Read Konkomba Matiu 26 Bible Online

Matiu 26 - Konkomba bible

Matiu 26

¹Yisa kaah nan pag ni nan biɛn ki diɛ n-yonn man ni, le u bei u bɔɔnɔɔb ke,

²“Ni nyi ke iweehn ilee le gur nin yuglagir a chiig. Bi na li ta Uninfosaal a Bigin ki sei le bin kpa u lidapunpunl bu.”

³Iyaayoo nmɔn le kumanug a yudam nin Juu yaab a ninkpeeb lagin tab kumanug a yudam a ninkpelu, wan a yinl ye Kayafasi a niin,

⁴le bi nan lolig baah li ŋa man wee ki woon ki choo Yisa ki ku u.

⁵Le ki nan ke, “Amaa ni laa che ti choo u kuchiig nan yaan ni, nan bu-n kuninfogbaluŋin li gaa tijar.”

⁶N-yonn man wee Yisa nan be Betani a tiŋin, Simɔnn wan nan ye kikɔŋin a niin,

⁷u nan be ji tijiir le, le upii uba ŋmag tulaali a lulog[19] kan a daag pɔɔ, ki nan kpaar wur Yisa a yul bu.

⁸U bɔɔnɔɔbin kaah nan kan man ni, le bi ŋulin tab ban nin liŋuul ki ke, “Ba ŋa wee upii nan bii tulaali man naa?

⁹Ti bi li fir kɔɔr tulaali nan ki gaa ilig takpen ki ta ter bilanjiim.”

¹⁰Le Yisa biɛ bi ŋulin nmɔn bu, le ki baan bi ke, “Ba ŋa wee ni mugir upii nan man naa? Ni wan nan ŋan le u tun ki seim nmɔn.

¹¹Bilanjiim man li gbaa be ni ban, amaa min kaa yin gbaa be ni ban ni.

¹²Tulaali wan wee u kpaar ŋaam nan, u ŋa n gbanann le sili nin ti piim.

¹³N bei ni ibamɔn le, nan yaan biɛn wee bi li mɔɔn tibɔŋann nan, dulinya nan yaan, bi li mɔɔn upii nan kaah tun nan nan mu, ki li ye litiɛril ki jiin u paam.”

¹⁴Iyaayoo nmɔn le Yisa a bɔɔnɔɔb piig nin bilee a ni uba, wan wee bi yi u ke Judasi Isikariya nan, jon kumanug a yudam ban,

¹⁵ki tan baan bi ke, “Ni yin seim baa wee n che Yisa nkɔɔ ni nɔɔn naa?” Le bi kan tikur a ligibim pita[20] ki sei u.

¹⁶Iyaayoo nmɔn le u nan piin ki ban isan yan wee u li ta Yisa ki ŋubin bi nɔɔn.

¹⁷Boroboro wan kaa jɔɔ nnyɔg nan a jim a piin daal, le Yisa a bɔɔnɔɔb dan u ban, ki nan baan u ke, “A ban ti jo laa ki tan ŋa sili wee a ji yuglagir a chiig a jiir aa?”

¹⁸Le u jiin ke, “Ni li chaa kitiŋ nan yaan, uja uba a niin, ki bei u ke, ‘Wan wɔɔn len ke: “N saŋi mala. N ban min nin n bɔɔnɔɔb nji yuglagir a chiig a jiir le a niin nan.’ ”

¹⁹Le u bɔɔnɔɔbin sin tun ke waah wɔɔn bi man ni, ki ŋa yuglagir a chiig a jiir nmɔn a sili.

²⁰Kujɔɔg kaah nan nan foo-n, le Yisa nin u bɔɔnɔɔb piig nin bilee-n nan kal ki be ji.

²¹Baah nan be ji n-yonn man nin, le u ke, “N bei ni ibamɔn le, ni ni uba le yin kɔɔrim.”

²²Le u bɔɔnɔɔbin a sufu bii takpem, le bi piin ki baan ubaba ke, “Uyudaan, ibamɔn buu, ni ye min lee?”

²³Le Yisa jiin ke, “Min nin wan lagin ki ŋuug kisaŋ kiba ni nan, u ma le yin kɔɔrim.

²⁴Uninfosaal a Big li jo ke naah sɔb Uwonbɔr a gbɔŋin u bu man ni. Amaa woo ni li bir ki sei wan yin kɔɔr Uninfosaal a Bigin! Baa bi ma udaan gbaa ke, ni bi sɔ.”

²⁵Le Judasi wan na yin kɔɔr Yisa nan baan ke, “Wan wɔɔn, ibamɔn buu, ni ye min lee?” Le Yisa jiin u ke, “Nn, ni ye fin le.”

²⁶Baah nan be bin ji tijiir n-yonn man ni le Yisa yuur boroboro ki sei Uwonbɔr kunɔɔpoog, le ki war war ki sei u bɔɔnɔɔbin, ki ke, “Ni gaa ki ji n gbanann le yen.”

²⁷Le u ji yuur kiyiinyɔɔg nin isiloon a daam ki sei Uwonbɔr kunɔɔpoog, le ki ta sei bi, ki ke, “Ni gaa man wee ni biɛn n nyu.

²⁸N cham man ye Uwonbɔr a poorin sɔ, ncham man kpaar ki wur bininfob takpem bu, wee bi kan tibir a jiɛnper nan.

²⁹N bei ni le, maa ji li nyi ki nyu isiloon a daam nan ni, see lidaal lan wee min nin nim na li lagin ki nyu miwanpɔm, n Baa a niin a naamin.”

