Read Konkomba Matiu 12 Bible Online

Matiu 12 - Konkomba bible

Matiu 12

¹Iyaayoo nmɔn Yisa nin u bɔɔnɔɔb nan chaa ki tan foo biyookpaab biba ni likpakɔɔl daal; le nkom jɔɔ u bɔɔnɔɔbin, le bi genn iyoo ki pur ki ŋma.

²Farasii yaab kaah kan man ni, le bi bei Yisa ke, “Lig! A bɔɔnɔɔb tun nan wee nsiim kaa chee sei nin ti li tun likpakɔɔl daal le.”

³Le u jiin ke, “Naa karin Defid kaah nan tun man n-yonn man wee nkom nan choo u ma nin u ninɔɔtabin naa?

⁴U nan kɔɔ iwonjiɛn niin n-yaan le, ki tan yuur kasi a boroboro-n[9] le u ma nin u ninɔɔtabin ŋman, amaa nsiim mu kaa nan chee sei nin bi ni uba n ŋman boroboro nmɔn ni, see Uwonbɔr a minmanib a binba.

⁵Bee naa karin nsiim a gbɔŋin, biminmanib kaah ti tun man likpakɔɔl daal biɛn, ki bii nsiimin, amaa wee kaa sin jɔɔ tibirin naa?

⁶N bei ni le ke, wan yab jon iwonjiɛn niin be do.

⁷Ni ye ni bi nyi ke ‘Uwonbɔr ban linyunyunbasanl le ki jon kumanug’ ke, naa bi li pag ki bii ban kaa jɔɔ biri.

⁸Nan bu-n Uninfosaal a Big le ye likpakɔɔl daal nmɔn a yudaau.”

⁹Le Yisa nyan nin yaan ki jon tan kɔɔ bi wonjiɛndiigin,

¹⁰uja uba mu nan be niin, le u nɔɔnkpaŋ kpo. Le biba mu ban bin kan Yisa a bir le ki bii u; mambu, le bi baan u ke, “Ti siim chee sei nin uninfo li teb ubaar likpakɔɔl daal waa?”

¹¹Le u mu ji labir ki baan bi ke, “Ni ye ni ni uba bi jɔɔ upee uba, wee ni ye upee nmɔn tan lu kinyunbuŋin likpakɔɔl daal ke, waa li don u likpakɔɔl daal nmɔn naa?

¹²Ni li nyi ke uninfosaal jɔɔ tinyɔɔr ki jon upeeu! Mambu, nsiim chee sei nin ti li tun itoon ŋan likpakɔɔl daala.”

¹³Le u bei uja-n ke, “Tann a nɔɔu.” Le u tann, le mi jir pɔɔg ke mi miɛnin ni.

¹⁴Amaa le Farasii yaabin nyan nkaafiin, ki lol baah li ŋa man ki ku Yisa.

¹⁵Le Yisa biɛ bi lol nmɔn, ki nyan niin. Le bininfob takpem nɔɔ u bɔɔn. Le u che bibaarib biɛn kan kutebug,

¹⁶le ki kpaan bi ke bi laa ta u ki mɔɔn ni.

¹⁷U nan tun man le, ke nan wee ulinlenn Azaya nan sɔbin ngbeen.

¹⁸“N toontunnu sɔ, u ma le n gann, wan wee n jiɛ, le n pool sɔɔn u bu. N li ta n naaŋin ki ŋa u ni. Le u li mɔɔn tibɔbamɔnn ki sei ibol biɛn.

¹⁹Waa na yin jɔɔ limɔkpeli bee ki mɔri. Uba mu kaa li gbir u kukɔl isanjal bu.

²⁰Waa na yin gen ligbingbaanl lan gen ki gbiɛ gbaari, ki mu kaa ji na yin junn fila kan kaa gaan nbamɔm nan a ŋmiim ki gbaari. Hali nin waah na li che tibɔbamɔnn nkan nyaŋim.

²¹U yinl bu le ibol biɛn nan na li jɔɔ tama.”

²²Le bi nan ŋmagin uja uba le nnaanbiim be u ni, ki ŋa u kubirug, ki ji ŋa u ujɔɔn, le Yisa che u kan kutebug, ki nin gaa ki sin pag.

²³Le ni nan ŋa bininfobin ligaril, le bi baan tab ke, “U ma ye Defid a yaabilin naa?”

²⁴Amaa Farasii yaabin ma kaah gbir man nmɔn, le bi len ke “Nnaanbiim a bɔru le sei u npɔɔn nmɔn, ke u li nyan nnaanbiim bininfobin.”

²⁵Le Yisa biɛ baah tiɛr man, ki bei bi ke, “Ni ye nnaam nba a ninfob kɔn nin tab ke, bi naam nmɔn yin gab yɔli le. Le kitiŋ kiba a ninfob bee iniin iba a ninfob kɔn nin tab ke iniin nmɔn kaa yin siri.

²⁶Ni ye Sintani ŋɔɔr Sintani ki nyan ke, ni wɔɔn ke u kɔn ki bɔgir u ba le nmɔn; ni yin ŋa nii wee u naam nmɔn n siraa?

²⁷Ke ni ye ke Beelizebul le tenn nim npɔɔn ke n nyan nnaanbiim bininfobin ke, ke nim mu, ŋma sei ni ninfobin nsan ke bi li nyan nnaanbiim maa? Wee bin ŋa ni bɔjib.

