Read Konkomba Matiu 10 Bible Online

Matiu 10 - Konkomba bible

Matiu 10

¹Yisa nan yin u tooi piig nin bilee le, ki sei bi tininkper a pɔɔm ke bi li nyann nnaanbiim bininfobin, ki che ban bu iwiɛn a booli a booli n kan kutebug.

²U tooi piig nin bilee nmɔn a yin sɔ: Chinchinn le ye Simɔnn, (wan a yinl ji ye Piita nan), nin u waal Anduru, ki kpiɛ Jemisi nin Jɔnn ban nan ye Zebedi a naachim nan,

³Filib nin Batolomiu; Tomasi nin Matiu wan nan ye ulanpogaar nan, nin Jemisi wan nan ye Alifiu a bija nan, nin Tadiɛsi,

⁴nin Simɔnn wan wee bi yi u ke Zealo[8] nin Judasi Isikariya wan nan kɔɔr Yisa nan.

⁵Le Yisa nan tun u tooi piig nin bilee nmɔn, le ki kpaan bi ke, “Ni li nyi ni jo ban kaa ye Juu yaabin ban, ki laa kɔɔ Samariya yaab a timin ni.

⁶Amaa ni li chaa Iziral yaab ban nann ipee yan borin ban.

⁷Naah chaa nan, ni li mɔɔn tibɔŋann nmɔn ke: ‘Paab a naamin mala.’

⁸Ni li teb bibaariba, ki li fiin bitakpiiba, ki jin che nkɔm nkan kutebug, ki nyan nnaanbiim bininfobin na. Ni gaa yɔli le, ni mu li tenn yɔliu.

⁹Ni laa ŋmag salima bee tikurninann bee tikurbinn ni bɔɔlimin ni.

¹⁰Ni laa ŋmag ipɔg ki chonn nsam nmɔn ni, bee ni ŋmag daala ilelee, bee inaatagi, bee njaangbiɛmi; nan bu-n u toontunn ŋan nin un ji u toon yin le.

¹¹“Amaa ntintakpem bee ntinbum man wee ni li kɔɔ-n, ni baan ki kan upoopendaan a niin na, wee ki kɔɔ ki li be niin nin ni fii daal.

¹²Naah yin kɔɔ iniin yan yaan ni, ni poor iniin nmɔn yaab nbamɔma.

¹³Ni ye iniin nmɔn yaab ye bibuchim ke, ni che ni posɔɔmin paar bi bu; amaa ni ye bibuchim kaa be iniin nmɔn yaan ke, ni che ni posɔɔm nmɔn jirin ni ban.

¹⁴Wan yii kaa gaa ni ke, wee ki ji yii ni bɔŋann a gbirim, wee ni yin nyan iniin nmɔn yaan bee kitiŋ nmɔn yaan ke, ni pir pir ni taafar a tann ki jaa nin yaan na.

¹⁵N bei ni ibamɔn le, lidaal lan wee Uwonbɔr nan yin ji bininfob tibɔrin, kitiŋ nmɔn yaab a tudaril na li jo Sodom nin Gomoriya yaab yaal.

¹⁶“Ni lig man, n tun ni le, ni yin be le ke ipee kaah be igbingbel a sisiigin man ni. Ni ma bu ni che ni num li ween ke iwaa-n, amaa wee ki li be soon ke ilanjelin.

¹⁷Ni li nyi bininfob bu, bi na li choo ni ki ta ni jo bibɔjib ban, ki boo ni tiwonjiɛndirin.

¹⁸Min bu bi na li ta ni ki jo kitiŋ a yudam nin bibɔrtiib ban wee ni li ye siɛradam ki sei bima nin ban kaa ye Juu yaabin ban.

¹⁹Amaa bi nan choo ni ke, ni laa che ni mug ni, nin naah li pag man ni, nan bu-n iyaayoo le Uwonbɔr yin sei ni imɔbon le ni ta jiin bi,

²⁰nan bu-n naa ye nim li na yin pagi, amaa ni Baa a Naaŋin li na yin che ni pag.

