Read Konkomba Matiu 15 Bible Online

Matiu 15 - Konkomba bible

Matiu 15

¹Iyaayoo nmɔn le Farasiim nin ban wɔɔnn Uwonbɔr a siim nan nyan Jerusalam dan ki nan baan Yisa ke,

²“Ba ŋa wee a bɔɔnɔɔb kaa nɔɔ yaajam a kaalaa? Bi ji le kaa sin nir bi nɔɔi!”

³Le Yisa jiin ke, “Ba ŋa wee nim bii Uwonbɔr a siim, ni yaaja kaal buu?

⁴Nan bu-n, Uwonbɔr ke, ‘Sei a na nin a baa jilima’; ‘Wan sug u na bee u baa ke, bin ku wa.’

⁵Amaa nim ma wɔɔn ke, u ninfo bei u na bee u baa ke, ‘Ŋaah bi li kan literil lan n ban ni, ni kpann Uwonbɔr yaan na’,

⁶naa ji ye limugil nin un sei u baa niba. Naah tun man nan, ni ma wɔɔn ke naa ŋmag Uwonbɔr a siimin ni, ni yaaja kaalin bu.

⁷Nim bilinlarib nan! Azaya kaah nan pag ilinlen leen ki jiin ni paami sin ye ibamɔn le:

⁸‘Bininfob nan tenn nim jilima bi mɔɔŋi a binba le, amaa bi sufu fɔg nima.

⁹Bi jiɛnim yɔli le, nan bu-n bi jɔɔ bininfosaalib a siinim le ki wɔɔn.’”

¹⁰Le Yisa nan yin kuninfogbaluŋin ki bei bi ke, “Ni pela man, wee ki biɛ nan wee n yin pag nan.

¹¹Nan kɔɔ uninfosaal a mɔnn kaa ŋa u ‘tijaginn’ ni; amaa nan nya u mɔnn ni, ni ma ŋaan u ‘tijaginn.’ ”

¹²Le u bɔɔnɔɔb nan dan u ban ki nan baan u ke, “A nyi ke Farasiimin kaah gbir a bɔrin bi ŋuui fii a buu?”

¹³Le u jiin ke, “Niwann nan biɛn wee n Baa wan be paab nan kaa ŋuun ni, bi li ŋab ni ki gab.

¹⁴Ni jiɛn baah, bi nann bijɔɔm le ki da bi jɔɔn tab; ke ni ye ujɔɔn da ujɔɔn kpiɛg ke, see ke bi biɛn tan lu kiboogin.”

¹⁵Le Piita len ke, “Wɔɔn ti libɔŋal nan a taai ni.”

¹⁶Le Yisa baan bi ke, “Naa le laa biɛ?

¹⁷Naa nyi ke nan kɔɔ bimɔbin yin jiir lipoolin le ki ji tan nya tigbanann ni naa?”

¹⁸Amaa tiwann tan nya bimɔbin ni nyann sufu ni le, ni ma ŋaan uninfo ‘tijaginn.’

¹⁹Uninfo a sufu ni le tipotiɛbir, nin lininfokul, nin iwanchɔgin toon, nin lipiibanl nin lijabanl, nin nnaayigim, nin tibɔkar a siɛra, nin kutingbiig nya.

²⁰Ni nan biɛn li ŋaan uninfosaal tijaginn amaa tinɔɔjaginn a jim kaa li fir ŋa uninfo tijaginn ni.”

²¹Tɔ, le Yisa nyan nin yaan ki jon Taya nin Sidonn a yagil

²²Ki miin Kenann[10] a tiŋ a pii uba mu nan be liyagil nmɔn paam, ki dan Yisa ban ki nan kuun paab ke, “Uyudaan, Defid a yaabil, sam kunyunyunbaag ni. Kinaanbiig le be n bisa ni, ki mugir u takpem.”

²³Le Yisa kaa jiin tiba; amaa le u bɔɔnɔɔb bei u ke, “Ŋɔɔr upii nan na, nan bu-n u nɔɔ ti bɔɔn le kuun.”

²⁴Le Yisa jiin ke, “Bi nan tum Iziral yaab ban nann ipee ki borin a binba ban le.”

²⁵Le upii nmɔn dan ki nan gbaan u nintogil ki bei u ke, “Uyudaan terim ni.”

²⁶Le u jiin ke, “Naa ŋan nin bin ta nbuwaab a jiir ki sei bi bɔyi.”

²⁷Le upii nmɔn jiin ke, “Nn, Uyudaan, ni sin ye ibamɔn le; amaa ibɔ yan dɔ bi dam a jijibol kaa lan ijibul yan lur bi dam a nintogil a piimi.”

²⁸Le Yisa jiin ke, “Upii, a jɔɔ yada takpem! Nan wee a ban nan tun na.” Libol nmɔn le u bisa nmɔn kan kutebug.

²⁹Le Yisa nyan niin ki jon Galilii a mɔgilin yaan. Le ki don lijɔɔl a paab ki tan kal.

³⁰Le kuninfogbaluŋ dan u ban ki ŋmag nwɔbim nin bijɔɔm nin ndiɛm nin nbirim nin ban bu iwiɛn a booli biɛn, ki nan bil u nintogil; le u che bi biɛn kan kutebug.

³¹Kuninfogbaluŋin kaah kan nbirim pag, ndiɛm choon nbamɔmin, nwɔbim mu choon, bijɔɔm a num ligir wee bi ga-n, le ni gar bi le bi pag ki don Iziral yaab a Wonbɔru a yinl.

³²Le Yisa yin u bɔɔnɔɔb ki bei bi ke, “Kunyunyunbaag jɔɔm nin bininfob nan, nan bu-n iweehn itaa sɔ le bi be n ban do, kaa jɔɔ tijiir bin ji. Maa ban bin kun nin nkomi, ke bi ta li fig nsann.”

³³Le u bɔɔnɔɔb baan u ke, “La ban wee ti yin kan tijiir kukunkɔɔg nan yaan ki sei kuninfogbaluŋ nan wee tin foo bi biɛn naa?”

³⁴Le u baan ke, “Ni jɔɔ boroboro kon i ŋaa?” Le bi jiin u ke, “Ilile nin njanbum wama.”

³⁵Le u bei bininfobin ke bin kalim tum.

³⁶Le ki yuur boroboro kon ilile nin njanbumin, ki sei Uwonbɔr kunɔɔpoog i bu, le ki war war sei u bɔɔnɔɔb, le bi ta tol bininfob nmɔn.

³⁷Le bininfobin biɛn jin ki gbee ki gur; le u bɔɔnɔɔb lagin tijiir tan gur nmɔn, le ti gbee tikachar tilile.

³⁸Bijab ban nan jin tijiir nmɔn nan ye turina le, bipiib nin nbuwaab a kanl kaa nan kpiɛ niin ni.

³⁹Ni bɔɔn bu le Yisa jaa bininfob nmɔn, le ki kɔɔ kuŋaluŋin ki jon Magadann a tingbɔŋin.