²⁸Amaa ni ye n nyann nnaanbiim, Uwonbɔr a Naaŋ bu ke, Uwonbɔr a naamin foon ni ban na.

²⁹“Bee jigin, uba li ŋa niin ki fir kɔɔ lijawagidil a niin ki tan su u wan yɔɔr ki ta nya, see ke u yaa daan chinn ki lol u iŋmin, le ki nin fir kɔɔ ki tan su u wan yɔɔr.”

³⁰“Wan kaa si n bɔɔn ke, u kɔnim le; le wan mu kaa lagin bininfob ki tenn min ke, u ŋɔɔ bi jaar le.

³¹Mambu le n bei ni nan, Uwonbɔr li jiɛn per bininfob a bir nin ban sugir Uwonbɔr nan biɛn; amaa wan sugir Kinaaŋ nan ke, Uwonbɔr kaa li nyi jiɛn per u daan ni.

³²Wan pag tibɔbir ki tenn Uninfosaal a Big ke, Uwonbɔr li jiɛn per u; amaa wan pag tibɔbir ki tenn Kasi a Naaŋin ke, Uwonbɔr kaa li nyi jiɛn per u daan dulinya nan yaan ni, bee dulinya kan na yin dan nin yaan ni.”

³³“Ŋa kisiig ki li ŋan na wee ki loon mu li ŋan, bee ŋa kisiig ki li bira wee ki loon mu li bir, nan bu-n kisiig a looi yin le bi biɛr ki.

³⁴Nim iwaalab a buwaab nan, naah ye tininfobir man nan, ni yin ŋa nii wee tibɔŋann nfir nya ni mɔnn naa? Nan bu-n nan wee uninfo tiɛr u sufu ni, ni ma nya u mɔnn.

³⁵Uninfo ŋan le tun itoon ŋan, nan bu-n u sufu ni ŋan le, le kuninfobirug mu tun titoonbir, nan bu-n u sufu bir le.

³⁶Amaa n bei ni le, tibɔr a ji daal Uwonbɔr na li ji uninfo biɛn tibɔr nin baah pag tibɔyɔɔr tan biɛn nin bu.

³⁷Nan bu-n uninfo biɛn a pipagir le na yin nyan u bee ki ku u.”

³⁸Le ban wɔɔnn Uwonbɔr a siim nin Farasii yaab bei Yisa ke, “Wan wɔɔn, ti ban ti kan ligaril a toon le a ban.”

³⁹Le u jiin bi ke, “Daandaan nan a ninfob ban ye titoonbirdam kaa si bogil liba nan ban bin kan ligaril a toon le; amaa n mu kaa yin ŋa ligaril a toonl liba ki wɔɔn bi; ulinlenn Jona a magilin a binba.

⁴⁰Nan bu-n Jona kaah nan be ujan takpen a poolin ki tan kpaa iweehn itaa nin tinyiɛr titaa nan, man le Uninfosaal a Big mu na li be tum iweehn itaa nin tinyiɛr ti taa.

⁴¹Tibɔr a ji daal, Ninefa a tiŋ a ninfob na li sir ki galin daandaan nan a ninfob, nan bu-n Jona kaah nan mɔɔn Uwonbɔr a bɔri ki sei bi n ni bi nan jiɛn bi bira; liga, uba be ki jon Jona u.

⁴²Tibɔr a ji daal Itopiya a Piibɔru na li nyann nnɔɔgan paam ki fii sir paab ki galin daandaan nan a ninfob, nin waah nan nyan kitiŋ a diɛtarig ki dan ke un nan gbir ubɔr Solomɔnn a lamgɔrikaam a bɔr, liga, uba be ki jon Solomɔnn na.

⁴³“Ni ye kinaanbiig nan nyan uninfo ni ke, ki choon yelin le ki jin kukunkɔɔg a paab ki ban lifooril a bol, le kaa ga.

⁴⁴Mambu, u ti nan bei u ba le ke, ‘N li jir iniin yan wee n nan nyan ni.’ U jir ki tan foo, ki miin iniin nin dɔ yɔli wee bi tigin ki mann ni ke,

⁴⁵ki yin jir nya le ki jo ki tan yin u nnaanbiim tab milile, ban bir ki jon u, ki ta bi dan, le bin kɔɔ ki lagin be, uninfo nmɔn a binbem li bir takpem ki jo waah nan chinn be man ni. Ni ma na yin dan daandaan nan a ninfobir nan bu.”

⁴⁶Yisa kaah la nan be pag ki tenn kuninfogbaluŋin n-yonn man ni, le ki miin u na nin u watiib dan ki nan si nkaafiin, le ki ban bin kan u.

⁴⁷Le uba bei u ke, “Lig a na nin a watiib si nkaafiin ki ban bin kaŋ.”

⁴⁸Le Yisa baan uninfo wan bei win ke, “Ŋma ye n naa? Ke ŋmam ye n watiib baa?”

⁴⁹Le u tann u nɔɔ ki wɔɔn u bɔɔnɔɔb ki len ke, “Lig n na nin n watiib sɔ.

⁵⁰Nan bu-n wan tun n Baa wan be paab nan a bam ke, u ma ye n waal nin n ninsa nin n na.”