Read Konkomba Matiu 1 Bible Online

Matiu 1 - Konkomba bible

Matiu 1

¹Yisa Masiya[1] a baa nin u yaajam a piinim a gbɔŋ sɔ. U ye Defid a yaabil le, le Defid mu ye Abiraham a yaabil:

²Abiraham le nan ma Azig, le Azig ma Jekɔb, le Jekɔb mu ma Juda nin u watiib.

³Juda nan ma Perezi nin Zera, wan a na nan ye Tamar nan; le Perezi nan ma Hezironn, le Hezironn ma Ram.

⁴Ram le nan ma Aminadab, le Aminadab ma Nasonn, le Nasonn mu ma Salimɔnn.

⁵Salimɔnn le nan ma Bɔɔzi, wan a na nan ye Rahab nan, le Bɔɔzi ma Obed, wan a na nan ye Ruf nan, le Obed mu ma Jesi.

⁶Jesi le nan ma ubɔr Defid. Le Defid mu ma Solomɔnn, wan a na nan ye Yuriya a poo-n.

⁷Solomɔnn le nan ma Rehoboam, le Rehoboam ma Abija, le Abija mu ma Asa.

⁸Asa le nan ma Jehosafa, le Jehosafa ma Jehoram, le Jehoram mu ma Uzaya.

⁹Uzaya le nan ma Jotam, le Jotam ma Ahazi, le Ahazi mu ma Hezekaya.

¹⁰Hezekaya le nan ma Manaasa, le Manaasa ma Amonn, le Amonn mu ma Josaya.

¹¹Le Josaya ma Jekonaya nin u watiib, baah nan choo Iziral yaab ki ta bi jon Babilɔnn n-yonn man nin.

¹²Baah nan choo bi ki ta bi jon Babilɔnn nan a bɔɔn bu, le Jekonaya ma Salatiɛl, le Salatiɛl mu ma Zerubabel.

¹³Zerubabel le nan ma Abiud, le Abiud ma Elayakim, le Elayakim mu ma Azor.

¹⁴Azor le nan ma Zadog, le Zadog ma Akim, le Akim mu ma Eliud.

¹⁵Eliud le nan ma Eliɛzar, le Eliɛzar ma Matann. Le Matann ma Jekɔb.

¹⁶Jekɔb le nan ma Josef, wan a poo nan ye Meri-n, le Meri ma Yisa wan wee bi yi u ke Masiya nan.

¹⁷Naah nan nyan Abiraham a yonn ki nan kpaa Defid a yonn bi nan ye yaajam piig nin bina le. Le Defid a yonn ki tan kpaa n-yonn man wee bi nan chor bininfob ki jɔɔ bi chaa Babilɔnn nan, bi nan ye yaajam piig nin bina. Le Naah nan nyan iyaayoo ki tan kpaa Masiya a maalim a yoo, bi mu nan ye yaajam piig nin bina le.

¹⁸Baah nan ma Yisa Masiya man sɔ: U na Meri nan ye Josef a jakpeŋ le, amaa baa la nan kɔɔn tabi, le bi nan kan ki miin Meri jɔɔ lipool le. Kasi a Naaŋ a pɔɔm bu.

¹⁹Josef wan nan ye u chalin nan ye uninfo buchinn le, mambu, waa nan ban un nyan ti npaan nin ni, wee Meri n ji ifa, amaa u nan lol u sufu ni ke waa ji yin kɔɔn wi.

²⁰Amaa waah ni nan tiɛr ni niɛ nan bu-n, le Uwonbɔr a malaka degirin u bu tidindɔgin ni, le ki nan bei u ke, “Fin Josef wan ye Defid a yaabil nan, laa san bijawaam ke a ta Meri kun ki tan ŋaa u a poo,[2] nan bu-n waah jɔɔ lipool lan ni, Kasi a Naaŋ a pɔɔm le che u choo lipool nmɔn.

²¹U na li maa kibijag, le a yin ki yinl ke Yisa, nan bu-n u na li nyan u ninfob bi toonbirin.”

²²Ni niɛ nan biɛn nan tun ke nin gbeen nan wee Uwonbɔr nan che u linlenu nan pag ni bu-n ke:

²³“Lig! Usapɔɔn wan kaa nyi uja na li choo lipool ki maa kibijag, le bi na li yin u yinl ke Imanuel.” Ni taai le ye, “Uwonbɔr be nin ti.”

²⁴Josef kaah nan nan fii njiɛmin n-yonn man ni, le u tun ke Uwonbɔr a malaka kaah bei u ke un tun man ni, le ki ta Meri kun tan ŋa u poo.

²⁵Amaa waa la nan ta u ki ŋa u poo nin waah nan nan ma kibijagin. Le Josef yin u yinl ke Yisa.