Read Konkomba Matiu 23 Bible Online

Matiu 23 - Konkomba bible

Matiu 23

¹Le Yisa pag ki bei kuninfogbaluŋin nin u bɔɔnɔɔb ke:

²“Ban wɔɔn Uwonbɔr a siim nin Farasii yaabin si Moziz a taalin le.

³Ni kpaa le nin ni li cheel ki nɔɔ baah wɔɔn man nin biɛn, amaa wee ki laa gaa bi binbemi, nan bu-n baa tun baah wɔɔn man nin ni.

⁴Bi boŋ itug yan kpiɛg le ki paag bininfob a bɔsipar bu, amaa bitɔɔl kaa li chee ki ta bi nɔɔbil ki ter uba wee un tu.

⁵“Bi tun man biɛn ki ban bininfob le nkan: Lig baah ta Uwonbɔr a siim ki sɔb tabin bi yutun[16] bu, ki ŋa bi daalam a mɔgbai fɔg[17] ki ban bininfobin kan;

⁶Bi jiɛ jilima a kikaabol le tijiir a chiigin, ki jiɛ bi li kaa bininkpeeb a kikaabol tiwonjiɛn dirin;

⁷ki jiɛ bininfob li poor bi nnyamin, ki li yi bi ‘ban wɔɔnn.’

⁸“Amaa nim kaa ye bin yin ni ‘ban wɔɔnn’ ni. Nan bu-n wan wɔɔnn ni ye uba le kpeŋileŋ le ni mu ye nnabum nin tab.

⁹Ni laa yi uba ke ni Baa, dulinya nan yaan ni, nan bu-n ni jɔɔ Baa uba le kpeŋileŋ, le u be paab.

¹⁰Bee bin yin ni ‘ban wɔɔnn’ ni, nan bu-n ni jɔɔ wan wɔɔnn uba le kpeŋileŋ u ma ye Masiya.

¹¹Wan ye wan jon ni biɛn ni sisiigin ni, un ŋaam ni biɛn a toontunnu.

¹²Wan don uba ke, Uwonbɔr na li jiin u, amaa wan jiin uba ke, Uwonbɔr na li don u.”

¹³“Woo nim ban wɔɔnn nsiimin nin Farasii yaab, bilinlarib nan! Ni loon paab a naam a timansanmɔnn ke bininfobin laa kɔɔ. Ni baantɔɔl kaa kɔɔ, kaa ji che ban ban bin kɔɔ-n kɔɔ.

¹⁴[18] Woo nim ban wɔɔnn nsiim nin Farasii yaab nan, nim le ye bilinlarib nmɔn, nan bu-n ni gaan ipukɔɔ a niin, ki miɛ Uwonbɔr ki yuur, ni tudaril na li yab takpem.

¹⁵“Woo nim ban wɔɔnn Uwonbɔr a siim nin Farasii yaab nan, nim le ye bilinlarib nmɔn, nan bu-n ni don imɔg ki lagir ntim ki ban wan li kpenn u binbem ki li nɔɔ ni bɔɔn le, le ni ye ni nan kan uba wee u nɔɔ ni ke, ni che u labir Sintani a ŋmiimin a big, le u binbem nmann ki kpiɛ nfim milee ki jo ni yaal.

¹⁶“Woo, nim bijɔɔm ban da ni jɔɔn tab nan! Ni ke, ‘Ni ye uninfo poo iwonjiɛn niin ke, naa ye niba, amaa ni ye u poo salima kan be iwonjiɛn niin nmɔn ke, see ke u gbeen u mɔpool nmɔn.’

¹⁷Nim bijɔɔm ban jɔr nan! Ni la jon ni tɔɔ: Salima nan bee iwonjiɛn niin yan che salima ŋa kasi nnaa?

¹⁸Le ni ji len ke, ‘Ni ye uninfo poo kumanug a binbinlin ke naa ye niba amaa ni ye u poo ipiin yan wee bi ta paan libinbinlin bu ke, see ke u gbeen u mɔsiinl nmɔn.’

¹⁹Nim bijɔɔm nan, ni la jon ni tɔɔ? Ipiin nan bee libinbinl lan che ipiin nan be kasi nnaa?

