Read Konkomba Matiu 25 Bible Online

Matiu 25 - Konkomba bible

Matiu 25

¹“N-yonn nmɔn paab a naam na yin nann bisapɔm piig ban kaa nyi uja wee ki nan ta bi filaam ke bin too lipiichanil daan nsan bu-n le.

²Bisapɔm biŋmu le nan ye tijɔri le biŋmu mu ye bilandam.

³Ban jɔrin nan ŋmag filaam le kaa sin ŋmag fila nyum ki guun bi ba.

⁴Le bilandamin ma ŋmag fila nyum kpiɛ man be bi filaamin ni.

⁵Lipiichanil daan nin kaa nan foon weemi, le njiɛm nan choo bisapɔmin biɛn, le bi dɔɔn jiɛn.

⁶“Le kunyiɛgtasiig le bi gbir likukɔl ke, ‘Lig lipiichanil daan ni le chaan nin! Ni nyann ki nan too u!’

⁷“Le bisapɔm piigin biɛn fii ki nyɔɔ bi filaam.

⁸Le ban jɔrin miɛ bilandamin ke, ‘Ni ŋa ni fila nyum nan wama ki sei ti. Ke ti filaam ban i junn le.’

⁹“Le bi jiin ke, ‘Aai, naa yin foo tim nin nimi. Ni li chaa ban kɔɔr fila nyumin ban ki tan da ni yaam.’

¹⁰“Amaa baah nan labir jon ke bin tan da fila nyumin, le lipiichanil daan nmɔn foon. Bilandam biŋmu ban nan ŋa sili-n ma nan nɔɔ u le ki jon ipiichan niin ki tan kɔɔ ndiin le bi loon ki kpal linaanganl.

¹¹“Ni bɔɔn bu le tijɔrin mu nan foon, ki tan si ntimansanmɔnn ki kpaar linaanganl ki yi ke, ‘Uninkpel! Uninkpel! Loor linaanganla wee ti kɔɔ.’

¹²“Le upiidaan nin, jiin bi ke, ‘N bei ni ibamɔn le, maa nyi ni.’

¹³“Mambu ni li guu ni ba man, nan bu-n naa nyi lidaal lan bee n-yonn man ni.

¹⁴“Paab a naamin ji nann uniindaan uba kaah nan ŋa sili ke un jo nsan, wee ki yin u toontum bita ki nan ta u faal ki sei bi-n le.

¹⁵U nan sei chinchinn a toontunnu salima a bɔɔlim miŋmu, ki sei wan paa-n mu salima a bɔɔlim milee, ki sei wan gurin mu salima a bɔɔlig kiba. U nan sei bi biɛn baah li fir ŋmag man le ki yaar jon u sam.

¹⁶Wan nan gaa miŋmu-n nan nyan le weem ki tan ta piin kpoŋkpoŋ, ki kan tinyɔɔr salima a bɔɔlim miŋmu ki kpiɛ i bu.

¹⁷Man mu le wan nan gaa ilee-n mu ta ŋa kpoŋkpoŋ ki kan salima a bɔɔlim milee tinyɔɔr ki kpiɛ i bu.

¹⁸Amaa wan nan gaa kiba-n ma nan nyan le, ki tan gbii kiboog ki ta u yudaau a ligi yin piin nin yaan.

¹⁹“Ni nan yuur pam, le u niin daan nmɔn ni nan jirin, le ki yin u toontumin, ke un lig bi ligi nmɔn ki kan baah kan tinyɔɔr man.

²⁰Wan nan gaa miŋmu-n kaah kɔɔ n-yonn man ni, le u ta nbɔɔlim miŋmu ki kpiɛ ki ta sei u yudaau ki ke, ‘N yudaau, a nan seim salima a bɔɔlim miŋmu le, lig, n mu tun ki kan tinyɔɔr miŋmu le ki kpiɛ.’

²¹“Le u yudaau nmɔn jiin bei u ke, ‘N faan, a ye utoontunn ŋan le! Ki ji tun nbamɔm, ŋaah ŋmag wama nan nbamɔm nan, mambu, n yin ta tiwann takpem a ninkper le ki ŋa a nɔɔn. Npopeen man wee n jɔɔ nan, ni ye min nin fin yaal le.’

²²“Le wan mu nan gaa milee-n kɔɔ u yudaau ban, ki bei u ke, ‘N yudaau, lig, a nan seim salima a bɔɔlim milee le, amaa le n ta kpeŋ ki kan milee tinyɔɔr ki kpiɛ.’

²³“Le u yudaau jiin bei u ke, ‘Nfaan, a ye utoontunn ŋan le! Ki ji tun nbamɔm, ŋaah ŋmag wama nan nbamɔm nan, mambu n yin ta tiwann takpem le ki ŋa a nɔɔn. Npopeen man wee n jɔɔ nan, ni ye min nin fin yaal le.’

²⁴“Le wan nan gaa kiba nan ma kɔɔ u yudaau ban ki bei u ke, ‘N yudaau, n nyi a bɔr kaah pɔɔ, ŋaah kaa bu nan ni a chiɛ ni ma le. Ŋaah kaa yaal tijiir tan ni, ti ma le a pii.

