Read Komrem SAMUEL INKHATNA 29 Bible Online

SAMUEL INKHATNA 29 - Komrem bible

SAMUEL INKHATNA 29

¹Philisti he’n Aphek a anremi rakip anmantûp hei, Israel he’n Jezreel Phaichama tuiripût hnenga rephōr ansyem.

²Philisti reng 5 hei kha anremi rup 1,000 leh 10,000 sâma hong injôk jo hei; David leh aremihei kha Reng Achish leh inṭhōia, hnung intonga hong injôk hei.

³Philisti rehlam kakei he’n anhmu heia inder hei, “Hiva Hebrew mihei hi, hin heimo antatlo?” Achish in amasôn hei, “Hivahi David antati, Israelhei Reng Saul ṭōnpui karôn inkhat kae. Tûn ama hi pha kasôttak kahnenga hong ka-om jo. Kei hnenga ahonga inphut aṭhena heikhat kahmuthei latlomak a kae.”

⁴Tâk-kha Philisti rehlam kakei he’n Achish chunga anhnuk kana joa ahnenga anti, “Khava mipa kha ahnenga napek jo khōpuia khan tir male roh. Keini leh rehmun a amanse mak roh; re intukna shunga keini macheng ahong dōi sik ung. Eini mihei thina vânga akapu ajôrmantlai tei loa ama sik a akaṭhadet heihlam mo aka-om?

⁵Hei-achang inum, hivahi David kae, nuhmei he’n anlâm pum a hla ansâk, “Saul in lishing khat sâm athat, David in lishing sôm sâm athat.’”

⁶Achish in David kha abek a ahnenga ahri, “Nang kaṭong kajui che kae ti hi akahring Israelhei PATHEN rahminga intep eng; nang hi kei leh inṭhōia hiva re vatuk sik hi kamadu che kae. Kahnenga nahonga inphut naṭhena heikhat hmumak eng. Tâk-kha reng alak he’nchu nang hi hnōm mak jo hei che.

⁷Khava jâra innting kadaia inle jo roh, anmani tlai makna sik heikhat tlomak jo roh.”

⁸David in amasôn, “Apu, ke’n akadik mak heimo katlo jo? Nang in nahri kapōa, ke’n nang kahong razen che kani ninga inphut katloṭhena ahmu mak che, heisa mo kareng kakapu nang leh a’nṭhōimak sik me, khana nakadōihei kha ka’ntukpui mak sik hei?”

⁹Achish in amasôn, “Nahri kha kahnōm eng. Ke’nchu nang hi Pathen ngeva kapōa ṭong kajui inkhat che kae tia kamandon che. Tâk-kha reng alak he’nchu nang hi keini leh inṭhōia rehmun a se yamak ning anti jo.

¹⁰Khava jâra, David in, ajînga jîngkâra Saul kadahlona kei hneng akahong seng chei kha, hmatak a akathōi cheia khō ahong vârbia khan akasesōt sik jo chei kae.”

¹¹Khan chu David leh amihei seng kha ajing jîngkâr hmatak a Philisti ram a inle sik a inphut jo hei, khana Philisti he’n Jezreel ting kase jo hei.