Read Komrem SAMUEL INKHATNA 25 Bible Online

SAMUEL INKHATNA 25 - Komrem bible

SAMUEL INKHATNA 25

¹Samuel kha kathi jo, khana Israel rakip intûp heia ama sik a ṭajai ansuia kae. Khava sōa Rama a a-inna anvûm jo. Hivasōa, David kha Paran ramhânga kase jo.

²Maon khōpuia inphut Caleb phungṭhen mi arahming Nabal inti inkhat leika-om, Carmel khōpui hnenga ram kanei mi kae. Mi kaneitak kae, kemōng 3,000 leh ke 1,000 hei kapu kae. Anuhmei Abigail hi ahme kaṭha khana kasing, tâk ama chu amalung kasin khana ahnuk kase. Nabal in Carmel a akemōnghei anhme alei-ep hei,

⁴ramhânga aka-om David in hivahi athei jo,

⁵khava jâra Carmel a akase sik, Nabal kajōng sik khana ama chibei inthlung sik a rether 10 atir hei.

⁶Nabal hneng vahri sik kha amanthei hei: “Kanṭhōnpa, David in chibei ahei pek che, nang leh na-innshung nami rakip chunga ṭhatthei om rasoh!

⁷Nakemōnghei sam navoa ka-om che ti hi ama’n athei, khana nakemōng kakhemhei kha keini leh ka-omsap ung khana sukset mak hei ung ti hi namanhret sik a amadu. Carmel khōa an-omshung senga anneinâk heikhat mihe’n marûk pek mak hei.

⁸Namihei der hei roh, anhri pek sik che. Revei kani sik a akahong ung kae, khana David in keini hi lungset a narahlâng sik unga aheingek che. Lungset a nator khama nasōk keini leh naṭhōn David sik a thlai apek roh.”

⁹David mihe’n David rahminga ṭong hi Nabal hneng anhri pek jo. Khana anmani’n anhngâk a ka-om hei,

¹⁰Nabal in achaina amasôn hei, “David? Ama hi tu mo kae? Ama chungchânga latheihêr mak eng! Tûnlai hi sōk katamtak ankapu hnenga inphut ahei katlânsōt mihe’n ram hi kasip sō jo hei!

¹¹Kakemōng sam kavo hei sik kathat ran hme, khana kabuhlom leh katui kha heichoi mak ning khana khona inphut akahong hei mo ti inhret lo mihei hneng pek mak hei ning!”

¹²David mihei kha ahnenga inle jo hei khana Nabal ṭonghri kha anhri pek jo.

¹³Ama’n ṭong apek hei, “Nanchemjâm kha kir mankop et ruh.” Ankhenga antlo et jo. David inum achemjâm akir mankop jo khana ami 400 kasesōt jo hei, mi 200 hei chu thlai aka-om seng leh andahlon jo hei.

¹⁴Nabal sōk inkhat in Nabal nuhmei Abigail hneng ati, “Nathei jo mo? David in ramhâng thōia inphut kanpu hneng chibei leh inṭhōia mi ahei tir hei, tak ama’n inzak apek heia kae.

¹⁵Tâk-kha anmani eini sik a akaṭha hêr hei kae; pha rakip a hlei laia anmani leh kan-omsap shunga, kanneinâk heite marûk mak hei.

¹⁶Kemōng kankhemna anmani leh kan-omsap lai seng sûn leh jân anhrung ung.

¹⁷Hivahi mandon kaṭha roh khana heimo tlo sik intluk roh. Hivahi kanpu leh a-innshung pumpui sik a ṭōnse hongkachang thei. Kanpu chu akamo, ṭong inngeimak kae khana tûte ṭong rangei mak ning!”

¹⁸Abigail in inrangtak a buhlom 200 leh ju shavunpeng 2 kasip phet, ro manhmin kemōng 5 hme, hmuchi katheisa kilograme 17, vomhrui kachâr abor 100, theichang kachâra insyem buhlom 200 hi shakōrtung amanrôn jo.

¹⁹Khana amanu’n sōk-hei hneng ahri, “Kahma nangni leise ruh, nankahnunga kahong sik eng.” Apuise hneng chu heite hrimak.

²⁰Ashakortung chunga tlânghlam inhek ahrolai manhret manloa David leh amihei kha ama hnengting anhei jōn a aratō heia kae.

²¹David in aleimandon “Heisik a mo sova mipa karōihei kha kaleihrung pek hei? Aneinâk inkhatbek mihe’n marûk pek mak hei, tâk kei inthōpuina man chu hinga mo apek male eng?

