Read Komrem SAMUEL INKHATNA 8 Bible Online

SAMUEL INKHATNA 8 - Komrem bible

SAMUEL INKHATNA 8

¹Samuel kha ahongter jo pha, asapahei kha Israelhei ṭongkatan amanṭang jo hei.

²Asapa upa kha Joel khana naipang khan Abijah tia aphō hei, anmani Beersheba a ṭongkatanhei kae.

³Tâk anmani kha anpa chônhlam juimak hei; sêr hmun a rōk a anratha kahrok, khava jâra marûk sêr anrahlâng khana malung inthenga ṭong tanmak hei.

⁴Khava sōa Israel hlamkakei rakip intûp heia, Rama a Samuel hnenga vakase hei,

⁵khana ahnenga anti, “Enroh, nang kater jo che khana nasapa he’n nang chônhlam juimak hei. Khava jâra kanvai karôn sik a reng inkhat akadeipek roh, ram alak-hei kapōa reng kanneitheina sik a.”

⁶Anmani’n reng inkhat anderna kha Samuel in madu mak a kae; khava jâra RŌNGPU hneng aleider,

⁷khana RŌNGPU’n ati, “Mipui he’n nahnenga antahri rakip kha rangei roh. Antahnōm mak kha nang changmak che; anreng sik a antahnōm mak kha kei eng kae.

⁸Egypt a inphut kaheiṭhōisōt heia inphut, anmani keia inphut inhesōt hei khana pathen ralak ankamuk joa kae; ahei tik a kei hneng anta leitlo kha tûn nang hneng antlo joa kae.

⁹Khava jâra rangei hei roh, tâk gîkna inhnaktak pek hei roh khana heikhonga mo anreng he’n antarazen sik hei ti kha hrimanchên pek hei roh.”

¹⁰RŌNGPU’n ahnenga amanthei rakip kha, Samuel in reng neina sik a akader mipuihei hnenga amanthei jo hei.

¹¹Samuel in ahri manchên pek hei, “Hing’hin nanreng in arazen sik chei. Nansahei kha remia asyem sik hei; loikhat in ama re shakor gâri anrazen sik, loikhat in ashakor remia, loikhat in ashakor gâri hma a katlân sik hei.

¹²Loikhat chu mi 1,000 ka-ensuia ṭōnkarôn amanchang sik, loikhat in mi 50 ka-ensuia amanṭang sik. Nansa he’n ama hlei ankhōi sik, asâng ankhômpek sik, re hmangchâk khana ashakor gâri hmangchâk-hei ansyem sik.

¹³Nansa nuhngâk he’n ama sik a marim katui ansyem sik khana abu kasōng leh abuhlom kasyem inṭang sik hei.

¹⁴Nanhleipuk kaṭhapen, vomhrui rahōn, olive rahōn alo sik hei khana ama ṭōnpui karônhei apek sik hei.

¹⁵Nansâng leh nanvomhrui kha sem sôma inkhat ṭong tanna ṭōnkarônhei leh aralak ṭōnkarônhei sik a alo sik hei.

¹⁶Nansōk-hei leh nanran kaṭhapen khana shakōrtung hei aloheia ama ṭōn amantlo sik hei.

¹⁷Nankemōng rup sem sôma inkhat alo sik. Nangni khet um ama sōk hongkachang sik chei.

¹⁸Khava pha kha ahong pha, nanbinga nantakadei nanreng chungchânga rahnak a inphin sik chei, tâk RŌNGPU’n chu nan-inphinna kha rangei mak ning.”

¹⁹Samuel ṭonghri kha mipui he’n rangei mak hei, khana anti, “Changmak! Keini’n reng kanmadu,

²⁰keini jât-hlop hei kapōa kan-omna sik a, kanreng khet in kanchunga vai arôna, re leh sha a kanhlam akeia, kanre atukpekna sik ung.”

²¹Antati rakip kha Samuel in arangei khana kasesōt a RŌNGPU hneng avahri pek.

²²RŌNGPU’n amasôn, “Antamadu kha tlopek hei roh, reng inkhat pek hei roh.” Khava sōa Samuel in mi rakip kha an-ina ani’nlena sik amanthei jo hei.