Read Konkomba Matiu 2 Bible Online

Matiu 2 - Konkomba bible

Matiu 2

¹Baah nan ma Yisa Betiliham a tiŋ kan be Judiya a tingbɔŋin n-yonn man wee Herɔd nan ye ubɔr nan. Ni bɔɔn bu le bibiɛndam biba nan nyan liwonpɔɔnl paam ki dan Jerusalam,

²ki nan baan bininfob ke, “Juu yaab a bɔru wan wee bi ma-n, u be laa? Ti kan u ŋmabil[3] le liwonpɔɔnl paam le ki dan ke ti nan jiɛn u.”

³Ubɔr Herɔd kaah nan gbir man ni, ni nan bii u ma nin Jerusalam yaab biɛn a sufu le.

⁴Le u yin kumanug a yudam nin ban wɔɔnn Uwonbɔr a siim ki baan bi ke la ban wee bi yin maa Masiya nmɔn naa?

⁵Le bi jiin u ke, “Betiliham, kitiŋ kan be Judiya a tingbɔŋin ni; nan bu-n man le ulinlenn nan sɔb:

⁶‘Amaa fin Betiliham kan be Juda a tingbɔŋin ni, ŋaa ye kitinbig Juda a paamin ni, nan bu-n a ban le ubɔr na li nya wan na li ye upeekpaar N ninfob ban ye Iziral yaab.’”

⁷Le ubɔr Herɔd woon yin bibiɛndam nmɔn ki tan baan bi, ki feen bi nbamɔm un biɛ n-yonn man wee liŋmabilin nan nyann.

⁸Le ki bei bi ke, “Ni li chaa Betiliham wee ki tan ban kibig nmɔn nbamɔma; ni tan kan ki n-yonn man ke ni jirin ki nan beim wee n mu n jo ki tan jiɛn u.”

⁹Bibiɛndamin kaah nan gbir ubɔr a bɔr ki diɛn a bɔɔn, le bi gaa nsan, le ki kan liŋmabil lan wee bi pii nan kan liwonpɔɔnl paam min, le bi nɔɔ li. Le liŋmabilin nmɔn liin bi sam ki tan sir nan yaan wee kibigin be-n a paab.

¹⁰Baah nan kan liŋmabil nmɔn ni le ni mɔŋ bi takpem.

¹¹Le bi kɔɔ iniin nmɔn yaan, ki kan kibigin nin u na Meri; le bi gbaan ki jiɛn kibig nmɔn, le ki biir bi pɔgi ki nyan ipiin ki sei kibig nmɔn; ipiin nmɔn nan ye salima, nin nnyɔgkusim, nin tulaali kan wee bi yi ki ke miɛr nan.

¹²Tɔ, le Uwonbɔr kpaan bi tidindɔgin ni, ke bi laa ji jir ubɔr Herɔd ban ni, mambu le bi ni nan nɔɔ nsan nba ki jir kun bi tiŋ.

¹³Baah nan kun a bɔɔn le Uyudaan a malaka nan dan Josef ban tidindɔgin nin, ki bei u ke. “Fiim ki ta kibiliɛg nmɔn nin ki na ki li gu chaa Ijibir a tiŋin na, hali nin maah na li yin ni, nan bu-n ubɔr Herɔd yin ban kibigin a bol le un ku ki.”

¹⁴Le u nan fii kunyiɛg ki ta kibigin nin ki na ki guun jon Ijibir a tiŋin,

¹⁵nan yaan wee u nan tan be hali nin ubɔr Herɔd kaah nan nan kpo. Ni niɛ nan biɛn nan tun ki gbeen nan wee Uwonbɔr che u linlem nan pag ke, “Ijibir a tiŋin le n yin n bija nmɔn nyann.”

¹⁶Herɔd kaah nan nan biɛ ke bibiɛndam nmɔn lar u le-n, liŋuul nan gbir u pam, le u tun bitɔtogib ke bi li chaa Betiliham nin kitinbum ni ki tan ku nbijabum ban kaa lagir ibin ilee biɛn na, ke waah nan baan bibiɛndamin wee bi bei u liŋmabilin kaah nyan n-yonn man ni.

¹⁷Le ni nan gbeen nan wee ulinlenn Jerimaya nan pagin:

¹⁸“Ti gbir ikuun Rama a tiŋin, ifabin nin tikpemɔr tan yab, Rekiɛl le mɔr u buwaab bu, ki yii ibalin, nan bu-n baa ji be.”

¹⁹Herɔd kaah nan nan kpo a bɔɔn, le Uwonbɔr a malaka degirin Josef bu tidindɔgin nin Ijibir a tiŋin,

²⁰ki bei u ke, “Fiim ki yuur kibig nmɔn nin ki na, ki jir Iziral a tingbɔŋin, nan bu-n ban nan lol bin ku kibigin kpou.”

²¹Le Josef fii ki ta kibig nmɔn nin ki na ki jir Iziral a tingbɔŋin.

²²Amaa waah nan gbir ke Akeliɛsi jin nnaam ki ka u baa Herɔd a naangbann bu Judiya a tingbɔŋin ni, le bijawaam choo u nin un kun nin yaan, le Uwonbɔr ji kpaan u tidindɔgin ni ke un jir ki li chaa Galilii a tingbɔŋin na.

²³Le u nan jon ki tan kal kitiŋ kan wee bi yi ki ke, Nazarif nan. Le ni nan gbeen nan wee bilinlem nan sɔb ki ke, “Bi na li yin u Nazarif a ninfou.”