Read Konkomba Matiu 11 Bible Online

Matiu 11 - Konkomba bible

Matiu 11

¹Yisa kaah nan wɔɔn u bɔɔnɔɔb piig nin bilee-n ki diɛ n-yonn man ni, le u nyan niin ki jon Galilii a timin un tan wɔɔn bininfob ki sin mɔɔn Uwonbɔr a bɔr.

²Jɔnn kaah nan be kuloondiigin, ki nan gbir Yisa Masiya a toon a bɔrin, le u nan tun u bɔɔnɔɔb Yisa ban,

³ke bin tan baan u ke, “Fin le ye wan yin dan ni bee, ti li guu u baa?”

⁴Le Yisa jiin ke, “Ni li jir ki tan wɔɔn u naah gbir man, ki kan man,

⁵ke ni kan bijɔɔm ligir, le nwɔbim a taai tann le bi choon, le nkɔm a gbanann ŋaŋ, le bitukpaab gbir, le bitakpiib fii nkumin, le tibɔŋann nin nan mɔɔn ki sei bilanjiim.

⁶Tikaar be wan kan limugil wee kaa ta n bɔr gab nan bu.”

⁷Tɔ, Jɔnn a bɔɔnɔɔbin kaah nan nyan nin yaan ki jir kun n-yonn man nin, le Yisa nan piin ki pag tenn kuninfogbaluŋin Jɔnn bu: “Naah nan jon Jɔnn ban lisagilin ni, ni nan tiɛr ke ni tan yin kan baa? Igbingbaan yan wee ntafaam daarin naa?

⁸Naa ye man ke, ni nan nyan jon ke ni tan kan baa? Uninfo wan yee tiwann yɔŋann bee? Aai, ban yee nnaam a wan yɔɔrin be ibɔrniin le.

⁹Ke ni lee nan jon ke ni tan kan baa? Ulinlenn naa? N bei ni le, u jon ulinlenn na.

¹⁰U yaa bɔr le Uwonbɔr a gbɔŋ pii nan sɔb ki wɔɔn ke, ‘N li tun n toom un liir a nintogil, ki tan mann a dam a sam.’

¹¹N bei ni ibamɔn le: Baa laa nyi ma uba wee u daan jon Jɔnn Wan nan Fu Bininfob Uwonbɔr a Nyunfulin ni, amaa hali wan nan joor paab a naamin ni jon Jɔnn na.

¹²Naah nyan Jɔnn Wan nan Fu Bininfob Uwonbɔr a Nyunfulin a yonn ki nan kpaa daandaan nan, paab a naamin yabirig le nin ikɔn, le ban kɔnn nnaam nmɔn choo mi ki ŋmag.

¹³Nan bu-n Bilinlemin biɛn nin Nsiimin pii nan pag ilinlen leen na, le Jɔnn nin dan.

¹⁴Ni ye ni ban ni che tibɔr nmɔn ke, u ma ye Elaja wan nan yin dan ni.

¹⁵Wan jɔɔ itul ke, ni che un gbir.

¹⁶“Nim daandaan nan a ninfob, n yin ta ni ki bigin baa? Ni nann nbuwaab kaah ti ŋa ke bin lagin tab ki tan ka kinyaŋin ki yi tab ke:

¹⁷‘Ti pee iwol ki tenn ni, le naa waa. Le ti mɔr tikpemɔr ki tenn ni, le naa fabin ni!’

¹⁸Nan bu-n Jɔnn nan dan le ki lolig bimɔb, kaa nyu ndaami, le bi ke, ‘U waar le.’

¹⁹Le Uninfosaal a Big nan foon ki ji ki nyu, le bi ji ke, ‘Bin lig, u ye ujijir le nin udanyugbeer, ki ji ye bilanpogaab nin tibirdam a jɔ.’ Amaa nlangɔr kaam le wɔɔn mi bamɔn.”

²⁰Le Yisa piin ki pag ki bii ntim man nan kan u garil a toon gbingbemi yan wee u tun ni, nan bu-n baah nan kpenn bi binbemin.

²¹“Woo Korazin yaab; woo Befisada yaab, ni ye ligaril a toon gbingbemi nan, nan bi tun Taya nin Sidonn a timin, ke naah nan tun man ni timin nan ke, naah bi nan bi jiɛn bi toonbir weem, ki pug bi ba nfatama.

²²Amaa n bei ni le, lidaal lan wee Uwonbɔr na yin ji bininfob tibɔr nan, ni tudaril na li jo Taya nin Sidonn yaab yaal.

²³Ke nim Kapeniɛm yaab, Uwonbɔr na li don ni papaab baa? Aai. Ni yin jiir kitakpiin tiŋ le, ni ye ligaril a toon gbingbemi nan, nan bi tun Sodom a tiŋ ke naah tun man ni tiŋ nan ke, Sodom a tiŋ la bi li be.

²⁴Amaa n bei ni le, tibɔr a ji daal, ni tudaril na li jo Sodom yaab yaal.”

²⁵Iyaayoo nmɔn le Yisa len ke, “N Baa wan ye paab nin tum a Yudaau nan, n pooriŋ, nan bu-n a ta a bɔrin ki woon bilandam nin bibiɛndam, amaa le ki kpiir ti ki wɔɔn nbuwaab finfim;

²⁶Nn, n Baa ŋaah ban nin tun man le yen.

²⁷“Tɔ, n Baa le wɔɔm tibɔr nan biɛn. Uba kaa nyi min Bija-n kaah ye wan ni see n Baa-n; le uba mu kaa nyi n Baa-n ni, see min, wan ye u bija nan, ke maah kpiir ki wɔɔn ban wee n ban ni.

²⁸“Ni dan n ban ni, nim ban biɛn tu itug yan kpiɛg ki bag nan, wee n sei ni lifooril.

²⁹Ta n daagin ki paan a ba bu, wee ki tinn n ban, nan bu-n n ye jiininbadaan le ki jɔɔ jiininba n sufu ni, wee ni naam nkan lifooril.

³⁰Nan bu-n N nɔɔm kaa pɔɔ le n tugil kaa kpiɛgi.”