Read Konkomba Matiu 16 Bible Online

Matiu 16 - Konkomba bible

Matiu 16

¹Le Farasii yaab nin Sadusi yaab dan Yisa ban ki nan mag u lig, le ki baan u ke, un wɔɔn bi limagil lan nyan paab ni.

²Le u jiin ke, “Ni ye titalangbann nan mann kujɔɔg ke, ni ti bei le ke, ‘Won nan a taaŋ wo li ween,’

³Amaa ni ye ke njakpanyiɛn titalangbann mann ki nan bɔnn ke, ni ti bei le ke ‘Dinan ma, ntafaam li da.’ Ni bugir titalangbann a sam, amaa le kaa sin fir bugir n-yonn nan ma.

⁴Npooton nin iwanchɔgin toon a ninfob nan ban bin kan ligaril a toon; amaa maa yin tun ligaril a toonl liba ki sei bi; see Jona a garil a toonlin a binba.” Le Yisa fɔr ki jiɛn bi.

⁵Tɔ, Yisa nin u bɔɔnɔɔbin kaah tan lɔŋ limɔgil a dool n-yonn man ni, le u bɔɔnɔɔbin ni tiɛr ke baa ŋmag boroboro.

⁶Le u bei ke, “Ni li nyi ki li guu ni ba ki jiin Farasii yaab nin Sadusi yaab a boroboro a nyɔgimin bu.”

⁷Le bi nin piin ki bei tab ke, “Taah kaa ŋmag boroboro ki dan ni bu.”

⁸Le u biɛ baah pag man nmɔn ki baan bi ke, “Nim yada parim dam nan, babu wee ni bei tab ke naah kaa jɔɔ boroboro-n buu?

⁹Naa le laa biɛ ni taai yaa? Naa tiɛr maah nan ta boroboro kon iŋmu ki jin bijab turiŋmu-n naa? Tikachar ti ŋaa wee ni nan lagin tijiir tan nan gurin naa?

¹⁰Bee naa ji tiɛr bijab turina ban wee n nan ta boroboro kon ilile ki jin bin naa? Ni nan lagin tijiir tan nan gurin ki gbeen tikachar ti ŋaa?

¹¹Nii wee naa biɛ ke naa ye boroboro le n pag gaa? Ni li nyi Farasii yaab nin Sadusi yaab a boroboro a nyɔgimin bu.”

¹²Le u bɔɔnɔɔbin nin biɛ ke naa ye boroboro a nyɔgim bamɔn bu le u pag bi ke bi li guu bi ba; amaa Farasii yaab nin Sadusi yaab a wɔɔnimin bu.

¹³Yisa kaah nan tan foo Sizariya Filipi a tingbɔŋin n-yonn man ni, le ki baan u bɔɔnɔɔb ke, “Bininfob ke Uninfosaal a Big ye ŋmiɛ?”

¹⁴Le bi jiin u ke, “Biba ke a ye Jɔnn Wan Fu Bininfob Uwonbɔr a Nyunfulin le, le biba mu ke a ye Elaja le, le biba mu ke a ye Jerimaya le, bee a ye bilinlem ban nan be yaayoo a ni uba le.”

¹⁵Le u nin baan bi ke, “Amaa ke ni mu, ni ke n ye ŋmiɛ?”

¹⁶Le Simɔnn Piita bei u ke, “Fin le ye Masiya, Uwonbɔr wan fo nan a bija.”

¹⁷Le Yisa jiin ke, “Fin Simɔnn Jona a bija nan, tikaar be a bu, nan bu-n naa ye uninfosaal le kpiir tibɔr nan ki wɔɔn niŋi, amaa n Baa wan be paab nan le kpiir ti ki wɔɔniŋ.

¹⁸N beiŋ le Piita[11], a ye litangbagil le; litangbagil nan bu le n yin ta biwonjiɛm a laguŋ ki tɔɔn; le nkum kaa li fir nyaŋ bi.

¹⁹N li seiŋ paab a naamin a naanganpiim; nan wee a li lol dulinya nan yaan, ni ma le yin lol paab, nan wee a ji lor jaa dulinya nan yaan ni, man mu le ni yin lor jaa paab.”

²⁰Le Yisa nan kpaan u bɔɔnɔɔbin ke bi li nyi bin bei uba ke u ma ye Masiya.

²¹Naah nan nyan iyaayoo ki jɔɔ chaa, le Yisa nan piin ki bei u bɔɔnɔɔb ke ni kpaa le ke un jo Jerusalam, amaa kitiŋ a ninkpeeb, nin biminmanib a yudam, nin ban wɔɔnn Uwonbɔr a siim nan, li mugir u takpem ki ku u; amaa iweehn itaa daal Uwonbɔr li fiin u nkumin.

²²Le Piita yin u ki nyan ngbaan, le ki fuun u bu ke, “Aai, Uyudaan!” Tibɔbir nan kaa li dan a bu.”

²³Le Yisa gbiɛ lig Piita ki bei u ke, “Sintani nan, fɔɔr n ban na! A ye litangbag gbiɛrikaal le n samin, nan bu-n ŋaa tiɛr nan ye Uwonbɔr yaan bu, le ki tiɛr nan ye uninfosaal yaan.”

²⁴Amaa le ki bei u bɔɔnɔɔb ke, “Wan ban un nɔɔm ke, see ke u yii u ba le ki yuur u kum a dapunpunl ki nɔɔm.

²⁵Nan bu-n wan kaa chee un weeh u sayiig n bu ke, u ma na yin lan u miɛfol, amaa wan weeh u sayiig n bu ke u ma na yin kan limiɛfol nin ibamɔn.

²⁶Ni ye uninfo jɔɔ dulinya nan a jɔɔm biɛn, wee ki nan lann u miɛfol ke, ba a nyɔɔr wee u yin kan naa? Ba wee uninfo li fir ta ki kpenn u miɛfolaa?

²⁷Nan bu-n uninfosaal a Big na li jirin nin u Baa a pag, nin u malakam iyaayoo nmɔn, u na li yɔ uninfo biɛn nin u toon kaah ye man.

²⁸N bei ni ibamɔn le, biba be doo kaa li kpo see ke bi nan kan Uninfosaal a Big kaah na li foon nin nnaam man.”