Read Konkomba Matiu 21 Bible Online

Matiu 21 - Konkomba bible

Matiu 21

¹Baah nan tan mal Jerusalam ki be Befeg a tiŋ kan tab lijɔɔl lan wee bi yi li ke Olif a Siigi a Jɔɔlin[14], le Yisa tun u bɔɔnɔɔbin bilee,

²ki bei bi ke, “Ni li chaa kitinbig kan be ni nintogil nan yaan. Libol nmɔn ni li kan baah lol kiboŋ nin ki big, wee ni lor i ki ta i dan n ban ni.

³Ni ye uba baan ni niba ke, ni bei u ke, Uyudaau le ban bi, u li che ni ta bi dan.”

⁴Ni niɛ nan tun ke nin gbeen nan wee ulinlenn Azaya nan len ke:

⁵“Bei Zayɔnn a tiŋ yaab ke, Ni lig man, ni bɔru li chaan ni ban ni. U ye wan jiin u ba le, ki jig kiboŋ kan ye kibonbig.”

⁶Le Yisa a bɔɔnɔɔb sin jon ki tan tun ke waah bei bi man ni,

⁷ki ŋmagin kiboŋ nin ki bigin, ki ta bi wan yeekaar ki paan i bɔɔn le Yisa jig ki.

⁸Le bininfob biba ta bi wan yɔɔr yar nsan bu, le biba mu gar isiig a bon nin tisitugir ki yar nsan bu.

⁹Le kuninfogbaluŋ kan lii u samin nin ban nan paa u bɔɔn nin nan yigin ki len ke: “Jilima daan, Ubɔr Defid a yaabil!” “Tikaar be wan chaan Uyudaan a yinl bu-n!” “A ji ye jilima daan le paab!”

¹⁰Waah nan tan kɔɔ Jerusalam n-yonn man ni, le kitiŋ nmɔn a ninfob biɛn fii, ki baan tab ke, “Ŋma sɔɔ?”

¹¹Le kuninfogbaluŋin jiin ke “Yisa wan ye ulinlenn ki nyan Nazarif kan be Galilii a tingbɔŋin ni.”

¹²Yisa nan kɔɔ iwonjiɛn niin ki ŋɔɔr ban kɔɔr nin ban daag nin biɛn nyan, ki labir biligkpenib a teebulim nin bilangekɔɔrib a jali chigin.

¹³Le ki bei bi ke, “Ni sɔb Uwonbɔr a gbɔŋin ke, U ma Uwonbɔr len ke, ‘N niin ye liwonmiɛl a niin le,’ nim le ta i kpann ‘ban feen a kikaabol.’”

¹⁴Le bijɔɔm nin nwɔbim dan u ban iwonjiɛn niin nmɔn yaan, le u che bi biɛn kan kutebug.

¹⁵Amaa kumanug a yudam nin ban wɔɔnn nsiimin kaah kan ligaril a toon yan wee u tun ni ki ji gbir nbuwaab kaah yigin iwonjiɛn niin ke, “Jilima daan, Defid a yaabil,” le ni fiin bi ŋuui.

¹⁶Le bi baan u ke, “A gbir nbuwaabin kaah len man waa?” Le Yisa jiin bi ke, “Nn, amaa naa nyi karin Uwonbɔr a gbɔŋin naa? Ni sɔb ke, ‘Nbuwaab nin nbiliɛm a mɔnn le a yin kan kupag kan ŋan.’?”

¹⁷Le u nyan ki jiɛn bi Jerusalam ki jon Betani a tiŋin ki tan dɔ.

¹⁸Waah nan chaa jir kitiŋin yaan ni le nkom choo u.

¹⁹Le u kan bikinkam kaah si nsan gbaan, le u jon bi ban, amaa kaa kan niba see tifasɔnn a binba. Le u bei kisiigin ke, “Naah nyan dinan ki chaa, ŋaa ji li lo iloon ni.” Libol nmɔn le kisiigin koor.

²⁰U bɔɔnɔɔbin kaah kan man n-yonn man ni, le ni gar bi, le bi baan tab ke, “Ni ŋa nii wee bikinkam nan koor man weemaa?”

²¹Le Yisa jiin ke, “N bei ni ibamɔn le, ni ye ni ŋa Uwonbɔr yada nin ibamɔn wee kaa biɛn u ke, ni biɛn yin tun le ke maah tun kisiig nan man nan, amaa naa ye man a binba le ni yin tun ni, ni ye ni bei lijɔɔl takpenl nan gbaa ke lin fii ki tan lu limɔgil nan yaan ke, li li fii.

²²Nan biɛn wee ni li miɛ Uwonbɔr ni bu, ni ye ni ŋa yada ke, ni sin li kan.”

²³Yisa kaah nan kɔɔ iwonjiɛn niin a loob n-yaan ki wɔɔn Uwonbɔr a bɔr n-yonn man ni, le kumanug a yudam nin kitiŋ nmɔn a ninkpeeb dan u ban ki nan baan u ke, “Ŋma a ninkper a pɔɔm wee a jɔɔ tun itoon nan biɛn naa? Ke ŋma seiŋ tininkper a pɔɔm nmɔn naa?”

