Read Konkomba Matiu 17 Bible Online

Matiu 17 - Konkomba bible

Matiu 17

¹Iweehn iloob daal a bɔɔn, le Yisa ta Piita, nin Jemisi nin u na a big Jɔnn, ki don lijɔɔl lan kper a paab bi binba.

²Iyaayoo le bi kan waah kpenn. Le u num paam kpenn ki nyagin ke nween ni, le u wann yee kaar penn ki nyagin.

³Le bi kan Moziz nin Elaja degirin nba bu, ki si ki pag nin Yisa.

⁴Le Piita bei u ke, “Uyudaan, ni ŋan nin ti li be doo nan. Ni ye a bi li chee ke, n bi yin fa tinanbonn titaa le, kuba li ye a yaag, kuba mu li ye Moziz yaag, wee kuba mu li ye Elaja yaag.”

⁵Piita a mɔb kaa la nan lu tumi, le kitalangbɔŋ peŋ nyan paab ki nan degin bi bu, le bi gbir likukɔl liba pag kitilangbɔŋin, ki ke, “N bija sɔ, wan wee n num gbee, ni pelim u bɔr man.”

⁶Yisa a bɔɔnɔɔb nan kaah gbir likukɔl nmɔn ni, le bijawaam choo bi, le bi lu gbaan tum.

⁷Amaa le Yisa dan ki nan ma ma bi, le ki bei bi ke, “Ni fiim man. Ni laa san bijawaami.”

⁸Le bi yaar ki lig u, kaa ji kan uba bi ban ni see Yisa a binba.

⁹Baah nyan lijɔɔl a paab ki jiirin n-yonn man ni, le Yisa kpaan bi ke, “Ni laa bei uba naah kan nan ni, ki tan kpaa n-yonn man wee Uninfosaal a Big na li fii nkumin.”

¹⁰Le u bɔɔnɔɔb nmɔn baan u ke, “Ba ŋa wee ban wɔɔnn Uwonbɔr a siimin ke Elaja li yin chinn dan naa?”

¹¹Le u jiin ke, “Ni sin ye ibamɔn le ke Elaja nmɔn le yin chinn dan ki nan mann niwann biɛn.

¹²Amaa n bei ni le, Elaja pii nan dan na, amaa baa nan biɛ wi, ki ŋa u yɔli yɔli baah ban man. Man le bi yin ŋa Uninfosaal a Big mu, ki che un ji fala.”

¹³Le u bɔɔnɔɔbin nan biɛ ke u pag Jɔnn Wan nan Fu Bininfob Uwonbɔr a Nyunful nan a bɔr le.

¹⁴Baah nan foo kuninfogbaluŋin ban ni; le uja uba dan ki nan gbaan Yisa a nintogil. Le ki bei u ke,

¹⁵“Uyudaan, san n bija nan kunyunyunbaag ni, u lur likpikpiil le, li mugir u pam ki che ke u lur nŋmi-n nin nnyumin iyoo biɛn.

¹⁶N ta u dan a bɔɔnɔɔb ban le bi walin bin teb u gur.”

¹⁷Le Yisa jiin baan bi ke, “Ni daandaan nan a ninfob a kaa jɔɔ yada ki jɔɔ kuŋmaruŋ nan, n yin ŋa nii ki be ni ban ki yuura? Isaŋ iŋaa wee n li kan limɔril ki sei naa? Ta kibig nmɔn dan do ni.”

¹⁸Le Yisa fuun kinaanbiigin bu, le ki nyan ki jiɛn kibigin. Libol nmɔn le u kan kutebug.

¹⁹Ni bɔɔn bu, le Yisa a bɔɔnɔɔb dan u ban bi binba, ki nan baan u ke, “Ba ŋa wee tim kaa bi fir nyan kinaanbiig nmɔn naa?”

²⁰Le u jiin ke, “Ni yada kaah waarin bu. N bei ni le, ni ye ke ni ŋa yada hali wee yada-n foo nnyiɛnbim ke, ni li fir bei lijɔɔl ke, ‘Fii ki tan lu nan buu’, li sin bi yin fii le; niba kaa bi li pɔɔ ki sei ni.

²¹[12] Amaa kinaanbiig nan a booli ma, naa li fir nyan ki see ke ni lol imɔɔŋ ki miɛ Uwonbɔr.”

²²Tɔ, Yisa a bɔɔnɔɔb kaah nan lagin tab Galilii a tingbɔŋin n-yonn man ni, le u bei bi ke, “Bi na li ta Uninfosaal a Big ki ŋubin bininfob a nɔɔn.

²³Bi na li ku u, le iweehn itaa daal u li fii nkumin.” Le ni bii u bɔɔnɔɔbin a sufu.

²⁴Yisa nin u bɔɔnɔɔb kaah foo Kapeniɛm n-yonn man ni, le iwonjiɛn niin n-yaa ligaab dan ki nan baan Simɔnn Piita ke, “Wan wɔɔn ni nan, u yɔ iwonjiɛn niin a ligin naa?”

²⁵Le Piita jiin ke, “Nn, u yɔ.” Le ki jon kɔɔ ndiin. Iyaayoo nmɔn le Yisa chinn ki piin tibɔr nmɔn ki baan ke, “Simɔnn, a tiɛr nii? Bi la ba ti yɔ lampo ki tenn dulinya nan a bɔrtiib baa? Bi tɔɔl a bol a ninfob bee bicham maa?”

²⁶Le u jiin ke, “Bicham.” Le Yisa bei u ke, “Tɔ, ni ye man ke, ni wɔɔn ke bi yaa bol a ninfob a nɔɔ kaa be niin ni.

²⁷Amaa taah kaa ban ti bii bi sufu-n bu, li chaa limɔgilin ki tan ta njanpiin ki jaau. Ujan wan wee a chinn choo-n, a yaar u mɔb, a li kan ilig yan li fir yɔ min nin fin bu wee a ta yɔu.”