Read Konkomba Matiu 13 Bible Online

Matiu 13 - Konkomba bible

Matiu 13

¹Lidaal nmɔn le Yisa nyan iniin nmɔn yaan ki jon ki tan kal limɔgil a gbaam.

²Le kuninfogbaluŋ lagin u ban; mambu, le u jon ki tan kɔɔ kuŋaluŋin, amaa le kuninfogbaluŋin ma sir limɔgil a dool.

³Le u gaa bi ibɔŋal tiwann takpemin ke, “Uja uba le nan jon bukpaabin ke un tan yaal u dii.

⁴Waah nan yaalin le idi iba lu nsan bu, le nnɔɔm dan ki nan pii i jin.

⁵Le iba mu lu kutintiɛg bu, nan yaan wee titann kaa yab nan, le i pan ki yabig weem, nan bu-n titann kaah kaa nan yab niin ni.

⁶Amaa le nween kaah nan toŋ n-yonn man ni, le i jɔɔg. Yaah kaa nan fir jiin inyaan nin bu, i biɛn nan kpou.

⁷Le iba mu lu ikunkon nin, le ki nan lagin pan nin ikunkon nin, le ikunkon nan yabig donn ki piin i bu.

⁸Le iba mu lu kitinŋaŋ a bol, ki naan; le iba naan kokobig le iba naan piloob piloob le iba mu naan pita pita.

⁹Wan jɔɔ itul ke ni che un gbir.”

¹⁰Le Yisa a bɔɔnɔɔbin dan u ban ki nan baan u ke, “Ba ŋa wee a gaar ibɔŋal ki tenn bininfob nan naa?”

¹¹Le u bei bi ke, “Nim ma, Uwonbɔr ta paab a naamin a bɔr woon kaar ki sei na. Amaa bi ma, waa che bi biɛ.

¹²Wan jɔɔ ke bi li sei u kpiɛ, wee u li jɔɔ takpem. Wan kaa jɔɔ ke, hali nan wee u jɔɔ-n gbaa bi li gaa ni u ban.

¹³Ni ma bu le n gaar bi ibɔŋal: “Hali baah le ligin baa ga; Hali baah le peligin baa gbir bee baa biɛri.

¹⁴Bi ŋaar nmɔn sin nan gbeen ulinlenn Azaya kaah nan len ke: ‘Ni le yin gbaa gbir le amaa le kaa biɛri; Ni le yin ga le amaa le kaa yin biɛr ni taai.

¹⁵Nan bu-n bininfobin a lam deg le, bi tuli kaa gbiri. Le bi dabin bi numbili. Naa ye man ke, bi bi li kan nin bi num ki gbir nin bi tuli ki ji biɛ nin bi sufu ni. Ki kpenn bi binbem wee n teb bi.’

¹⁶“Amaa tikaar ye ni yaar le, nan bu-n ni numbili ga le ni tuli gbir.

¹⁷N bei ni ibamɔn le, bilinlem nin bibuchim takpem nan ban bin kan naah kan nan nan, amaa le kaa kan ni, ki ji nan ban bin gbir tibɔr tan wee ni gbir nan, amaa le kaa gbiri.”

¹⁸“Ni pela wee ki biɛ ukpaar a bɔŋal nan a taai.

¹⁹Ni ye uninfo gbir paab a naam nan a bɔr nan wee kaa biɛ titaai ke, kininbɔŋ le dan ki nan choo nyan nan bun u sufu ni, ni ma ye ndibim man nan lu nsan ni.

²⁰Ndibim man nan lu kutintiɛg a paab nan mu le ye wan gbir Uwonbɔr a bɔr wee ki gaa ti weem nin nmɔn.

²¹Amaa waah kaa baan inyaan nin, ni ma bu waa ŋmag ti yuuri. Iyoo yan wee tibɔmug kaar bee limugil pii u tibɔr nmɔn bu ke, le un ta gab weem.

²²Ndibim man lu ikunkon nin nan mu le ye wan gbir Uwonbɔr a bɔr, amaa le dulinya nan a mugil nin njɔɔm a bam lu ki nyagin i bu, le taa li fir naan ni.

²³Amaa ndibim man nan lu kitinŋaŋ n-yaan nin mu le ye wan gbir Uwonbɔr a bɔr, wee ki biɛ titaai, wee i nan yabig ki naan, le iba naan kokobig bee piloob piloob bee pita pita.”

²⁴Le Yisa ji nan gaa bi libɔŋal nan ki kpiɛ ke, “Paab a naamin nann uja wan nan jon ki tan bun idibool ŋan u kpaabin le.

²⁵Amaa le baah nan dɔɔn jiɛn kunyiɛg nan, le u dataam fii ki jon ki tan bun tinaniin ki ŋmarin idibool ŋan nin yaan, le ki fɔr.

²⁶Idi-n kaah nan nan pob ki maa n-yonn man ni le bi biɛ ke tinaniin be niin.

²⁷“Le u niin a toontunnu dan ki nan baan ukpadaan nin ke, ‘N dindaau, naa ye idibool ŋan a binba le a nan ta bun a kpaab n-yaan naa? Ke ni ŋa nii wee tinaniin nan be niin naa?’

²⁸“Le u jiin ke, ‘Kidataag kiba le ŋa man.’ “Le u toontumin baan u ke, ‘A ban ti tan ŋabir tinaniin nmɔn le bee?’

²⁹“Le u jiin ke, ‘Aai, ni yin ŋab ke, ni na li ŋmar ŋab idi ŋan ni.

