Read Komrem SAMUEL INKHATNA 20 Bible Online

SAMUEL INKHATNA 20 - Komrem bible

SAMUEL INKHATNA 20

¹David kha Rama a Naioth khōa inphut katlânsōt a Jonathan hnenga kase jo. Ama’n ader, “Ke’n heimo katlo jo?. Hei ṭhena mo kanei jo? Hei dikmak mo napa chunga katlo joa that sik a amadu eng?”

²Jonathan in amasôn, “Nang nathi sik hi Pathen in hnōm mak! Kapa’n atlona rakip, akakhôk leh akakhôk mak, amanthei eng, hivahi kei hneng thup mak ning. Nahri hi dikmak!”

³Tâk-kha David in amasôn, “Nang in kei heituk a nalungset eng mo ti hi napa’n kaṭhadek a amanhret, aṭōn mantluk kha nang manthei mak sik chea amandon kae, nang malung atônhêr sik ti jâra kae. Akahring RŌNGPU rahminga nahnenga a’ntep eng kae, kathina sik kethon khat rōk ka-om jo!”

⁴Jonathan in ati, “Namadu heikhat kha katlo pek sik che.”

⁵David in amasôn, “Ajing kani khi Thlather Revei kae, kei hi rengpa leh bu kanta sâksap sik kasōk; atip ninga khōhlei katlunga hleipuk a inthup sik eng.

⁶Napa’n busâkna dokhânga ka-om mak amanhret inchu, ka-innshung akhenga sik a kum a inthoina tōkna pha achang jo jâra, inna inranga kase theina sik a ke’n nang hneng hnōm pekna kader chea namanse eng kae tia khan hripek jo roh.

⁷Ama’n, ‘Kaṭha jo,’ ati’nchu kei inhuk sik eng; tâk ahnuk ahong nat jo’nchu, kei suksetna sik a intluk jo ti namanhret sik jo.

⁸Lungsettak a hivahi atlopek roh, khana nang in kei hneng a’ntheng intepna nanei kha anitpek roh. Tâk kaṭhe inchu, nangkhet in athat roh! Heisik a mo napa hnenga anthatna sik eng naṭhōi sik eng?”

⁹Jonathan in amasôn, “Khang khavakha mandonbek um mandon mak roh! Kapa’n nang sukset sik a a’ntlukna kamanhret khet inchu, kamanthei mak sik chea mo?”

¹⁰Khan chu David in ader jo, “Napa’n nahnenga hnuk nattak a amasôn che’nchu tu’n mo kei amanthei sik eng?”

¹¹Jonathan in amasôn, “Hleipukting sesōt rih.” Anmani khanga kase jo hei,

¹²khana Jonathan in David hneng ati, “RŌNGPU Israel Pathen kha eini sâkhia chang rasoh. Ajîng kania leh abân kania hiva phatak a kapa hneng kader sik. Ama omje kha aṭhat inchu., ṭong kahei manrôn sik che.

¹³Ama’n sukset sik chea amandon inchu, khana kahri pek mak chea, kadam senga kamantlânsōt mak che’nchu RŌNGPU’n avōk hlon rasoh. RŌNGPU’n kapa hneng aleiompui kapōa nang ompui che rasoh!

¹⁴Kei kalahring inchu, lungsettak a nang in na’ntepna intheng kha nit roh khana kei lum lona nei roh; tak kei kathi jo’nchu

¹⁵khava lum lona kha ka-innshunga ahei tik a malâr roh. Khana RŌNGPU’n nang inrepuihei asuk manhmangsō phale’m

¹⁶eini khat leh khat intepna kha kōimak rasoh. Akōi jo’nchu, RŌNGPU’n akarâk sik che.”

¹⁷Ave nôk a Jonathan in, ama kha David in alungsetna sik a intepna amannei, ajârchu Jonathan in abinga a’nlungset kapōa David kha alungset a kae.

¹⁸Khava sōa Jonathan in David hneng ahri, “Jîng kani khi Thlather Revei achang jâra bu sâkna na’nveimak inchu inhretseng sik.

¹⁹Ajing bân atip a na’nveimakna kha inhretchet sik jo, khava jâra khan vōi khat na’nthupna khan se roh, khana hlung inbuk panga khan va’nthup roh.

²⁰Ke’n bitin inkhat karadin kapōa, thesang 3 kahei kâpsōt sik hei.

