Read Komrem SAMUEL INKHATNA 3 Bible Online

SAMUEL INKHATNA 3 - Komrem bible

SAMUEL INKHATNA 3

¹Khava lai khan, Eli hlamkeina thōia naipang Samuel in RŌNGPU ṭōn atloa a-omlai, RŌNGPUa inphut ṭong hongrei mak, khana ama a inphut hmangtalâr inhmurei mak a kae.

²Jân khat hin, ahmit khō hmu manchênlo Eli kha a-inn den a kajea leika-om.

³Samuel kha a’ntheng Intepna Bôm omna, hmun intheng shunga leikaje. Khōvâr mak hma, thaihmei kha’m la’ndet a laka-om,

⁴RŌNGPU’n Samuel kha ajōng bek. Ama’n amasôn, “Ôk, apu!”

⁵khana ama Eli hneng katlâna avader, “Nabek eng kha, hin ka-om eng.” Tâk Eli’n amasôn, “Bekmak che eng, vaje nôk jo roh.” Khava jâra Samuel inlea vakaje jo.

⁶RŌNGPU’n Samuel kha abek nôk. Naipangpa khan RŌNGPU tabek eng kae tia leimanhret mak, ajârchu ahnenga RŌNGPU’n ṭong leihri phungmak. Khava jâra ama kathōi jo, Eli hneng vakasea ahri, “Nabek eng kha, hin ka-om eng.” Tâk-kha Eli’n amasôn, “Bekmak che eng, sapa, vaje nôk jo roh.”

⁸Vōithum tlukna RŌNGPU’n Samuel kha abek nôk; kathōa Eli hneng kasea ati, “Nabek eng kha, hin ka-om eng.” Khan chu naipang kabek kha RŌNGPU kae tia Eli’n amanhret jo,

⁹khava jâra Eli’n Samuel hneng ati, “Vaje nôk roh; abek nôk che’nchu, ‘RŌNGPU, heihri roh, nasōkpa’n karangei, ti roh.’” Khava jâra Samuel kha vakaje nôk jo.

¹⁰RŌNGPU kha kajōnga khan kangira amak hma kapōa abek jo, “Samuel! Samuel!” Samuel in amasôn, “Heihri roh; nasōkpa’n karangei.”

¹¹RŌNGPU in ahnenga ati, “Kani ṭhahrep sōa Israel mihei kâra ṭōn heikhat kajōng tlo sik, khavakha ṭit ka-omhêr, akathei rakip in malung inhmak sik hei.

¹²Khava kani ning Eli innshung chunga, a’nphut in achaina katlunga, kamaṭhitna hei kha katlosōt sik.

¹³Ahnenga kahri pek dek jo, khachu ama innshung ahei tik a kakarâk sik kae, ajârchu asapa he’n kei dōina ṭongse anhria kae. Eli’n hiva antlona hi amanhret, tâk manhai mak hei.

¹⁴Khava jâra Eli innshunghei sukṭhena kha inthoina a-emak leh neinâk tōkna vânga hiva set kakhôktak karahei hi losōtthei changmak jo tia inchêntak a kaphông pek hei.”

¹⁵Samuel kha jîngkâr katlunga jekhuma kajea ka-om; khava sōa kathōa RŌNGPU bek-inn kot-hei kha amahlâng hei. Eli hnenga hmangtalâr ahmu kha hrisōt sik kha kaṭi jo.

¹⁶Eli’n Samuel abek a ati, “Eh Samuel, kasapa!” Samuel in amasôn, “Ôk, Apu,”

¹⁷Eli’n ader, “RŌNGPU’n heimo ahri pek che. Heirakip kha kahnenga hrisōt lo tlomak roh. Ahri rakip kha kahnenga nahri pek mak eng inchu, Pathen in karâkna apek sik che.”

¹⁸Khava jâra Samuel in akhenga ahrisō pet jo; heite thup neimak jo. Eli’n ati, “Ama kha RŌNGPU kae; ama’n kaṭha sik ati kha atlo sik kae.”

¹⁹Samuel kha ahonglen jo pha, RŌNGPU’n ama a-ompui khana Samuel ṭonghri hei kha hongkadik jo.

²⁰Ram inkhat a inphut inkhat katlunga Israel mi rakip in Samuel kha RŌNGPU sânkathem inkhat kae ti hi anmanhret joa kae.

²¹RŌNGPU’n Shiloa Samuel hneng ale’nlâra ṭong aleihri pekna hmun a khan RŌNGPU kha inlâr ṭhak jo. Khana Samuel in ṭong ahri pha Israel mi rakip in anrangeia kae.