Read Konkomba Matiu 22 Bible Online

Matiu 22 - Konkomba bible

Matiu 22

¹Le Yisa ji piin gaar ibɔŋal tenn bi ke:

²“Paab a naamin nann ubɔr wan nan ŋa lipiichanil a jiir ki sei u bija le.

³U nan tun u toontum ke bin tan bei ban wee u nan yin ni ke bin dan, amaa le bi yii kaa dan ni.

⁴“Le u mann tun bi toontum biba ki len ke, ‘Ni tan bei ban wee n nan yin ni ke n ŋa tijiir a siliu: N ku n naajai nin n wankor tan jɔɔ nkpamin na, le ni biɛn ŋa siliu. Bin dan lipiichanil a jiir nmɔn a jim.’

⁵“Amaa baa nan gbir sei wi le ki yal yal, uba jon u kpaabin, le uba mu jon u kpoŋkpoŋin.

⁶Le ban gurin choo u toontumin ki ŋa bi yɔli yɔli le ki ku bi.

⁷Le ubɔrin a ŋuul nan fii. Le u tun u tɔtogib, le bi tan ku bininfokubin, le ki nyɔɔr bi tim.

⁸“Le u bei u toontumin ke, ‘Lipiichanil a jiir nan ŋa siliu, amaa bininfob ban wee n nan yin kaa kpaan bin dan ni.

⁹Ni li chaa kitiŋ poolin a sanjali bu ki tan yin ban biɛn wee ni kan, wee bin dan ki nan ji lipiichanil a jiir nmɔn.’

¹⁰Le u toontumin nyan ki jon kitiŋ poolin a sanjali bu ki tan yin ban biɛn wee bi kan, tininfobir nin bininfoŋam biɛn, le bicham dan ki nan gbee lipiichanil a niin nin kenken.

¹¹“Amaa ubɔrin kaah nan kɔɔ un nan poor bichamin, le u kan uja uba ŋmar bi sisiigin kaa yee lipiichanil a wan yɔɔri.

¹²Le ubɔrin baan ke, ‘N jɔ, a ŋa nii ki kɔɔ do wee kaa yee lipiichanil a wan yɔɔraa?’ Le uja nmɔn kaa jiin tiba.

¹³“Tɔ, le ubɔrin bei ban guu-n ke, ‘Ni lol u nɔɔi nin u taai, wee ki ta u nya tan gab nkaafiin libunbɔnlin na. Nan yaan wee timɔr nin kufabuŋ nin linyinŋmanl na yin be-n.’

¹⁴“Nan bu-n bininfob takpem le bi yin, amaa wama le bi gann.”

¹⁵Le Farasii yaab jon ki tan lol baah li ŋa man ki choo u mɔboi.

¹⁶Bi nan tun bi bɔɔnɔɔb biba nin Herɔd a ninfob u ban, le bi tan baan u ke, “Wan wɔɔn, ti nyi ke a ye ubamɔn pagir le, ki wɔɔn bininfob Uwonbɔr a bɔr nbamɔm nan bu-n a baga kaa be bininfosaalib kaah ye ban ni.

¹⁷Bei ti ni, a tiɛr niin ki jiin lampo a yɔm paam maa? Ni ŋan nin ti li yɔ lampo ki tenn Siiza bee ti laa yɔɔ?”

¹⁸Amaa le Yisa nan nyi bi potiɛbir nmɔn bu, Le ki ke, “Nim bilinlarib nan, ba ŋa wee ni ban ni pem maa?

¹⁹Ni wɔɔm biligib ban wee bi jɔɔ yɔ lampo nmɔn ni.” Le bi ta biligib nmɔn sei u.

²⁰Le u baan bi ke, “Ŋma a nunaŋ nin u daagim be biligib nmɔn buu?”

²¹Le bi jiin ke “Siiza.” Le Yisa bei bi ke, “Tɔ, ni li yɔ ki tenn Siiza nan ye u yaala, wee ki li yɔ tenn Uwonbɔr nan ye Uwonbɔr yaala.”

