlânga Michmash a ada hei, mi 1,000 chu asapa Jonathan leh inṭhōia Benjamin phunghei ram shunga Gibeah a atir hei. Alakseng chu Saul in innting atir male jo hei.

³Jonathan in Geba a ka-om Philisti rehlam kakei athat jo, khana Philisti rakip anthei jo. Khava pha ram pumpuia pengkun antum leh re katlo sik Hebrewhei kabek sik a Saul in tirle atir hei.

⁴Israel mi rakip hnenga Saul in Philistihei rehlam kakei athat jo hei khana Philisti he’n anhōt jo hei ti hi anmanthei hei. Khava jâra mipuihei khan Gigal a Saul kajuia va’nvei sik kha kahnōm jo hei.

⁵Philistihei, Israelhei re tuk sik a intûp jo hei; anmani’n re shakor gâri 30,000, shakor kachōng 6,000, khana ke remi antamdân kha tui-ôngpui panga nêrdi ja kapōa katam hei. Philistihei kha Bethaven nisōtinga Michmash a kase heia rephōr anva matung jo.

⁶Khava sōa Israelhei chunga inhnaktak a anbuhlu jo hei, malung inhmaktak a anda jo hei. Israel ṭhahrep chu khur kōk a hlungkōk a a-emak leh hlungpui kâra, tuikhur shung heia inthup jo hei;

⁷alak he’n Jordan re kake heia Gad leh Gilead ram shunga katlân jo hei. Saul chu Gilgal a laka-om ṭhak, khana amale aka-omsap mihei kha kaṭi heia innok jo hei.

⁸Samuel in amanthei kapōa, ama’n Samuel kha ni 7 aleihngâk a kae, tâk Samuel kha Gilgal a tûn katlung lahong mak. Mipui he’n Saul kha andahlon manphut jo,

⁹khava jâra ama’n ati, “Kahnenga ro-inthoina leh inloikhômna inthoina sik kha heichoi ruh.” Ama’n ro-inthoina kha atōksōt jo,

¹⁰achai sik ting khan Samuel hong katlung jo. Saul kha Samuel inhmupui sik leh inhlâng sik a leikasōk,

¹¹tâk Samuel in ati, “Heimo natlo jo?” Saul in amasôn, “Mipui in andahlon jo eng, khana kahong sik eng natina pha khan hongmak jo che; khava chung nôk a, Philistihei Michmash a intûp jo hei.

¹²Khava jâra kamandon, ‘Philisti he’n Gilgal a hin re anheituk sik jo eng, khana kei chu RŌNGPU a inphut lungset chenna sik lader mak eng. Khava jâra inthoina kha ke’n katōk sik jo kasōk tia kamandona kae.”

¹³Samuel in amasôn, “Khavakha akamo ṭōn kae.” RŌNGPU na-Pathen ṭong pek che kha juimak jo che. Naleijui inchu, nang leh nasōnhei Israelhei chunga ahei tik a vai amanrôn sik che kae.

¹⁴Tâk nang vairôn hi injônmak jo ning. Ajârchu nang in ama juimak jo che, RŌNGPU’n ami madu ajong sik jo khana amihei vaikarôn asyem sik jo.”

¹⁵Samuel in Gilgal adahlona ahlam ajōn jo. Mipui alakseng in Saul in aremihei inthōpui sik a ase pha anleijui jo. Anmani Gilgal a inphut Benjamin ram a Gibeah a kase hei. Saul in aremi a-en hei chun, pase 600 kapō ka-om hei.

¹⁶Saul leh asapa Jonathan, khana anmi he’n Benjamin ram a Geba khōa rephōr anmatung jo; Philistihei rephōr kha Michmash a ka-om.

¹⁷Philisti remihei khan rup thuma re kasō kasōk hei: rup khat in Shual ram a Ophrah ting kase hei,

¹⁸rup inkhat in Beth Horon ting kase hei, alak inkhat khan Zeboim Phaicham leh ramthip hmun a ramri ting kase hei.

¹⁹Israel ram shunga thir kakheng inkhatbek om mak hei ajârchu Philisti he’n Hebrewhei hi chemjâm leh kasei ansyem makna sik intluk heia kae.

²⁰(Israel he’n lôngkhum, katute, hreicha, khana kôite kalo sik a Philistihei hneng akase ri hei kae.

²¹Hreicha inkhat manngeina leh sehrat khimna thir injûm syem mantherna man kha dangka her inkhat anlo khana lôngkhum leh katute syemna kha dangka 2 anlo.)

²²Hiva jâra retlo ning chu Saul leh Jonathan tei loa chemjâm leh kasei kachoi tûte om mak jo hei.

²³Philisti he’n Michmash rakanna hlam kha khârna sik a remi rup khat antir heia kae.