Read Komrem SAMUEL INKHATNA 31 Bible Online

SAMUEL INKHATNA 31 - Komrem bible

SAMUEL INKHATNA 31

¹Philisti he’n Israelhei leh Gilboa Tlânga re le’ntuk hei. Israel mi katamtak anleithat hei, a’nhleiseng kha, Reng Saul leh asapahei inveina katlân jo hei.

²Tâk Philisti he’n Saul sapa 3, Jonathan, Abinadab leh Malchishua anthat jo hei.

³Saul kimvea intukna kha inhnak a kae, ama kha indōipui he’n ṭhe vânga ankâp masuk jo khana intôn hêr jo.

⁴Arevon karônpa hneng ati, “Nachemjâm radok ina athat jo roh, hiva Philisti khōvel he’n ningṭhat pum a anthat makna sik eng.” Tâk-kha retherpa kha khava tlo sik kha kaṭirei joa kae. Khava jâra Saul in achemjâm aradok a insunhlon jo.

⁵Retherpa khan Saul thi kha ahmu pha ama’m achemjâm vâng insunhlon jo khana Saul leh kathisap jo hei.

⁶Khang’khan Saul leh asapa 3, khana retherpa kha kathihei; khava ning Saul mihei seng kathisō jo hei.

⁷Jezreel Phaicham rekhat a ka-om leh Jordan Tuidung nisōtinga ka-om Israel remihei kha rehmun a inphut katlânsōt jo hei khana Saul leh asapa anthat jo hei ti ṭong anthei pha, ankhōpuihei andahlona katlân jo hei. Khava pha Philistihei kahong heia khōpui kha anhlō jo hei.

⁸Re intuk ning ajîng kania Philisti he’n rehmun a mi kathi manhretna sik kase hei, Saul leh asapa 3 Gilboa Tlânga anleikathi hei kha anvahmu sōt jo.

⁹Anmani’n Saul lu kha antana, arevon anhliksōt pek a, Philisti ram shunga anmihei leh anmilim bek-inn rakip a ṭong kaṭha kahrile sik a tirle antir hei.

¹⁰Ama re hmangchâk kha pathennu Astarte bek-inna anda jo, khana ataksa kha Beth Shan khōpui kurbanga anrabek a kae.

¹¹Saul chunga Philistihei tatlo kha Gilead ram a Jabesh khō mipui he’n anthei pha

¹²rekahrâng pasehei inphut heia, jânsôt Beth Shana kase hei. Saul leh asapa taksa kalōng kha kurbanga inphut anlo mathlâk a Jabesh a anheichoi male hei, khana hmei vâng anro hei.

¹³Anruhei kha anchom mantûp a khōa Tamarisk thingkung thōia anvûm, khana ni 7 thlai anhngōia kae.