²¹Khava sōa kasōk hnenga se’na va’nlo roh kati sik. Ahnenga hinga, ‘Enroh, thesanghei kha nasira ka-om jo hei; hrut hei roh,’ kati’nchu nang sik ṭhatmak om mak ning tina kae, heikasōk thei che. Nachunga thi leh nat om mak ning, akahring RŌNGPU rahminga intep eng.

²²Tâk-kha ke’n ahnenga “Thesanghei kha nanga inphut hmunlak ting ka-om hei kati’nchu; nang sesōt jo roh; ajârchu RŌNGPU’n atirsōt jo che kae sik.

²³Eini khat leh khat ni-intep chunga hin, eini’n ahei tik a ninit theina sik RŌNGPU’n pui amathluk sik.”

²⁴Khan chu David kha hleipuk a inthup jo. Thlather Rehōia khan, Saul Rengpa kha busâkna kahong jo,

²⁵angaia a’n-ongna bang hnenga in-ong jo. Abner in abâna in-ong, khana Jonathan kha ahmai inhnget a in-ong. David in-ongna chu karōk jo,

²⁶tâk Saul in khava ning chu heite hrimak, ajârchu amalunga amandon, “David chunga heikhat akasōk a beklanga a’nthengmak kae.”

²⁷Abân kani ning, Thlather Revei kahnunga ni khat, David hmun kha karōktlit nôk jo, khana Saul in Jonathan kha ader, “Heijâra mo David jâning um tuning um busâkna akahongmak?”

²⁸Jonathan in amasôn, “Ama’n Bethlehema sena sik a kei hneng ader eng.

²⁹Ama’n, ‘Amanse roh, ajârchu ka-innkō he’n khōpuia inthoina tōkna antlo sik, khana ka-u he’n hong ngar roh tia ṭong anheipek eng,’ ati. Khava jâra ama nadokhânga ahmun alo mak kae.”

³⁰Saul kha Jonathan chunga ahnuk kana hranghra jo khana ati, “Nanu kha heituk a racham kase leh taksenthei akachangmak mo! Tûnchu nang in David kha nasan kha kamanhret khana nabinga leh nang nu kha hmaimôk napek jo!

³¹David ahring lai seng nang in hiva ram reng chang hêrmak tin ti hi manhret mak che mo? Tûn se roh, hin heiṭhōi roh, ama akathi nger sik kae!”

³²Jonathan in amasôn, “Heisik a mo akathi sik? Heimo atlo jo?”

³³Khan chu, Saul in Jonathan kha thatna sik a akasei vâng aheikakho jo, khan chu apa’n David kha that nger sik a amantluk jo ti hi Jonathan in amanhretsōt jo.

³⁴Jonathan ahnuk kana hêra dokhânga inphut kangirsōt jo khana khava ning heite sâk mak jo, khava thlather Revei ni 2 tluk ning khan. David jâra amalung kachâm hranghra jo, ajârchu Saul in inzak apek joa kae.

³⁵Abâna jîngkâra David leh an-inhnōmna dungjuia, Jonathan kha David inhmupui sik a hleilai ting kase jo. Rether naipang inkhat a’nṭhōi

³⁶khana ahnenga ahri, “Tlân ina thesang kakâp sik hei hi vajongsōt hei roh.” Retherpa kha atlân pha ama kakhe chet a Jonathan in thesang inkhat akâpsōt a kae.

³⁷Retherpa khan thesang tlâkna hmun kha aphâk pha, Jonathan in retherpa hneng ka-ônga, “Thesang kha akahladet a ka-om!

³⁸Khan ngir hnâm mak roh! Inrang roh!” ati. Retherpa khan thesang kha aloloia akapu hneng hong inle jo,

³⁹khahei seng kha heitina mo ti manhret mak; David leh Jonathan rōk in anmanhret a kae.

⁴⁰Rether naipang hnenga Jonathan in are hmangchâk-hei kha apek a khōpuia aleichoi malena sik ahri pek.

⁴¹Rethernai kha asesōt jo pha, hlung inbukna panga inphut David kha hong kasōk, amarkhup athlep a vōi 3 raleia ahmai abia kae. Ama leh Jonathan injôp heia kaṭap jo hei; David malung inrimna kha Jonathan kanek um akhe hêr jo.

⁴²Khan chu Jonathan in David hneng ahri, “RŌNGPU’n ompui che rasoh. Eini khat leh khat kâra a’ntheng intepna nineina kha, nang leh kei kâra, nang sōn leh kei sōnhei kâra, ahei tik a ninitna sik RŌNGPU’n pui mathluk rasoh.” Khava sōa David kasesōt jo; Jonathan kha khōpuiting inle jo.