²⁴Le Yisa jiin ke, “N mu jɔɔ nbinbaan ki li baan ni, ni ye ni fir jiim ke n mu li wɔɔn ni maah kan tininkper a pɔɔm nmɔn nan yaan ki jɔɔ tun.

²⁵Jɔnn a nyun fulin nan nyan laa? Li nan nyan paab a naamin le bee bininfob ban naa?” Le bi jir gbeer tab ke, “Ni ye ti ke ni nan nyan paab le ke, u li baan ti ke ba ŋa wee taa ŋa u yadaa?

²⁶Le ti mu ji san kuninfogbaluŋin bijawaam nin ti len ke, bininfob le sei u npɔɔn nmɔn, nan bu-n bininfob biɛn ŋa yada ke Jɔnn sin nan ye ulinlenn le.”

²⁷Le bi bei Yisa ke, “Taa nyi.” Le Yisa mu bei bi ke, “Tɔ, n mu kaa yin wɔɔn ni wan a ninkper a pɔɔm wee n jɔɔ tun nan ni.”

²⁸Le Yisa baan bi ke, “Ni tiɛr niin? Uja uba le nan be ki jɔɔ u buwaab bilee, le ki nan bei uninkpelin ke, ‘N big, li chaa bukpaabin ki tan ko dinan.’

²⁹“Le u bija-n bei u ke, ‘Maa li fir jo.’ Ni bɔɔn le u nan kpenn u potiɛl le ki jon.

³⁰Le u baa jon wan ye kibigin ban ki tan bei u ke waah bi bei uninkpelin man ni. Le u ma chee ke u li jo, le kaa sin jon ni.

³¹“Nbuwaab bilee nan, ŋma tun u baa a bamaa?” Le bi jiin ke, “Uninkpelin.” Le Yisa bei bi ke, “Ibamɔn le n bei ni nan, bilanpogaab nin ban tun iwanjaab toon na li chinn kɔɔ ni Uwonbɔr a niin a naam n-yaan.

³²Nan bu-n Jɔnn Wan nan Fu Bininfob Uwonbɔr a Nyunfulin nan dan ni ban ki wɔɔn ni nbuchin binben na, amaa le naa ŋa u yada, le bilanpogaab nin ban tun iwanjaab toon ni ŋa u yada. Nin naah kan nan biɛn tun nan a bɔɔn, naa kpenn ni binbem ki ŋa u yada.”

³³Le Yisa ji bei bi ke, “Ni pelim libɔŋal ki kpiɛ. Ukpaar uba le nan be ki kon u dikpaab, le ki maa ligonl ki gɔɔn bukpaabin, le ki maa libinbinl fufɔbil ke bi li kaa li paab ki guu bukpaab nmɔn, le ki mann lidiboopal bukpaabin a poolin. Le ki ta bukpaabin ŋa bitoontum a nɔɔn ke bi li liga, le ki yaar jon kitiŋ kiba.

³⁴Le idi a chiɛm nan foo, le ukpadaan nin tun u toontum ke bi li chaa bikpaabin ban ki tan gaa u dii nni.

³⁵“Le bikpaabin tan choo u toontumin, ki boo uba ki ku uba le ki sin gabir wan gurin mu itangbag.

³⁶Le u ji mann tun bitoontum biba, le bi yab ki jon ban bi chinn nin, le bikpaabin ji ŋa bi baah bi ŋa bi miɛnin man ni.

³⁷Ni joorim le u nin tun u tɔɔl a bija, le ki len ke, ‘N nyi ke bi li sei n bija nan ma jilima.’

³⁸“Amaa bikpaabin kaah nan nan lig kan u bija-n chaan nin, le bi bei tab ke, ‘Ufaajirin sɔ. Ni che ti ku u, wee u faalin kpann ti yaal.’

³⁹Bi nan choo u le ki nyan bukpaabin a gbaam ki tan ku u.

⁴⁰“Mambu ukpadaan nmɔn nan dan ke, u na yin ŋa bikpaab nan niin?”

⁴¹Le bi jiin ke, “U na li ku titoonbirdam nan nkumbirim ki diɛ, le ki ta u kpaab nmɔn ki sei bitoontum biba, ban li chee ki chiɛ u dii nmɔn ki tenn u.”

⁴²Le Yisa bei ke, “Naa la nyi karin naah sɔb Uwonbɔr a gbɔŋin man ni naa? Ni sɔb ke: “Kudaag[15] kan wee bitanmaab yii ki nan, ki ma na yin ye kijaantelig ŋaŋ, Uwonbɔr le ŋa man, le ni ye ligaril ti ban.”

⁴³“Ni ma bu, n bei ni le nan, Uwonbɔr na li gaa u naam ni ban ki sei bininfob ban li lo mi looi.

⁴⁴Amaa wan lu kudaag nan bu ke, u yin burbur le, kudaag nmɔn mu lu wan bu ke, ki yin mar u le.”

⁴⁵Kumanug a ninkpeeb nin Farasii yaab kaah gbir libɔŋal nan diɛ, le bi biɛ ke Yisa ga libɔŋalin ki den bi ma le.

⁴⁶Le bi nan ban bin choo u, le ki sin san kuninfogbaluŋin bijawaam, bininfob biɛn ŋa yada ke u sin ye ulinlenn le.