²¹“Uninfo na li gbii u na big bu le bin ku u; le baam na li gbii bi buwaab bu; le nbuwaab na li kɔnn bi dam ki ku bi.

²²Uninfo biɛn na li nan ni. Naah nɔɔ min bu; amaa wan nan fir sir nin nton nan a joorim ke, u li kan nŋmarim.

²³Bi nan mugir ni kitiŋ kiba ni ke, ni nya niin wee ki lɔŋ ki tɔu; N bei ni ibamɔn le, naa li fir gɔnn Juu yaab a tim nan biɛn ni, le Uninfosaal a Big ndan.

²⁴“Wan tinn kaa jon wan wɔɔnn ni wi, uyom mu kaa jon u yudaau wi.

²⁵Ni ŋan nin wan tinn a binbem li be ke wan wɔɔnn u a binbemin, le uyom mu li be ke u yudaau kaah be man ni. Ni ye bi nan yin uniindaan Beelizebul ke (nnaanbiim a bɔru) bi nin yin yin u niin yaab ke baa?

²⁶“Mambu ni laa san bi bijawaami. Niba li kaa be ki pii wee kaa na li piiri, bee ki woo wee kaa na li nya npaan nin ni.

²⁷Nan wee n bei ni libunbɔnlin nan, amaa ni pag nween nin na, nan mu wee n lɔɔg ki bei ni nan, ni mɔɔn npaan nin na.

²⁸Ni laa san ban li fir ku ni gbanann, wee kaa sin li fir ku ni naamin ni, amaa ni li san Uwonbɔr wan li fir ku ni gbanann nin ni naam biɛn nŋmi-n ni na.

²⁹Naa ye bi kɔɔr ijakangbal ilee koobu lee? Bi ni uba kaa li lu tum wee naa ye ni Baa a bami.

³⁰Hali U nyi ni yukper tan be ni yuli bu-n a kanl.

³¹Mambu, ni laa san bijawaami, ni jɔɔ tinyɔɔr ki jon ijakangbal takpema.

³²“Wan nyan u ba npaan ni ke u ye n bɔɔnɔɔru ke, n mu na li nyan u npaan ni, n Baa wan be paab nan ban.

³³Wan mu ke waa ye n bɔɔnɔɔru bininfobin ke, n mu na li ke maa nyi wi, n Baa wan be paab nan ban.

³⁴“Ni laa tiɛr ke n ta nposɔɔn le dan dulinya nan yaab bu, maa dan nin nposɔɔn ni, amaa n dan nin takoobi le.

³⁵Nan bu-n n dan n nan tugin ‘uja nin u baa le, kibisiɛg nin ki na, upii nin u yaabisa.

³⁶Uninfo a dataag le na yin ye u niin yaab.’

³⁷“Wan ban u baa bee u na ki jon min ke, waa kpaan nin un ŋa n bɔɔnɔɔru wi, wan mu ji ban u bija bee u bisa ki jon min ke, waa kpaan nin un ŋa n bɔɔnɔɔru wi;

³⁸le wan kaa ta u kum a dapunpunl ki nɔɔm ke, waa kpaan nin un ŋa n bɔɔnɔɔru wi.

³⁹Wan jɔɔ u miɛfol ki debin ni, na li lann li, amaa wan mu kaa debin u miɛfol n bu ke u na li kan li.

⁴⁰“Wan gaa ni kuchɔŋ ke, u yaa daan gaa min le, wan mu gaa min kuchɔŋ ke u gaa n Baa Uwonbɔr wan tum min le.

⁴¹Wan gaa u linlenn kuchɔŋ waah ye linlenn nin bu ke, u na li gaa bilinlem a yɔr. Wan gaa ubuchin kuchɔŋ waah ye ubuchin nin bu ke, u na li gaa ubuchin a yɔr.

⁴²Wan minn nnyunsɔɔm wama ki sei n bɔɔnɔɔb ban waar nan a ni uba, waah ye n bɔɔnɔɔru win bu ke, n bei ni ibamɔn le, waa li nyi ki lann u yɔri.”