Read Komrem SAMUEL INKHATNA 23 Bible Online

SAMUEL INKHATNA 23 - Komrem bible

SAMUEL INKHATNA 23

¹Philisti he’n Keilah khō re antloa antalōk ther sâng anchomsō jo ti hi David in aleithei.

²Khava jâra David in RŌNGPU hneng ader, “Philistihei re kasō sik akase sik eng mo?” RŌNGPU’n amasôn, “Ôk. Buhlu hei roh khana Keilah kha huk roh.”

³Tâk-kha David mihei khan anti, “Judah a hin ṭit sik katluk a ninei; Keilah a nisea Philistihei nivasōrep he’nchu kakhôk chet sik jo!”

⁴Khava jâra David in RŌNGPU hneng ṭong ader nôk, khana RŌNGPU’n ahnenga ati, “Se roh Keilah vasō roh, ajârchu Philistihei chunga torna kapek sik che.”

⁵Khava jâra David leh amihei kha Keilah a kase heia Philistihei anvasō jo hei; mi katamtak anthat hei khana anranhei anchom heia kae. Khanga kae David in Keilah ahuksōt kha.

⁶Ahimelech sapa Abiathar khan atlânsōt a khana Keilah a David hneng avahlut pha, thempu invona zakkō kabong kha ahei choia kae.

⁷Keilah a David kase jo ti ṭong kha Saul hneng anhri pek jo, ama’n ati, “Pathen in karatha neina thōia ada jo. Khōpui bang ka-om leh rekur kot aka-om khōpuia David kasea abinga chânga in-ôk jo.”

⁸Khava jâra Saul in re katlo sik a, Keilah a sea David leh amihei katuk khum sik a aremihei abek jo hei.

⁹Saul in ama chunga buhlu sik intluk jo ti kha David in athei pha, thempu Abiathar hneng ati, “Thempu von zakkō bong kha hin heichoi roh.”

¹⁰Khava sōa David in ati, “RŌNGPU Israel Pathen, nasōk kei jâra Saul in Keilah a jōnga suk manhmang sik tia a’ntlukna kha kathei jo.

¹¹Keilah mihe’n Saul kut chunga kei hi antapek sōt sik eng mo? Ke’n ṭong kathei kapōa Saul kha akahong khet sik mo? RŌNGPU Israel Pathen, amasôn roh tia kader che!” RŌNGPU’n amasôn, “Saul kajōng sik.”

¹²David in avea ader nôk, “Keilah mihe’n kei leh kamihei hi Saul kut a antapek sōt sik ung mo?” RŌNGPU’n amasôn, “Anpek sōt sik chei.”

¹³Khava jâra David leh amihei 600 kapō hei kha Keilah andahlona khanga kasesōt jo hei. David kha Keilah a inphut katlânsōt jo ti hi Saul in athei pha, aṭōn mantlukna kha kahai jo.

¹⁴David kha tlângrama inthup a ka-om, Ziph hnenga ramhânga. Saul in ama kha surna sik a intluk ṭhak, tâk Pathen in David kha akut a pek sōt mak a kae.

¹⁵David in ama kathat sik a, Saul jōng kakōn ti hi amanhret. David hi Ziph hnenga ramhâng, Horesh a leika-om.

¹⁶Khana khan Jonathan in ahnenga kasea Pathen hrungna ahrimanhnet pek a avamathok,

¹⁷ahnenga ati, “Ṭitmak roh. Kapa Saul in kahmei masōk mak tin che. Israelhei reng kha nang che kae ti hi leh nang thōia kei ka-om sik kha ama’n amanhret.”

¹⁸Anmani 2 ṭhōn inchangna a’ntheng intepna annei joa kae. David kha Horesh a ka-oma, Jonathan kha a-innting inle jo.

¹⁹Ziph a mi ṭhahrep in Gibeah a ka-om Saul hneng kase heia anvahri, “David kha kanram Judah ramhâng thlâng tinga Hachila Tlânga Horesh a inthup a ka-om.

²⁰Akalûr Reng, nang in heituk a ama nasurhnōm mo ti hi kamanhret; khava jâra kanrama hong roh; nasur ngerna sik kantlopek sik che.”

²¹Saul in amasôn hei, “Nanilungset hêr jâra RŌNGPU’n mahâmṭhat pek chei rasoh!

²²Vōi khat nôk se ina vamanchên ruh; khon mo aka-om khana tu’n mo ahmu vamanchên ruh. Ama mi kaliptak kae tia ke’n kathei.

²³A’nthupna tak kha manhret ruh, khana inrangtak a kei hneng ṭong pekna sik a tlo ruh. Khan chu nangni leh kei kase sik me, khan ama khava ramkei shunga a-om inchu, Judah ram pumpuia achang inum kamanlōi sik kae.”

²⁴Khava jâra ama anhei dahlona Saul hongmak hma Ziph a he’nle jo hei. David leh aloihei kha Judah ramhânga thlâng ṭhen shunga phai kachâr, Maon ramhâng thōia ka-om hei.

²⁵Saul leh amihei kha David kajong sik a kasesōt hei, tâk ama’n khavakha atheia Maon ramhâng thōia hlung hmebunga kasea vaka-om jo. Hivahi Saul in athei pha, David kajonga kase jo.

²⁶Saul leh amihei kha tlângpang inkhat ting ka-om hei, lang khat ting aka-om David leh ami heia inphut ahlop a ka-om hei. Anmani kasur sik a anlangting kahong heia inhnai jo hei, Saul leh ami heia inphut tlânsōtna sik a inranga intluk jo hei.

²⁷Khava laitak tirle inkhat heikatlunga Saul hnenga ati, “Inrangtak a hong inle roh! Philisti he’n ram hi anbuhlu jo!”

²⁸Khava jâra Saul in David amanlōi kha kahai jo, Philistihei re katuk sik a kase jo. Hiva jâra ahmun kha Inṭhenna Hmebung anti jo.

²⁹David in ahmun kha adahlona Engedi ramkeiting kasea va’nthup jo.