Read Komrem SAMUEL INKHATNA 30 Bible Online

SAMUEL INKHATNA 30 - Komrem bible

SAMUEL INKHATNA 30

¹Nihni sōa David leh ami he’n Ziklag a he’nle hei. Amalek he’n Judah thlâng ting kha re anleisō jo khana Ziklag anbuhlu jo. Khōpui kha anrokhum jo

²khana nuhmei rakip ansur jo hei; tûte inkhat chu that mak hei, tak ansesōt pha mi rakip anhesōt jo hei.

³David leh amihei anheitlung pha, khōpui kha hmei anleiro jo khana annuhmei, ansapahei, ansanuhei anta leiṭhōi jo hei kha anva manhret jo.

⁴David leh amihei kha kaṭap jo hei khana anṭōiber mak hma seng bângmak hei.

⁵David nuhmei 2 hei, Ahinoam leh Abigail kapha anleiṭhōi jo hei.

⁶David kha amalung inrim hêr jo, ajârchu amihei kha ansahei inhmang jâra khan ama anhōt jo, khana hlung vânga denghlon sik a anmaṭhit jo; tâk RŌNGPU apathen in mathokna apek a kae.

⁷David in Ahimelech sapa Abiathar hneng ati, “Zakkō kabong kha heichoi roh,” khana Abiathar in ahei choi pek.

⁸David in RŌNGPU hneng ader, “Re kasōhei so kahnong sik hei mo? Kasurtor sik hei mo? Ama’n amasôn, “Hnong hei roh; navasur sik hei khana antasur mihei kha navahuk sik hei.”

⁹Khava jâra David leh ami 600 hei kha inphut jo hei, khana Besor kavadung anheitlung pha, ṭhahrep chu khan ka-om jo hei.

¹⁰David in ami 400 hei leh kase nôk hei; alak 200 hei khachu kavadung rakan sik kha katlasam rei jo heia hnung ankhora ka-om jo hei.

¹¹David leh a’nṭhōi mihe’n Egypt mi inkhat anhmusōt a David hneng anheiṭhōi. Sâk leh in ajing,

¹²theichang kachâr ajing leh vomhrui kachâr abōr 2 anpek. Asâksō leh, ratha ahongneidet jo; ama kha ni 3 sâk leh in heite aleinei mak jo kae.

¹³David in ahnenga ader, “Nakapu kha tu mo, nang khona inphut che mo?” “Kei Egypt mi eng kae, Amalek-hei sōk eng kae,” tia amasôn. “Kakapu khan kadam mak jâra adahlon eng kae, khana ni 3 katluk jo.

¹⁴Keini’n Judah thlâng tinga Chereth leh Caleb phungṭhen hei ram shunga re kanvasō, khana Ziklag hmei kanvaro jo.” ati.

¹⁵David in ader, “Re kasōhei hneng naṭhōi sik ung mo?” Ama’n amasôn, “Nang in that mak che ning khana kakapu hnenga pek sōt mak che ning tia Pathen rahminga na’nhâksêr inchu kaṭhōi sik chei.”

¹⁶David kha anhnenga aṭhōi jo. Re kasōhei kha, Philisti leh Judah heia inphut neinâk chomsōt kha hingja achang jâra khan ansâk an-ina, hōina anhmanga, khava hmun a khan inchek-chaia ka-om jo hei.

¹⁷Ajînga jîngkâr hmatak a David in ahlō heia khōhlei katlunga a’ntukpui hei. Sharîngsei kachōng mi 400 hei tei loa, tûte inkhat tlânsōt manmak hei.

¹⁸David in Amalek-hei tachomsōt mi rakip leh heirakip, a nuhmei 2 hei inveina, ahuksōt hei;

¹⁹heite inkhat inhmang mak. David in amihei sapa leh sanuhei, khana Amalek-hei tachomsōt rakip achen male jo.

²⁰Ama’n kemōng rup-hei leh ke rup achen male hei; ami he’n anhmating ranhring rakip anhe heia anti, “Hihei hi David tahei kae!”

²¹Khava sōa David in ami 200 hei, antlâksam jâra Besor kava dunga ale’ndahlon jo hei hneng inlea vakase. Anmani David leh amihei intōpui sik a kahong hei, David kha anhnengting kasea kahōia chibei apek hei.

²²Tâk David ta’nṭhōipui mi ṭhahrep malung kasin leh hnemna kase he’n anti, “Anmani hi eini leh sesap mak me, achang jâra nihei chomsōt inkhatbek pek mak hei min. Annuhmei leh ansahei inṭhōi hei sona se jo hei rasoh.”

²³Tâk David in amasôn hei, “Kasōpuihei, RŌNGPU’n apek me neinâk chunga khan nangni khanga tlothei mak chei ning! Eini ahuk jo me khana re kasōhei chunga torna apek jo me.

²⁴Tu’num nanta hri kha hnōm mak hei ning! In-anghrep a a’nsem sik me kae: neinâk kahrunga ale’nṭang hei leh rea akase hei leh in-anghrep a antachen sik kae.”

²⁵David in hiva dân hi asyem jo, khana hivahi Israel shunga anhmang thang jo.

²⁶David in Ziklag a ahong inle pha, neinâk heichomsōt ṭhahrep aṭhōn, Judah hlamkakeihei hneng, hiva ṭong leh inṭhōia aleitir, “Hinahin nangni sik a kutchoi RŌNGPU kadōi heia inphut chomsōt kanhei manrôn chei.”

²⁷Bethel a, Judah thlang tinga Rama a, Jattira,

²⁸Aroer a, Siphmoth a, Eshtemoa a,

²⁹khana Racal a ka-om mipuihei hneng aleitir; Jerahmeel phungṭhen hei, Kenhei,

³⁰khana Hormah, Borashan, Athach,

³¹khana Hebrona ka-om hei hneng aleitir. Ama leh amihei leilônna hmun rakip a khavakha aleitira kae.