²²Baah gbir man nan le ni gar bi. Le bi fɔr ki jiɛn u.

²³Lidaal nmɔn le Sadusi yaab, ban ke bitakpiib kaa fii nkumin ni, biba nan dan Yisa ban ki nan baan ke,

²⁴“Wan wɔɔn, Moziz nan wɔɔn ke ni ye uja kɔɔn upii wee ki kpo kaa la ma ke, u na a big li taar lipukɔɔl nmɔn na ki maa nbuwaab ki sei utakpiir nmɔn.

²⁵Tɔ bijab bilile le nan ye pii uba a buwaab ki be ti ban le uninkpelin nan kɔɔn upii kaa maa kibig, le ki kpo, le u na a big ta lipukɔɔl nmɔn.

²⁶Ni nan ye man le ki sei wan kpiɛ bilee-n nin wan paa bita, hali nin wan tan joor bilile-n nmɔn.

²⁷Ni joorim le upii nmɔn mu nan kpo.

²⁸Daandaan nan, ni ye bitakpiib a fii daal nan foo ke, bijab bilile nan ŋma a poo nin tan yin ye upii nmɔn naa? Nan bu-n bi biɛn kɔɔn wa.”

²⁹Le Yisa jiin ke, “Ni tura, nan bu-n naa nyi Uwonbɔr a bɔri, bee waah jɔɔ npɔɔn man ni.

³⁰Bitakpiib nan fii nkumin ke, bi yin be le ke malakam kaah be Uwonbɔr a niin man ni. Lipiikɔɔnl nin lijakunl kaa na yin be.

³¹Tɔ, amaa ki jiin bitakpiib a fiim paam, naa nyi ki karin nan wee Uwonbɔr pag ni nnaa?

³²‘Min le ye Abiraham a weem nin Azig a weem nin Jekɔb a weem.’ Waa ye bitakpiib a Wonbɔr wi, amaa ban fo a Wonbɔru.”

³³Kuninfogbaluŋin kaah nan gbir u wɔɔnim nmɔn nin, le ni gar bi.

³⁴Farasii yaab kaah nan gbir ke Yisa a bɔrin nyaŋ Sadusi yaabin, le bi lagin tab.

³⁵Le bi ni uba wan nan nyi Uwonbɔr a siim biɛn nan, nan mag Yisa ki baan u nbinbaan ke,

³⁶“Wan wɔɔn, nsiim milaba jon nsiim nmɔn biɛn naa?”

³⁷Le Yisa jiin ke: “ ‘Li jiɛ a Yudaau Uwonbɔr nin a sufu biɛn, nin a naaŋ biɛn, nin a potiɛl biɛn.’

³⁸Nsiim nmɔn le lii nsan ki ji jon nsiim biɛn.

³⁹Nan kpiɛ milee nann chinchinn a siim nmɔn le: ‘Li jiɛ a kunkɔɔn tab ke ŋaah jiɛ a ba man ni.’

⁴⁰Nsiim nmɔn biɛn, nin Bilinlem a wɔɔnimin biɛn jɔn nsiim milee nan bu le.”

⁴¹Farasii yaab kaah nan lagin tab n-yonn man ni, le Yisa baan bi ke,

⁴²“Ni tiɛr niin ki jiin Masiya paamaa? Ŋma a big ye waa?” Le bi jiin ke, “Defid a bija.”

⁴³Le u baan bi ke, “Ke ba ŋa wee kinaaŋ a pɔɔm bu wee Defid nan yin u ke u Uyudaan naa? Nan bu-n u nan len ke,

⁴⁴‘Uwonbɔr nan bei n Yudaau ke: “Kalim n nɔɔjiim paam hali nin maah na li che a dataam nkpaan a taai a tɔɔn bol.’

⁴⁵Ni ye Defid yin Masiya ‘Uyudaan’ ke, nii wee u ji ye Defid a bijaa?”

⁴⁶Uba kaa nan fir jiin u binbaam nmɔn ni, mambu naah nyan lidaal nmɔn ki chaa uba kaa ji nan jɔɔ sufu ki li baan Yisa nbinbaan ni.