²²Jîngkâr mak hma sova mihei so achaina katlunga kathatsō mak he’nchu Pathen in athat eng chang rasoh!”

²³Abigail in David kha ahmu pha inrangtak a kaṭuma David ke kunga raleia inchôm inthla jo

²⁴khana ahnenga ati, “Apu, lungsettak a arangei roh! Ṭhemo kha ke’n chen rong

²⁵Lungsettak a, heite kahnemmak Nabal ṭong kha alopek mak roh! Ama chu arahming leh intōk a akamo kae! Nasōk he’n kan-inna anhonglai kei leiom mak eng, apu.

²⁶Phuhlōna leh nakadōihei thatsōna sik a inphut ani kaṭhensōt kha RŌNGPU kae. Khana tûn akahring RŌNGPU rahminga intep eng khachu nakadōihei leh nang sukset sik a a’ndu rakip Nabal kapōa karâk sik hei kae.

²⁷Apu, lungsettak a nang sik kutchoi kahei rôn hi arahlâng pek roh, khana namihei hneng pek hei roh.

²⁸Dikmak heikhat katlona chunga lungsettak a arangei mandam roh, apu. RŌNGPU’n nang leh nasōnhei renga amatungsōt sik chei, ajârchu ama sik re natlo kae; khana nahring lai seng ṭōnse tlomak tin che.

²⁹Tu inkhat in anbuhlu chea that sik a anrei che’num, RŌNGPU na-Pathen in, mi inkhat in mankatamtak karōi manbukna ahngâk kapōa, ahuk sik che. Nang inrepuihei khachu ahlon sōt sik jo hei, mi inkhat in saiphia hlungte akâpsōt kapōa.

³⁰RŌNGPU’n nahnenga a’ntepna akaṭha rakip atlopek chea Israelhei reng amanchang jo che pha,

³¹ajâr kasea thisen namasō mak khana nabinga phu nahlō mak jâra, apu, malung inrimna neimak tin che. RŌNGPU’n vângṭhat apek che pha, apu, kei amahngi mak roh.”

³²David in amanu hneng ati, “Tuning kei inhmupui sik a nang nahong katir RŌNGPU, Israel Pathen kha manpâk a om rasoh!

³³Nang akaṭha manhret theina leh tuning kei in mikathat kachang sik leh kabinga phuhlōna katlo sik heia inphut tingna sik a naṭōntlo jâra hin Pathen manpâk ka-om.

³⁴RŌNGPU’n nangni sukset sik a inphut kei ating eng kae. Tâk kei akahring Pathen rahminga a’ntep eng kae, nang inrangtak a naleihong mak inchu, jîngkâra chu Nabal mi rakip akathisō sik hei kae.”

³⁵Khang’khan David in amanu neinâk heirôn hei kha arahlânga ahnenga ahri, “Innting se jo roh, malung mandong mak jo roh. Namadu kha katlo pek sik jo che.”

³⁶Abigail kha, inna reng revei kapōtak a akatloa ka-om Nabal hnenga inle jo. Ju inruia kahōia ka-om, khava jâra jîngkâr mak hma seng heite hripek mak jo.

³⁷Khava sōa ama ahong hlimseng jo pha, heirakip ahri pek jo. Ama kha ahip-manpûra katlu joa, atak kathipet joa kae.

³⁸Ni sôm sōa Nabal kha RŌNGPU’n avōk a kathi jo.

³⁹Nabal kathi jo ti ṭong David in athei pha, ama’n ahri, “RŌNGPU kha manpâk a om rasoh! Kei inzak anikapek Nabal chunga phu ahlō jo khana asōkpa kei dikmak katlo sik a inphut ating eng. Nabal ṭhatmak jâra RŌNGPU’n akarâk jo. Khava sōa David in Abigail hneng a-ompuina sik maduna ṭong aleipek jo.

⁴⁰Asōk-hei Carmel a amanu hneng vakase heia ahnenga anti, “David in anuhmei sik a nakaṭhōi ahei tir ung kae.”

⁴¹Abigail kha raleia ahmai abia ati, “Kei asōknu eng kae, asōk-hei ke kasôp sik a intluk eng.”

⁴²Inrangtak a intluk a, ashakōrtung achōng jo. Asōk nuhmei 5 hei aṭhōi heia, David sōk-hei kahnung ajuia David nuhmei vakachang jo.

⁴³David khan Jezreel khōa Ahinoam aleiompui dek jo, tûn Abigail hi’m anuhmei hongkachang nôk jo.

⁴⁴Hiva pha shunga, Saul in asanu Michal, David nuhmei kha Gallim khōa Laish sapa Palti hneng aleipek jo.