²⁵Mambu le n saŋ bijawaam, ki gbii kiboog, ki ta a ligin nmɔn piin. Lig, a ligi nmɔn sɔ, gaa a wan.’

²⁶“Le u yudaau jiin bei u ke, ‘Fin utoontunn wan a pool to nan a ye ugbanyagdaan le! A pii nyi ke n chiɛ nan wee maa bun le, ki ji nyi ke n pii nan wee maa yaal ni le.

²⁷Man ke, a bi ta n ligi nmɔn ki bil baŋ ni le. Maah bi nan jirin nan n bi li kan n ligi nmɔn ke tinyɔɔr paa i bu.

²⁸“ ‘Ni gaa ilig nmɔn u ban na man, ki ta kpiɛ wan jɔɔ bɔɔlim piigin na.

²⁹Nan bu-n wan biɛn jɔɔn ke bi li kpiɛ u, le un mann kan takpem, amaa wan kaa jɔɔ nan, hali waah le jɔɔ nan ni bi gaan ni le.

³⁰Wee ki ta utoontunn wan kaa jɔɔ tinyɔɔr nan gab nkaafiin libunbɔnlin na, nan yaan wee timɔr nin kufabuŋ nin linyinŋmanl na yin be.’

³¹“Uninfosaal a Bigin nan jirin nin u pag nin malakam biɛn n-yonn man ke, u na yin kal u naangbɔŋ bu le nin u pag.

³²Dulinya nan a ninfob a booli biɛn na li lagin u nintogil, le un bɔgir bi ke upeekpaar kaah ti bɔgir ipee nin iŋɔɔb man ni.

³³U na yin ta ipee le ki siin u nɔɔjiim paam, le ki ta iŋɔɔb mu ki siin u nɔɔgam paam.

³⁴“Le ubɔrin na li bei ban si u nɔɔjiim paamin ke, ‘Ni dan, nim ban wee n Baa kaab tikaar ki jaa ni bu nan, ni gaam ni faal, nnaam man wee Uwonbɔr nan ŋa mi sili ki guu ni dulinya a piinimin ni.

³⁵Nan bu-n nkom nan jɔɔm le ni seim tijiir, le nnyunyum jɔɔm le ni seim nnyum. N nan ye uchaan, le ni gaam ki ŋaam kuchɔŋ ni niin ni.

³⁶N nan choon gaan le ni seim tiwann yɔɔr yee kaar, n nan bu le, le ni terim, bi nan taam ŋa kuloondiigin le, le ni dan nan gɔnnim.’

³⁷“Le bibuchim nmɔn na li jiin ki baan u ke, ‘Uyudaan, ibayoo wee ti nan kaŋ wee nkom jɔɔŋ wee ti seiŋ tijiira? Bee ibayoo wee ti nan kaŋ wee nnyunyum jɔɔŋ wee ti seiŋ nnyuma?

³⁸Bee ibayoo wee ti nan kaŋ wee a ye uchaan wee ti gaaŋ ki ŋaaŋ kuchɔŋ ti niin yin naa? Bee a choon ki gaan wee ti seiŋ tiwann yɔɔraa?

³⁹Bee ibayoo wee ti nan kaŋ ki miin a bu wee ti teriŋ bee ibayoo wee ti nan kan a be kuloondiigin wee ti gɔnniŋ ŋaa?’

⁴⁰“Le ubɔrin mu na li jiin ke, ‘N bei ni ibamɔn le, naah nan tun man ki tenn n nabum ban waarin, ni nan ye min le ni nan tun ki tenn.’

⁴¹“Le u na li bei ban si u nɔɔgam paamin, ‘Nim ban wee limɔpool nɔɔ nan, fɔɔr n ban na, ki li chaa ki tan kɔɔ nŋmi man gaan kaa jɔɔ njunim wee Uwonbɔr mann ki guun ulinlaril nin u malakam mi.

⁴²Nan bu-n nkom nan jɔɔm, le naa seim tijiiri, le nnyunyum jɔɔm, le naa seim nnyumi,

⁴³N nan ye uchaan le, le naa gaam ni niin yin ni, n nan choon le ki gaan, amaa le naa seim tiwann yeekaar, le n nan bu ki be kuloondiigin, le naa che ni lig mi.’

⁴⁴“Iyaayoo nmɔn le bi mu na li jiin ki baan u ke, ‘Uyudaan, ibayoo wee ti nan kaŋ ki miin nkom jɔɔŋ bee nnyunyum jɔɔŋ bee a ye uchaan, bee a choon gaan, bee a bu, bee a be kuloondiigin wee taa teriŋ ŋaa?’

⁴⁵“Iyaayoo nmɔn le u li jiin ni ke, ‘N bei ni ibamɔn le, nan wee ni nan yii kaa tun sei n nabum ban waarin, ni nan ye min le.’

⁴⁶Le bi na li jo ki tan kɔɔ litudaril lan kaa jɔɔ ndiɛm ni, amaa le bibuchim n mu li jo ki tan gaa limiɛfol lan kaa jɔɔ ndiɛmin.”