²⁰Mambu, ni ye uba poo kumanug a binbinl nan ke, u poo na ma nin nan biɛn paa li bu-n le.

²¹Ni ye ke uba mu poo iwonjiɛn niin ke, u poo iwonjiɛn niin nin wan be i yaan ni le.

²²Le wan poo paab a naam ke, u poo Uwonbɔr a naangbɔŋ le, nin wan ka ki bu-n.

²³“Woo nim ban wɔɔnn nsiim nin Farasii yaab nan, nim bilinlarib nan! Ni nyan piig a poolin, ni kpinn tan ye: Ikanjo, buŋu nin inil le, amaa le ki le jiɛn nan kpaa talar nsiim a poolin, ni ma ye ibamɔn, linyunyunbasanl, nin yada a binbem. Ni bi ye ni li tun nan joor nan le, wee ki laa sin yii nan chinn nmɔn ni.

²⁴Nim bijɔɔm ban da ni jɔɔn tab nan! Ni lor kusubig kan poo nnyunyukaam bu-n le ki gab amaa le ki sin niɛ alakoomi nin nnyum.

²⁵“Woo, nim ban wɔɔnn nsiim nin Farasii yaab nan, nim bilinlarib nan! Ni nir tiyiinyɔr nin nsam a bɔɔn le, amaa le ni poolin gbeen nin nnaayigim nin kujaŋuuŋ.

²⁶Nim Farasii yaab ban ye bijɔɔm nan, ni chinn nir tiyiinyɔr nin nsam a poolin na, ke ti bɔɔn mu li nya.

²⁷“Woo, nim ban wɔɔnn nsiim nin Farasii yaab nan, nim bilinlarib nan! Ni nann tikar tan peen, wee ti paab ŋan nbamɔmin le, amaa wee ti poolin gbee nin ikpab nin tijaginn nin le.

²⁸Man le bininfob lig ni, ni num paam nann bibuchim le amaa le ni poolin gbee nin kularug nin npooton.

²⁹“Woo, nim ban wɔɔnn nsiim nin Farasii yaab nan, nim bilinlarib nan! Ni maa bilinlem a kar, ki ŋaŋir bibuchim a kar ki siig.

³⁰Amaa le ki sin len ke, ‘Tim nan bi be ti yaajam a yonn ke, taa nan bi yin tun baah nan tun man ki ku bilinlemin ni.’

³¹Ni ma bu ni chee ke ni ye ban nan ku bilinlemin a yaabili le.

³²Mambu, ni gbaar ni yaajam kaah nan piin ki tun titoonbir tan nin na!

³³“Nim iwaalab nan! Nim iwaalab a buwaab nan! Ni yin ŋa nii wee ki ŋmar nŋmi-n a kɔɔm maa?

³⁴Mambu n li tun bilinlem nin bilandam nin ban wɔɔnn ni ban, amaa ni na li ku bibam ki kpaa bi tɔ ki boo bibam mu tiwonjiɛndirin, le ki ji ŋɔɔ bi taai ki nya kitiŋ kiba ki jo ki tɔ ni.

³⁵Le baah nan ku bibuchim ban biɛn nan a tudaril be ni bu, naah nyan bininfob buchim Ebiɛl a yonn ki tan kpaa Berekiya a bija Zakariya, wan wee bi nan ku iwonjiɛn niin nin kumanug a binbinlin a sisiigin ni.

³⁶N bei ni ibamɔn le, ni niɛ nan biɛn li dan daandaan nan a ninfo bu.

³⁷“Jerusalam yaab, Jerusalam yaab, nim ban ku bilinlem, ki ji gabir u tooi ban wee u tun bi ni ban ni itangbagin, nfim miŋaa wee n gbaar n lagin ni ke ukool kaah ti lagin u buwaab ki ŋa u jiɛgin man nin, amaa le naa chee.

³⁸Ni lig man, Uwonbɔr fɔr ki jiɛn na, ni wonjiɛn niin dɔ le yɔli.

³⁹Nan bu-n n bei ni le, naah nyan dinan ki chaa, naa ji li nyi kam mi ki tan kpaa lidaal lan wee ni na li len ke, ‘Tikaar be wan chaan Uwonbɔr a yinl bu nan.’”