Read Komrem SAMUEL INKHATNA 15 Bible Online

SAMUEL INKHATNA 15 - Komrem bible

SAMUEL INKHATNA 15

¹Samuel in Saul hneng ati, “Ami Israelhei reng sik a nachunga thai manthina sik a RŌNGPU’n ajōngtir kha kei eng kae. Tûn Chunghnung RŌNGPU ṭonghri kha rangei roh.

²Ama’n Amalek mihei kha akarâk sik jo hei kae ajârchu Israel he’n Egypt a inphut anheisōklai anpu sōnhei khan anleidōi heia kae.

³Se ina Amalek-hei vabuhlu hei ruh khana annei rakip suk manhmang pek hei ruh. Heite inkhat dahlon mak ruh; pase, nuhmei, naipang, khana naidông rakip khana ran kemōng, sharîngsei leh shakōrtung rakip thatpet hei ruh.”

⁴Saul in aremihei abek mantûp heia Telem a a-enmansin hei: Israel a inphut remi 2,00,000 khana Judah a inphut remi 10,000 leika-om hei.

⁵Ama leh amihei kha Amalek khōpuia kase heia tuidung chârna shunga anhlō hei.

⁶Israel he’n Egypt a inphut anheisōk pha lungset a aleikatlo mipui, Kenhei hneng chu gîkna aleipek hei: “Sesōt ruh Amalek-hei kha dahlon hei ruh, anmani leh inṭhōia kathat makna sik chei.” Khava jâra Kenhei kha kasesōt jo hei.

⁷Egypt nisōa Havilah leh Sur kâra re intuk heia Saul in Amalek-hei kha ator jo hei;

⁸Amalek-hei Reng Agag kha kahringa asura mipuihei khachu athatsō hei.

⁹Tâk Saul leh ami he’n Agag hringkhō chu anṭhensōt jo khana kemōng, ran, sete leh kemōngte akaṭhapen khana ran akaṭha rakip hei chu leithat mak hei; hmangna kase leh hnemna kasehei rōk kha ansuk manhmang hei.

¹⁰RŌNGPU’n Samuel hneng ati,

¹¹“Saul reng kamanchang hi kamalung hōimak jo; keia inphut inhesōt a khana kaṭong pek juimak jo.” Samuel kha ahnuk kana jo, jânsôt RŌNGPU hneng ngekna aneia kae.

¹²Abâna jîngkâr hmatak Saul kajong sik kasōksōt jo. Saul kha ama abinga mandonsōtna sik inn asakna, Carmel khōpuia vakasea Gilgal ting kase thang jo tia ṭong aleithei.

¹³Samuel kha Saul hneng katlunga ama’n chibei aleipek a, “RŌNGPU’n mahâmṭhat pek che rasoh, Samuel! Ke’n RŌNGPU ṭong kajui jo,” ati.

¹⁴Samuel in ader, “Chu achang inne, heisa mo sehei leh kemōnghei inhrâm rasa kathei?”

¹⁵Saul in amasôn, “Kami he’n Amalek-heia inphut antachomsōt kae. Anmani’n kemōng leh se akaṭhapen hei RŌNGPU na-Pathen hneng inthoina tōk sik a antada hei kae, alakseng chu kansuk manhmangsō pet jo hei.”

¹⁶Samuel in ṭong apek a, “Naṭong hri bâng roh, jân a khan RŌNGPU’n heimo ahri kha manthei che rong.” “Amanthei roh,” Saul in ati.

¹⁷Samuel in amasôna, “Nang in nabinga apui karôn inkhat a na’ndonmak inum, nang Israelhei hlamkakei che kae. RŌNGPU’n Israelhei reng sik a thai amanthi che kae,

¹⁸Mikaṭhamak Amalek-hei kasuk inhmang sik a ṭongpekna leh inṭhōia aleitir che. Anmani nathatsōmak kârseng re natuk sik a ahri pek che.

¹⁹Kha achang inchu heisa mo aṭong najuimak. Heisa mo neinâk chom sik a akatlân inhlut che, khanga RŌNGPU tlai makna sik kha natlo?”

²⁰Saul in amasôn, “Ke’n RŌNGPU ṭong kajui. Aman theina eng dungjuia kei kase eng, Reng Agag kaheiṭhōi, Amalek-hei ankhenga kathatsō hei.

²¹Tâk kami he’n antalo kemōng leh se akaṭhapen hei kha that mak hei; khava kanek a, RŌNGPU na-Pathen hnenga inthoina tōk sik a Gilgal a hin anheiṭhōi hei.”

²²Samuel in ati, “Khō kha mo RŌNGPU’n amadu: ṭongjui mo a-emak leh tōkna leh inthoina mo? Ahnenga kemōng kaṭhapen inthoina natōk kanek a chu aṭong najui kha kaṭha jôk.

²³Ama inrepui hi, dôi kachoihei kapōa ṭhamak, khana êngset hi syemlim kamukna kapōa setna kae. RŌNGPU ṭongpek nahlon sōt jâra, ama’n nareng changna alosōt pek jo che.”

²⁴Saul in amasôn, “Ôk, kaset jo eng. Ke’n RŌNGPU ṭongpek leh nang mansena juimak jo eng. Ke’n kamihei kaṭit heia anmani tamadu kaleitlo jo.

²⁵Tâk tûnchu nahnenga kader che, kasetna arangei mandam roh, RŌNGPU kha kakamuk theina sik a kei leh inṭhōia inle rih.”

²⁶Samuel in amasôn, “Nang leh inṭhōia inlemak ning. Nang in RŌNGPU ṭongpek nahlon sōt, khana ama’n Israelhei reng changna inphut ahlon sōt jo che.”

²⁷Khana Samuel kha inle sik a inhe jo, tâk Saul in azakkō kasei kha amatua inhler jo.

²⁸Samuel in ahnenga ati, “Tuning Israel rengram kha nahnenga inphut RŌNGPU’n akeihler jo khana nang kanek a akaṭhadet mi inkhat hnenga apek jo.

²⁹Israelhei akalûr Pathen kha maleisei tlomak khana amalung thlengmak. Ama mihring inkhat changmak, amalung thlengmak.”

³⁰Saul in amasôn, “Kei kaset jo eng. Tâk-kha kamipui hlamkakeihei leh Israel rakip hei hmaikunga bekchu kajana anei roh. RŌNGPU na-Pathen kha kamukna kanei theina sik kei leh inṭhōia inle rih.”

³¹Khava jâra Samuel kha ama leh inṭhōia inle jo, khana Saul in RŌNGPU ava kamuk jo.

³²“Reng Agag kha hin heiṭhōi roh,” Samuel in ṭong apek. Agag kha ahnenga kahong, aṭit reia innok jo, abinga amandon, “Thi sik hi heituk a akahōi mak jo mo!”

³³Samuel in ati, “Nang chemjâm in nu katamtak sa neiloa ada hei kapōa, tûnchu nanu kha sa neilo akachang sik jo kae.” Khana ama’n Agag kha Gilgal a maichâm hmating atuk rachen jo.

³⁴Khava sōa Samuel kha Rama a kase jo khana Reng Saul kha Gibeah ting a-inna kase jo.

³⁵Samuel ahring lai seng, rengpa hneng inlârtet mak jo; tâk ama sik a amalung kadong hêr. Saul kha Israelhei reng amanchang kha RŌNGPU amalung hōihêr mak a kae.