Read Komrem SAMUEL INKHATNA 6 Bible Online

SAMUEL INKHATNA 6 - Komrem bible

SAMUEL INKHATNA 6

¹RŌNGPU Intepna Bôm kha Philistihei kâra thla 7 a-omsōa,

²mipui he’n thempu leh dôi kathemhei kha anbek heia ander hei, “RŌNGPU Intepna Bôm hi heimo kantamanlo sik? A-omna hmun a ṭhak male sik achang inchu hei leh mo tir sik?”

³Anmani’n anmasôn, “Israelhei Pathen Intepna Bôm kha nantir male sik achang inchu, nansetna jâra ahnenga pek sik a kutchoi leh inṭhōia nantatir sik kae. Intepna Bôm kha kutchoi kasea inlemak ning. Hing’hin nangni kadam sik chei, khana heisa mo akarâk ṭhak chei ti kha nanhong manhret sik jo.”

⁴Mipui he’n ander, “Hei kutchoi leh mo nitir sik?” Anmani’n anmasôn, “Khōihli lim kapō saihlung 5 leh sana chaichîm 5, inkhat et kha Philisti reng 5 hei kahlanga kae. Khava nat kha nangni nankhenga leh reng 5 hei chunga ajōngtir kae.

⁵Nanram shunga inrengna heikarôn sōt hiva khōihli leh chaichîm lim kapō hi nantasyem nger sik kae, khana Israelhei Pathen hneng kajana nantapek sik kae. Kha achang inchu, nangni leh nan-pathen khana nanram chunga karâkna kha kahaikhet sik.

⁶Egypt rengpa leh Egypt mipuihei kapōa heisa mo nanracham akase sik? Israelhei kha Egypt anmandahlon mak kârseng Pathen in amanmo hei kha mahngi mak ruh.

⁷Khava jâra gâri atherpet inkhat leh sehrat pui, phur alakarôntet mak, 2 mantluk hei ruh; gâria khan khit manchun hei ruh khana ante hei khachu se ina hnong male hei ruh.

⁸RŌNGPU Intepna Bôm kha inlo una, gâri chunga da ruh, khava hnenga khan sana limsyem, nansetna sik a kutchoi nantapek hei kha thingbôm inkhat shunga thōn hei ruh. Gâri kha ahlam kajui sik a manse manphut ruh khana abinga se rasoh.

⁹Asena kha enruh; Beth Shemes khōpuiting ase’nchu hiva nichunga ṭit ka-om inrengna hi Israelhei Pathen tahei tir kae. Kha achangmak inchu, nat kha ama tahei tir changmak ti hi ni’nhret sik; vângset a akana me kae.”

¹⁰Anmantheina dungjuia antlo jo: sehrat pui 2 anlo jo khana gâria khan ankhit jo hei, ante hei khachu se-inna ankhum jo hei.

¹¹Gâri chunga Intepna Bôm kha anda jo, chaichîm leh khōihli kapō sana limhei thōnna thingbôm kha leh inṭhōia.

¹²Sehrat pui hei kha Beth Shemes hlamting ansor jo khana anlu anhnget a anjuihrek jo, hlamsir pehêr mak hei. Ansepum a inhrâm hei. Beth Shemes ramri katlunga Philisti reng 5 he’n anjui hei.

¹³Beth Shemes a mipuihei khan phai hleia gehu anleivōklai manhret manloa khō anheithlir pha, Intepna Bôm kha anleihmu jo. Kha anhmu jâra le’npâk hêr hei.

¹⁴Gâri kha Beth Shemes a aka-om Joshua intipa hleipuk a kahong jo, khana hlungpui hnenga inhnga jo. Mipuihei khan thing gâri kha antuk rachen a, sehrat pui hei kha anthat heia RŌNGPU hnenga ro-inthoina antōk jo heia kae.

¹⁵Levi he’n Intepna Bôm leh sana limsyem omna thingbôm hei kha anlosōt heia hlung kalentak chunga anda jo hei. Khava sōa Beth Shemes a mipui he’n RŌNGPU hnenga romanvâm inthoina leh inthoina alak antōk jo hei.

¹⁶Philisti reng 5 he’n anmani kha anlei en ravet hei, khava sōa Ekron ting khava ning bât hong inle jo hei.

¹⁷Philisti he’n khava sana khōihli lim 5 kha, inkhat et in Ashdod, Gaza, Ashkelon, Gath leh Ekron khōpuihei kahlânga, ansetna kutchoi pekna a RŌNGPU hneng anta heitir kae.

¹⁸Anmani’n sana chaichîm, inkhat et Philisti reng 5 hei vai rôna khōpui, rekur kanei leh bang kaneimak khōhei kahlanga anheitirsa hei. RŌNGPU Intepna Bôm antadana, Beth Shemes a Joshua hleipuk a Hlung kalentak kha omchen kasōk sâkhi inkhat a tûn katlung laka-om.

¹⁹Intepna Bôm ashung an-en jâra Beth Shemes a pase 70 RŌNGPU’n athat hei. Khang khava ankâra mi katamtak thatna kha RŌNGPU’n amansōk jâra mipuihei khan ṭajai anleisuia kae.

²⁰Khava jâra Beth Shemes a mihe’n anti, “Hiva a’ntheng Pathen, RŌNGPU hmaikunga tu mo akangirtor sik? Einia inphut asesōtna sik tirsōt sik jo kae?”

²¹Anmani’n Kiriath Jearim hei hneng hinga avakati sik a mi anleitir hei, “Philisti he’n RŌNGPU Intepna Bôm kha anheitir male jo. Hongṭum ina va’nlo jo ruh.”