Read Komrem SAMUEL INKHATNA 24 Bible Online

SAMUEL INKHATNA 24 - Komrem bible

SAMUEL INKHATNA 24

¹Saul in Philistihei re avatuksōa ahe’nle pha, David in Engedi ramhânga aka-om kha anmanthei jo.

²Saul in Israel shunga remi kahrângpen 3,000 aṭhōi heia David leh amihei kajonga Sharja Hlungpuia nisōting kase hei.

³Ama kha hlam sira kemōnghei kur hnenga hlungkhur shunga, te akasōk sik a kahlut jo. Hinga leikasōk jo, hlungkhur shung khan David leh ami he’n amak hma a khan ale’nthupdek jo hei kae.

⁴Aloi he’n ahnenga anti, “Hivahi nang sik pha kaṭha jo kae! RŌNGPU’n na’nrepuihei kha naratha hratna thōia kada sik hei ati kae; khana namadu hrep kha ahnenga natlo thei jo.” David kha inchômsōt a Saul manhret loa azakkō hmor atuktanpek jo.

⁵Khava sōa David mandon ṭhen theina khan ama malung jôk asuk manbōi jo,

⁶amihei hneng ati, “RŌNGPU’n reng inkhat a akadeisōt jo, kakapupa chunga suksetna heikhat katlo makna sik a RŌNGPU’n aṭhensōt rasoh! Ama rōk chu sukset mak rong, ajârchu ama hi RŌNGPU takadeisōt reng kae.”

⁷Khang’khan ami he’n Saul kha re antukmakna sik a amanhnōm jo hei. Saul kha indinga, hlungkhur kha adahlona ahlam se aphut jo.

⁸Akahnunga David in ajuia abek, “Akalûr Reng!” Saul kha hong inhe, ama kajana pekna David in raleia inkuna

⁹ati, “Ke’n nang kasuk manset sik che tia mihei ṭong kha heisa mo narangei?

¹⁰Tûntak khan hlungkhur shunga RŌNGPU’n nang kei ratha hratna thōia ada jo che kha nabinga namanhret thei sik. Kami ṭhahrep he’n nang that sik a anmanse eng, tâk nang sik a kamalung inrima kati, sukset mak che rong ajârchu RŌNGPU’n reng sik a akadeisōt inkhat che kae.

¹¹Apa, ke’n kamatu napōn hmor hi enroh! Kathat tor jo che kae, khava kanek a hirōk hi katansōt kae. Hivahin namanhret thei sik khachu ke’n nachunga redōi sik a, sukset sik a intluk mak eng ti kha. Ke’n heite nahnenga dikmak katlomakjen ravâng, nang inchu that sik a namanlōi enga kae.

¹²Eini kâra tu mo akaṭhe me RŌNGPU’n ṭong tan rasoh! Kei kadōia naṭōntlo jâra khan Pathen in karâk che rasoh, ajârchu ke’n nang sukset mak che eng.

¹³Ṭong marōa a’nhri kha namanhret, ‘Ṭhatmak hi mikaṭhamak rōk in atlo.’ Khava jâra ke’n sukset mak che ning.

¹⁴Israel reng in that sik ati mi kha enroh! Ama’n ahnong kha enroh! Ui kathi, uihrik hrep kae!

¹⁵RŌNGPU’n ṭong atan sik, eini kâra tu mo akaṭhe me, ama’n ṭong amathlâk sik. Hiva ṭong kasōk hi ama’n ensin rasoh, ahrung rasoh, khana nanga inphut kei ahuk rasoh.”

¹⁶David in ṭong ahrisō pha, Saul in ati, “David kasapa, nangkhet che mo?” Khana ama ṭap aphut jo.

¹⁷Khava sōa David hneng ati, “Nang kadik che, khana kei dikmak eng. Ke’n nachunga khava dikmak katlolai khan, nang chu kachunga kaṭha hêr che!

¹⁸Tuning kei chunga heituk-hrep akaṭha che mo ti kha namalâr jo, ajârchu RŌNGPU’n naratha neina thōia ada jo eng kapha, nang in athat mak che.

¹⁹Heituk mo mi inkhat in a’nrepui asura khana sukset loa amasō ṭhak sik? Tuning kei hneng natlona jâra khan RŌNGPU’n vâng pek che rasoh!

²⁰Nang Israelhei reng hongkachang sik che khana nang vairôn thōia rengram hi aka-om sik kae tia tuning hin kamanchên jo.

²¹Tâk kei leh ka-innshung rahming mahngia a-om makna sik, kei sōnhei chu ṭhensōt sik heia RŌNGPU rahminga kahnenga intep roh.”

²²David in katlo sik tia le’ntep jo. Khava sōa Saul kha inna inle jo, khana David leh ami he’n an-inthupna hmun a inle jo hei.