Read Konkomba Matiu 20 Bible Online

Matiu 20 - Konkomba bible

Matiu 20

¹“Nan bu-n Paab a naam nann ukpadaan wan nan chinn nyan njakpanyiɛn ki ban bininfob un ta wee bin tan ko u kpaabin le.

²Le u chee ke u li yɔ bi lidaal a yɔr, le ki che bi jon u kpaabin.

³“Naah nan nan foo tikur tiwiɛ le ukpadaan nmɔn fii ki jon kinyaŋin, ki tan kan biba ki miin bi si le kaa tun niba.

⁴Le u bei bi ke, ‘Ni li chaa n kpaabin ki ta li kou, wee n yɔ ni nan kpaan ni.’

⁵Le bi jon. “Le ni nan nan foo tikur piig nin tilee a yoo, le u ji jir ki tan ŋa man, le tikur titaa a yonn nan foo, le u ji jir ki tan ŋa man.

⁶Le ni nan nan foo tikur tiŋmu le u jir ki tan kan biba ki miin bi si le, le u baan bi ke, ‘Ba ŋa wee ni si do yɔli liwonmunl kaa tun ni baa?’

⁷“Le bi jiin u ke, ‘Nan bu-n uba kaah kaa ta ti itoon nin bu.’ “Le u bei bi ke, ‘Ni mu li chaa n kpaabin ki ta li kou.’

⁸“Naah nan bɔŋ n-yonn man ni, le ukpadaan bei u toontum a ninkpelu ke, ‘Li chaa ki tan yin bikpaabin ni, ki nan yɔ ba. A yin yɔ bi ke, a tan piin ki li yɔ ban yɔɔn foon ni, ki tan joor ban bi chinn foon ni.’

⁹Le u toontunn ninkpelu n piin ki yɔ ban bi yɔɔn foon ni lidaal a yɔr.

¹⁰Tɔ, naah nan foo un yɔ ban bi chinn foon njakpanyiɛn nan bi yɔrin, le bi tiɛr ke bi yaa yɔr yin yab le, amaa le u yɔn bi mu lidaal a yɔr jigin.

¹¹Baah gaa bi ligi diɛ n-yonn man le bi piin ki ŋulin ki sugir ukpadaan ni,

¹²ki ke, ‘Lig, ban yɔɔn ki dan tikur tiŋmu kon wama le, amaa le tim ban chinn ki dan ki jin fala njakpanyiɛn ni, wee nween fa ti takpem nan, le tim nin bi ma nan lagin gaa tiyɔr tiba jigin naa?’

¹³“Le ukpadaan ni jiin bi ni uba ke, ‘N jɔ pela, maa ŋaliŋi. Nan bu-n taa bi jin lidaal a yɔr le a chee?

¹⁴Mambu yuurim a yɔr ki li chaau. N yin sei ban nan joor ki dan nan ke maah seiŋ man ni le.

¹⁵Naa ŋan nin n ta n ligi ki tun maah ban man naa? Bee ni jɔɔ lipiiponl le maah kaa ŋuuŋin buu?’

¹⁶“Ni ma bu, ban joor bɔɔn na li liin nsan, le ban mu lii nsan na li joor bɔɔn.”

¹⁷Yisa kaah chaa do Jerusalam n-yonn man ni, le ki yin u bɔɔnɔɔb piig nin bilee-n ki nyan ngbaan,

¹⁸“Ni lig man, ti chaa do Jerusalam le nan, le bi tan li ta Uninfosaal a Big ki ŋa kumanug a yudam nin ban wɔɔnn nsiim a nɔɔn, le bi li ke u kpaan nin nkuma,

¹⁹bi na li ta u sei ban kaa ye Juu yaab nan le bin laa u, ki boo u inaalab, ki kpaa u lidapunpunl bu, amaa iweehn itaa daal u li fii nkumin.”

²⁰Iyaayoo nmɔn le Zebedi a poo ta u buwaab bilee Jemisi nin Jɔnn ki dan Yisa ban ki nan gbaan u nintogil, ki miɛ u ke un ter u.

²¹Le Yisa baan ke, “A ban baa?” Le u jiin ke, “Che nbuwaab nan uba n nan kal a nɔɔjiim paam wee uba mu n kal a nɔɔgam paam a naamin.”

²²Yisa nan bei bi ke, “Naa nyi naah miɛ nan ni. Ni li fir nyu kiyiinyɔɔg kan wee n yin nyu nan naa?” Le bi jiin ke, “Ti li fir.”

²³Le Yisa bei bi ke, “Tɔ ni sin li fir nyu n yiinyɔɔg nmɔn yaan, naa ye min le yin gann wan li kal n nɔɔjiim bee n nɔɔgami, nan bu-n kikaabol nmɔn pii ŋa sili ki guu n Baa kaah nan yin ta ban ki kaan niin n le.”

²⁴Yisa a bɔɔnɔɔb piig nan kaah gbir man n-yonn man ni, le bi ŋuui fii bi bilee nmɔn bu.

²⁵Le Yisa lagin bi u ban, ki bei bi ke, “Ni tɔɔl nyi ke ban ŋmag ban kaa ye Juu yaab mugir bi le, le bi yudam jɔɔ tininkper a pɔɔm ki ŋmag bi

²⁶amaa nim ma bu ke ni laa ŋaan man ni sisiigin ni. Ni ye uba ban tininkper ni ni ke, ni ŋan nin un kpann utoontunn ki li tun ki tenn ni biɛn.

²⁷Ni laa che man be ni ban ni, le wan ban u liin ni sam ke un kpann ni toontunnu.

²⁸Ke Uninfosaal a Big kaah be man nan, waa dan ke bininfob ntun sei wi, amaa u dan ke u nan tun sei bininfob le, ki jin ta u miɛl ki daa bininfob takpem.”

²⁹Tɔ, Yisa nin u bɔɔnɔɔb kaah nan nan chaa nyann Jeriko n-yonn man ni, le kuninfogbaluŋ nan nɔɔ Yisa a bɔɔn.

³⁰Le bijɔɔm bilee ka nsan gbaan ki gbir ke Yisa chaan un nan nɔɔ niin le. Le bi piin ki yigin papaab ke, “Uyudaan, wan ye Defid a yaabil nan, san ti kunyunyunbaag ni.”

³¹Le kuninfogbaluŋin tiɛn bi bu ke bin ŋmin na. Le bi mann yigin papaab ke, “Uyudaan, Defid a yaabil san ti kunyunyunbaag ni.”

³²Le Yisa sir ki yin bi ki nan baan bi ke, “Ni ban n tun ba ki sei naa?”

³³Le bi jiin ke, “Uyudaan ti ban a ligir ti numbili le.”

³⁴Le kunyunyunbaag choo Yisa le u ma ma bi numbili, libol nmɔn le bi ligir, le ki nin nɔɔ u.