³⁰Mambu, ni jiɛn na wee i li be ki tan kpaa lidichiɛl a yonn, wee n che bidichiɛb n chinn ki gaar tinaniin ni ki poon wee n nyɔɔi nŋmi; wee ki ta idi ŋan ni ki kun tan ŋa n naapɔɔgin.’ ”

³¹Le Yisa ji gaa bi libɔŋal nan ki kpiɛ ke: “Paab a naamin nann nnyiɛnbim man wee uba nan ta bun u kpaabin nin le.

³²Hali gbaa maah kaa yab foo iwanbool biɛn ni, amaa le ki nan pan ki yabig ke, ki yab jon ikpasiig biɛn na, le nnɔɔm chaan ki nan tɔɔg ki bon bu.”

³³Le Yisa ji gaa bi libɔŋal ki kpiɛ ke: “Paab a naamin nann boroboro a nyɔgim man wee u pii ti ŋa ke un ta ŋmarin boroboro a yom man yabin wee min nan miir ki fugir ki do-n le.”

³⁴Ni niɛ nan biɛn, Yisa nan ta ibɔŋal le ki pag sei kuninfogbaluŋ; waa nan pag niba ki sei bi wee naa ye ibɔŋali.

³⁵Le ni nan gbeen ulinlenn kaah nan pag ki ke: “N li loor n mɔb ki gaa ibɔŋal, n li pag tiwann tan nan woo hali dulinya a naan daal.”

³⁶Le Yisa nan jiɛn kuninfogbaluŋin niin, ki jon tan kɔɔ iniin. Le u bɔɔnɔɔb dan u ban ki nan bei ke, “Wɔɔn ti tinaniin tan be bukpaabin ni a bɔŋal a taai ni.”

³⁷Le u jiin ke, “Uninfosaal a Big le ye wan nan bun idibool ŋan nin.

³⁸Dulinya nan mu le ye bukpaabin, idibool ŋan nin le ye Uwonbɔr a naamin a ninfob; le tinaniin nin mu le ye kininbɔŋ a ninfob;

³⁹kidataag kan bun tinaniin nin mu le ye ulinlaril; lidichiɛl a yonn mu le ye dulinya a diɛm; le bidichiɛb n mu le ye Uwonbɔr a malakam.

⁴⁰“Baah yin lagin tinaniin nin ki nyɔɔ nŋmi man ni, dulinya a diɛ daal na yin be man le.

⁴¹Uninfosaal a Big na li tunn malakam bi nan gann tininfobir ban che bi tab tun titoonbir nan biɛn, nin tibir dam nan biɛn.

⁴²Bi na li ta bi ki jaa nŋmi man kaa jun nin yaan, nin yaan le bi na yin be ki mɔr ki fabin ki ŋma bi nyin.

⁴³Iyaayoo nmɔn, le bibuchim na yin be bi Baa a naamin, ki nyagin ke nween kaah nyagin man ni. Wan jɔɔ itul ke ni che un gbir.

⁴⁴“Paab a naamin nann lifaal lan woo nkpapaan ni le, le uja uba nan kan ki mann woon li, le ki kun nin npopeen ki tan kɔɔr waah jɔɔ nan biɛn, le ki daa nkpapaan nmɔn.

⁴⁵“Paab a naam ji nann unyanjir wan gu jin ki ban salima konl, un daa-n le.

⁴⁶U nan tan kan lan jɔɔ linungbeel, le u jir kun ki tan kɔɔr waah jɔɔ nan biɛn, le ki daa salima nmɔn.

⁴⁷“Paab a naamin nann kujanlaaŋ kan wee bi ta jaa limɔgilin ki choo ijan a booli biɛn ni le.

⁴⁸Kujanlaaŋ nmɔn kaah nan nan gbee n-yonn man ni, le bi dar don likpengonl. Le ki kal ki gann ijan yan ŋan ni ŋa tikacharin, amaa le ki ta ijan yan kaa ŋan ni ki gab.

⁴⁹Ni na yin ye man le dulinya a diɛ daal. Malakam na li dan ki nan gann bibuchim, ki jiɛn tininfobir,

⁵⁰le bin nan ta tininfobirin ki tan jaa nŋmi takpen ni yaan. Ni yaan nmɔn le bininfob na yin mɔr ki fabin ki ŋma bi nyin.”

⁵¹Le Yisa baan ke, “Ni biɛ ibɔŋal nmɔn biɛn a taai waa?” Le bi jiin ke, “Nn.”

⁵²Le u bei bi ke, “Mambu, ban wɔɔn Uwonbɔr a siim biɛn wee bi wɔɔn bi ki jiin paab a naamin paam nbamɔm ke, bi nann uniindaan wan nyan u wan kpegir nin u wan pɔnn biɛn u naapɔɔgin le.”

⁵³Yisa kaah nan gaa ibɔŋal nan ki diɛ n-yonn man ni, le u nyan nin yaan.

⁵⁴Ki kun u baantɔɔl a tiŋ, ki tan wɔɔn bininfob Uwonbɔr a bɔr, kuwonjiɛndiigin. U wɔɔnim nmɔn nan ŋa bininfobin ligaril le, le bi baan tab ke, “La ban wee uja nan kan nlam nin npɔɔn ki tun ligaril a toon nan naa?

⁵⁵Naa ye kanpinta a bija-n le yen naa? Naa ye u na le bi yin Meri nnaa? U watiib le kaah ye Jemisi nin Josef nin Simɔnn nin Judasi nnaa?

⁵⁶Naa ye u ninsiɛb nin tim le bee? Ke u kan ni niɛ nan biɛn laa?”

⁵⁷Mambu le bi ŋuui nan fii u bu. Le u bei bi ke, “Ulinlenn kaa jɔɔ jilima u baantɔɔl a tiŋ nin u niin ni.”

⁵⁸Le waa nan tun ligaril a toon takpem niin ni, nan bu-n baah kaa nan ŋa u yada n bu.