Read Konkomba Matiu 18 Bible Online

Matiu 18 - Konkomba bible

Matiu 18

¹Iyaayoo le u bɔɔnɔɔb dan u ban ki nan baan ke, “Ŋma ye wan jon bi biɛn paab a naamin naa?”

²Le u yin kibig kiba ki nan siin bi sisiigin,

³le ki bei bi ke, “N bei ni ibamɔn le, wan kaa kpenn u binbem wee ki be ke kibigin ke, waa li kɔɔ paab a naamin yaan ni.

⁴Wan jiin u ba ki be ke kibig nan ke, u ma na yin ye wan jon ni biɛn paab a naamin.

⁵“Wan gaa kibig nan a binbem nan a bosu n yinl bu ke, u gaa min le.

⁶“Amaa nbuwaab ban ŋa min yada nan, wan che bi ni uba tun tibir ke, ni bi li ŋan bin lol linaal jɔn u niɛn ki ta u jaa limɔgilin wee nnyum nji u.

⁷“Woo, nton li be dulinya nan a ninfob ban lar bitab wee bi tun titoonbir nan bu. Libiginl ma li dan, amaa ni li bir ki sei uninfo wan bu wee libiginl nmɔn nɔɔ ki lur bininfob bu-n.

⁸“Ni ye a nɔɔ bee a taal li yin che a tun tibir ke, a gaa mi ki tugira. Ni ye a jɔɔ nɔɔn nba bee taal liba wee ki kan limiɛfol lan kaa jɔɔ ndiɛm ke, ni jon nin a li jɔɔ inɔɔ ilee bee itaa ilee wee Uwonbɔr n nan taaŋ ki ŋa nŋmi man kaa jɔɔ njunimin yaan na.

⁹Ni ye a numbil li yin che a tun tibir ke, a logir mi gaba. Ni ye a jɔɔ numbil liba ki kan limiɛfol lan kaa jɔɔ ndiɛmin ke, ni jon nin a li jɔɔ numbil ilee wee ki tan kɔɔ nŋmi-n na.

¹⁰“Ni li nyi man ki laa yin nbuwaab nan a ni uba yɔli; nan bu-n n bei ni le, bi malakam ban be paab nan be n Baa wan be paabin a nintogil le iyoo biɛn.”

¹¹[13] Amaa Uninfosaal a Big dan ke un nan fee ban bor n le ki jaa.

¹²“Ni ye uninfo jɔɔ ipee kobig, wee upee uba nan bor ke, ni tiɛr ke u yin ŋa nii? Waa li jiɛn ipee piwiɛ nin iwiɛn ligungonl a paab le bi ŋma, le ki jo ki tan ban wan borin naa?

¹³Ni ye u kan u n-yonn man ke, n bei ni ibamɔn le, u li jɔɔ npopeen upee borikaa wan wee u kan ni bu, ki jon ipee piwiɛ nin iwiɛ yan kaa borin na.

¹⁴Man mu le ni Baa Uwonbɔr wan be paab nan kaa ban u buwaab nan a ni uba n bori.

¹⁵“Ni ye a na a big tun niba ki biiŋ ke, a jo u ban n-yonn man wee u la be u binba nan, ki tan pag ki wɔɔn u bir; wee ni ye ke u biɛ u bir ke, ni ji mann ki ŋa n nabum le nmɔn.

¹⁶Amaa ni ye ke waa chee un gbir seiŋ ke, a yin uninfo uba bee bininfob bilee ki kpiɛ a ba bu, wee nin gbeen nsiim man wɔɔn ke ‘ni ye bininfob bilee bee bita nan gbir tibɔr nmɔn ki kpiɛ a bu ke bi ma ye a siɛra dam.’

¹⁷Ni ye ke waa chee un gbir ki sei bi ke, a wɔɔn biwonjiɛm a laguŋ; ni ye ke waa ji chee un gbir ki sei biwonjiɛm a laguŋin ke, ni nin jiɛn waah wee u li be ke naah bi li be nin ban kaa ye Juu yaab man ni, bee ulanpogaarin.

¹⁸“N bei ni ibamɔn le, nan wee ni lol dulinya nan yaan nin, man le lol paab a naamin; nan mu wee ni choo lor jaa dulinya nan yaan nin, ni ma mu li choo lor jaa paab a naamin.

¹⁹“N ji bei ni le, ni ninfob bilee kpaag bimɔb dulinya nan yaan ki miɛ n Baa Uwonbɔr wan be paab nan niba bu ke, u li tun naah ban man ni ki sei ni.

²⁰Nan bu-n nan yaan wee bininfob bilee bee bita lagin tab n yinl bu-n, n mu li be bi sisiigin nin yaan.”

²¹Le Piita dan Yisa ban ki nan baan u ke, “Uyudaan, ni ye n nabig tun ki galim ke, itaa iŋaa wee n yin jiɛn per waa? Itaa ililee?”

²²Le Yisa jiin ke, “Aai, naa ye itaa ilile a binba, amaa ni ye itaa pilile nin ilile a kerim milile le.

²³Mambu, paab a naamin nann ubɔr wan nan lagin u toontum ke un kan bi ligin a pɔnlin le.

²⁴Waah piin nkam n-yonn man ni, le bi ta uja uba kɔɔn, ki miin u jɔɔ ubɔr a pɔnl salima a bɔɔlim turpiig.

²⁵Ki mu kaa li fir kan ki yɔ; le ubɔrin ke bin kɔɔr uja nmɔn nin u poo nin u buwaab nin waah jɔɔ nan biɛn, ki nan yɔ lipɔnl nmɔn.

²⁶“Le ujan nan gbaan ubɔr n-yaa nintogil nin ibalin, ki ke ‘N baa, n li yɔ li biɛn; fin mɔra.’

²⁷Le kunyunyunbaag choo ubɔrin, le u jiɛn lipɔnlin ki per u ke u li chaau.

²⁸“Ujan ma kaah nyann n-yonn man ni, le ki kenn u toontun kpiɛg wan jɔɔ u pɔnl kobig a ligibim, le u bib u ki choo u niɛn, ki ke, ‘Yɔ n pɔnlin ni daandaan nan.’

²⁹“Le u kpiɛgin mu gbaan u nintogil ki balin u, ki bei u ke ‘Mɔra, ke n li yɔ.’

³⁰“Amaa le waa chee, le ki che ke bi ta u ŋa kuloondiigin, ke see u nan yɔn u pɔnlin le u ni nya u.

³¹U toontun kpiɛtiibin kaah kan man ni, le ni bii bi sufu takpem, le bi jir ki tan bei ubɔrin nan biɛn tun.

³²“Le ubɔrin tun ke bin yin uja nmɔn ni, le ki ke, ‘Fin npookparim daan nan, ŋaah bi balim wee n jiɛn ŋaah jɔɔ n pɔnl lan ni biɛn ki per ŋin.

³³Ŋaa bi li fir san a kpiɛg nmɔn kunyunyunbaag ke maah saŋ man ni naa?’

³⁴Ubɔr nmɔn a ŋuul kaah fii ujan bu-n, le u ta u ki tan ŋa kuloondiigin ki ke u li be niin na ki tan kpaa lidaal man u na li yɔ lipɔnlin biɛn.

³⁵“Naa jiɛn per ni tab nin ni sufu biɛn ke, man le n Baa wan be paab nan yin ŋa ni mu.”