Read Komrem SAMUEL INKHATNA 19 Bible Online

SAMUEL INKHATNA 19 - Komrem bible

SAMUEL INKHATNA 19

¹Saul in David thatna sik a aṭōn mantluk kha asapa Jonathan leh aṭōn karôn rakip hneng ahri pek hei. Tâk Jonathan chu David kha arangei hêr,

²khava jâra ahnenga ahri, “Kapa’n nang that sik chea intluk jo. Ajîng jîngkâra inrin ṭhak a om roh, hmun khat a marûk a om roh khana inthup roh.

³Kei kase leh nang inthupna hleipuk a kapa hnenga kangir sik eng, khana nang chungchânga ahnenga kahri sik. Hei-inkhat kamanhret inchu, nang kamanthei sik che.”

⁴Saul hnenga Jonathan in David kha amanpâk a ati, “Apa, nasōkpa David hneng dikmak tlomak roh. Ama’n akadik mak heite nahnenga tlomak; khava kanek a atlo rakip hi nang sik a inthōpuina kalentak kae.

⁵Goliath athat lai ahringkhō manerlo kae, khana RŌNGPU’n Israel sik a torna anei kae. Khan chu heijâra mo ṭhenakase mi inkhat hnenga dikmak natlo hnōm khana ajâr kasea David nathat hnōm?”

⁶Jonathan ṭonghria khan Saul kha amanhnōm jo khana David kha that mak jo ning tia RŌNGPU rahminga intepna anei jo.

⁷Khava jâra Jonathan in David kha abek a heirakip ahri pek jo; khana Saul hnenga aṭhōia hma aleitlo kapōa David in rengpa kha arazen jo.

⁸Philistihei leh re kasōk nôk jo hei. David in abuhlu heia ator jo hei khana leikatlân jo hei.

⁹Ni khat chu RŌNGPU a inphut rathla kaṭhamak khan Saul chunga kachu nôk jo. Akut a kasei achoia a-inna le’n onga ka-om, khana David chu aṭingṭang amanhringa kae.

¹⁰Saul in David kha akasei vânga banga kakhô manbek sik a intluk jo, tâk David kha inchômsōt a kasei khan banga kahlut inphun jo. David chu katlâna kasesōt jo.

¹¹Khava ning jân a David inn kha anhngâk a ajînga jîngkâra anthatna sik a Saul in mi ṭhahrep atir hei. David nuhmei Michal in gîkna apek, “Tuning jân natlânsōt mak inchu ajînga chu kathi sik jo che.”

¹²Thlikot a inphut amanu’n amanṭum a, ama kha katlâna kasesōt jo.

¹³Khava sōa amanu’n inna limsyem inkhat aloa, rakhum chunga ada a, ke hme vânga a’nsyem lukham kha luthlōnting ada a pōn inkhat vâng amakhu jo.

¹⁴Saul mihe’n David kasura anhong pha, Michal in ama kana jo tia amanthei hei.

¹⁵Tâk-kha anmani khet in David kha an-enna sik a Saul in ahei tir male jo hei. Ama’n ṭong apek hei, “Arakhuma inphut hin heiṭhōi ruh, ke’n kathat sik kae.”

¹⁶Anmani innshunga kahlut heia rakhum chunga innshung pathen limsyem inkhat khana aluthlōna ke hme lukham kha anvahmu jo

¹⁷Saul in Michal hneng ader, “Heikhonga mo hing’hin kei nahōn enga ka’nrepui pa kha namasōsōt?” Amanu’n amasôn, “Ke’n ama tlânsōtna kha ka’nthōpuimak inchu athat sik enga ahri jâra kae.”

¹⁸David kha katlânsōt a Rama a Samuel hneng kase jo khana Saul in ahnenga atlo rakip kha ahri pek jo. Khava sōa ama leh Samuel kha Naioth a kase heia vaka-om jo hei.

¹⁹Rama a Naioth a khan David ka-om ti kha Saul hneng anleihri pek jo,

²⁰khava jâra mi ṭhahrep ama kasur sik a atir hei. Samuel hlamkeina thōia, sânkathem rup khat akalâm leh aka-ông hei anvahmu hei. Khava sōa Pathen rathla in Saul mihei chunga kachu heia anmani’m akalâm leh aka-ông anphut jo.

²¹Saul in hivahi athei pha, tirle katam det ahei tir jo hei, anmani kha’m akalâm leh aka-ông anphut nôk jo. Vōithum changna ama’n tirle ahei tir hei, anhnenga khang tlit a leikasōk nôk jo.

²²Khan chu ama khet Rama sik a se aphut jo. Ama tuikhur kalentak Seku intia khan aheitlung pha, khon mo David leh Samuel aka-om hei tia ader hei, Naioth a ka-om hei tia anhri pek.

²³Khava hmun a ase pha, ama kha’m Pathen rathla’n kachu jo, Naioth hlamdunga kalâma ka-ông joa kae.

²⁴Apōn leh ader alosōt a Samuel hmaikunga kalâma ka-ông joa kae, khava ning sûn nilun leh jânsôt akarōkpet a inthlong jo. (Ṭongchîk, “Saul kapha sânkathem ahong kae jo mo?” tina hi hina a’nphut kae.)