Read Komrem SAMUEL INKHATNA 28 Bible Online

SAMUEL INKHATNA 28 - Komrem bible

SAMUEL INKHATNA 28

¹Pha ṭhahrep sōa, Philisti he’n anremi Israel kadōi sik a anleimantûp hei, khana Achish in David hneng ati, “Nang leh nami he’n kei langa sik a re nantatuk sik jo kae ti hi namanhret.”

²David in amasôn, “Ôk, kamanhret. Kei nasōk eng kae, heimo katlo tor kha nangkhet in nahmu sik.” Achish in ati, “Kaṭha! Kei kahrung kamanchang thang sik jo che.”

³ Tûnchu Samuel kathi jo, Israel rakip in ama sik a ṭajai ansuia akhōpui Rama a anhre jo. Saul in tlâ kasânhei leh rathla kahmuhei seng Israel ram rumhrat a amandahlon jo hei.

⁴Philisti remi he’n intûp heia Shunem khōpui hnenga rephōr anmatung jo; Saul in Israelhei amantûp heia Gilboa Tlânga rephōr amatung jo.

⁵Saul in Philisti remihei ahmu pha, leikaṭi hêr,

⁶khava jâra RŌNGPU hneng heimo tlo sik kha aleider. Tâk RŌNGPU’n arahmanga, Urim leh Thummim hmangna vânga leh sânkathemhei vânga anchanga masôn hêrmak jo.

⁷Khava sōa Saul in aṭōn karônhei hneng ṭong apek hei, “Rathla kahmu tor nuhmei inkhat ajongpek ruh, ke’n ṭongderna nei rong,” ati. “Endora a inkhat ka-om,” tia anmasôn.

⁸Khava jâra Saul kha ahme athleng jo; pōn leh der ahlop invona, khō ahong inthim jo pha ami 2 hei leh nuhmei kha inhmupui sik a kase jo. Amanu hneng ati, “Rathla kha aderpek roh khana hei omchen mo akasōk sik ahri pek roh. Arahming kahrisōt mipa rathla kha beksōt roh.”

⁹Nuhmei khan amasôn, “Saul reng in heikhonga mo tla kasânhei leh rathla kahmuhei rumhrat tak a Israel ram amandahlon hei kha nang in namanhret khet. Heisa mo kei surna sik leh thatna sik a nantatlo?”

¹⁰Khan chu Saul in inthenga intepna aneipek. Ahnenga amanthei, “Akahring RŌNGPU rahminga kei intep eng hiva tlo jâra nang karâkna chenmak tin che.”

¹¹“Tu mo kabeksōt pek sik che,” nuhmei khan ader. “Samuel,” tia amasôn.

¹²Nuhmei khan Samuel kha ahmu pha, aṭit a ka-ông jo khana Saul hneng ati, “Heisa mo nahōn eng? Nang Saul reng che kae!”

¹³Reng in ahnenga ati, “Ṭitmak roh! Heimo nahmu?” “Raleia inphut rathla inkhat ahong kaketou kahmu,” ati.

¹⁴Ama’n ader, “Heimo apō?” Amanu’n amasôn, “Katerpa inkhat hong kaketou. Pōn kasei inkhat invon.” Khan chu khavakha Samuel kae ti kha Saul in amanhret jo, khana kajana apek a raleia kakhup jo.

¹⁵Samuel in Saul hneng ati, “Heisa mo namanbōi eng? Heisa mo kahong inlena sik natlo?” Saul in amasôn, “Kei inrim hêr jo eng! Philisti he’n re andōi jo eng, khana Pathen in adahlon jo eng. Amasôn mak jo, Sânkathemhei vânga leh rahmanga achanga. Khava jâra, heimo katlo sik naman theina sik eng kabek che kae.”

¹⁶Samuel in ati, “Pathen in adahlon jo che pha khana nang kadōia ahong jo pha, heisa mo nabek eng?

¹⁷RŌNGPU’n kei hnenga inphut amanthei che kha nahnenga atlo jo kae: nanga inphut rengram kha alosōt jo khana David hneng apek jo.

¹⁸Nang in RŌNGPU ṭongpek juimak che khana Amalek-hei leh ankarōi rakip suk manhmang mak chea kae. Khava jâra RŌNGPU’n hivahi nahnenga atlo jo kae.

¹⁹Ama’n nang leh Israelhei Philistihei hneng apek sōt sik chei kae. Ajîng kania nang leh nasapa’n kei nanhei jui sik jo eng, khana RŌNGPU’n Israel remi he’m Philistihei hneng apek sōt sik hei.”

²⁰Khava phatak a khan Saul kha Samuel ṭonghri kha aṭit reia raleia katlu jo, inthlonga ka-om jo. Ama katlasam jo, ajârchu sûnsôt leh jânsôt heite sâk mak a kae.

²¹Nuhmei kha ahnenga kasea ama’n aṭit hêr jo kha ahmu jo, khava jâra ahnenga ati, “Apu, alungset roh, nang ngekna kha kahringkhō kaphesōt a katlo pek jo che.

²²Tûnchu kei ngekna atlopek jo roh. Thlai ajing sōng pek che rong. Nahlam hrona nangarna sik a nasâk nger sik kae.”

²³Saul in hnōm mak a heite sâk mak ning ati. Ama ṭōnkarôn he’num asâkna sik a anngek. Hnungpena kahnōm joa, raleia inphut kangirsōt a, rakhum chunga in-ong jo.

²⁴Nuhmei khan inrangtak a asehrat tere amanthai hêr jo kha athat jo. Khana jâmdi ṭhahrep aloa akachep a che philo buhlom asyem jo.

²⁵Amanu’n thlai kha Saul leh aṭōn karônhei hmaikunga adônpek hei, khana anmani’n ansâk jo. Khava jânbât khan anmani kasesōt jo hei.