³⁰Le bi nan gaah iwonjiɛn lan, ki nyan ki jon Olif a Siigi a Jɔɔl a paab.

³¹Le Yisa bei bi ke, “Kunyiɛg nan, ni biɛn li guun ki jiɛnim, nan bu-n ni sɔb Uwonbɔr a gbɔŋin ke: ‘N li ku upeekpaarin, le ipee yan biɛn wee u ti kpaa-n worin.’

³²Amaa n kum a fiim a bɔɔn ke, n li liin ni nintogil ki jo Galilii.”

³³Le Piita jiin ke, “Hali ni ye bi biɛn guun ki jiɛn niŋ ke, min kaa li ŋa man ni.”

³⁴Le Yisa jiin ke, “N beiŋ ibamɔn le, dinan a nyiɛg, a li niɛ ke ŋaa nyimi nfimitaa, le ukooja-n nin mɔɔ.”

³⁵Amaa le Piita jiin ke, “Hali ni ye min nin fin nlagin kpo ke, maa li nyi ki niɛ ke maa nyiŋi.” Le Yisa a bɔɔnɔɔbin biɛn mu len man.

³⁶Le Yisa nin u bɔɔnɔɔbin jon nan yaan wee bi yi ke Gesemani, le u bei bi ke, “Ni li ka doou, wee n jo ni nintogil ki tan miɛ Uwonbɔr.”

³⁷Le u nan ta Piita nin Zebedi a naachim bilee ki kpiɛ uba bu, le bi jon. U sufu nan piin le ki bii, le ni mugir u.

³⁸Le u bei bi ke, “Lisufubiil lan dan n bu nan yab le ki ban lin kum. Ni li be do ki li guu kpiɛg n buu.”

³⁹Le u fɔr ki jon bi nintogil wama, ki gbaan le u yutunl tan ma tum, le ki miɛ Uwonbɔr ke, “N Baa, ni bi li fir ke, a laa che n nyu kiyiinyɔɔg nan yaan ni. Amaa che a bam le n tun, wee ni laa ye min a bami.”

⁴⁰Le u nan jir u bɔɔnɔɔbin ban, ki miin bi jiɛn le. Le u baan Piita ke, “Nim kaa le li fir guur ki kpiɛ n bu kukurug kubaa?

⁴¹Ni ligira wee ki li miɛ Uwonbɔr a, wee ki laa nan kɔɔ libiginlin ni. Kinaaŋ ma ban amaa le tigbanann kaa jɔɔ npɔɔn ni.”

⁴²Le u ji nan jir nfim milee ki tan miɛ ke, “N Baa, ni ye kiyiinyɔɔg nan kaa li fir lagir n bu wee ni ye n nyu ki yaan le ke, a che a bam ntun.”

⁴³Le u jir ki tan foo ki miin u bɔɔnɔɔbin ji jiɛn na, nan bu-n njiɛm le nan jɔɔ bi.

⁴⁴Le u ji nan jir nfimitaa, ki tan miɛ Uwonbɔr ke waah pii nan chinn miɛ man nin.

⁴⁵Le ki nan jirin u bɔɔnɔɔbin ban ki baan bi ke, “Ni le la jiɛn le, ki fooraa? Ni lig, isaŋ nmɔn mala. Le bi ta Uninfosaal a Big ki ŋubin tibirdam a nɔɔ na.

⁴⁶Ni fiiu man, wee ti jo! Ni lig, wan kɔɔrimin le chaan nin!”

⁴⁷U mɔb kaa la nan lu, le Judasi wan ye u tooi piig nin bilee a ni uba, degirin nin kuninfogbaluŋ, le biba ŋmag bitɔb a jum, le biba mu ŋmag ilangul. Kumanug a yudaau nin bininkpeeb li na tun bi.

⁴⁸Judasi wan kɔɔr Yisa nan pii nan wɔɔn bininfobin siɛra le ke: “N tan poor wan ke, ni li nyi ke u ma yen, wee ki choo mu.”

⁴⁹Judasi kaah nan foon n-yonn man ni le u jon Yisa ban weem ki tan poor u ke, “Wan wɔɔn, a nyiɛg.”[21]

⁵⁰Le Yisa jiin ke, “N jɔ, tun nan wee a dan a nan tun nmɔn na.” Iyaayoo nmɔn le kuninfogbaluŋin daa dan ki nan bib Yisa.

⁵¹Ki miin u bɔɔnɔɔbin a ni uba ŋa weem ki nar bitɔb a jug ki ga kumanug a yudaau a toontunnu a tul ki par.

⁵²Le Yisa bei u ke, “Jiin a tɔb a jug nmɔn ki ŋuun kutɔɔgin na, nan bu-n wan kɔn nin kijug ke, u kpeg kijug a kum le.

⁵³Ŋaa nyi ke n bi li fir miɛ n Baa wee un terim maa, u bi li tun malakam a tɔtogib weem ni, ke bin jo turpiig nin bilee?

⁵⁴Amaa ni yin ŋa niin ki gbeen nan sɔb Uwonbɔr a gbɔŋin ke, ni kpaan ke nin sin ŋa man naa?”

⁵⁵Iyaayoo nmɔn le u baan kuninfogbaluŋin ke, “N ye ban kɔnn nin tininkper a sanliiru le ni dan nin njum nin ilangul ke ni nan choom maa? N nan ti be iwonjiɛn niin le iweehn biɛn ki wɔɔn bininfob Uwonbɔr a bɔr, amaa le naa ti chor mi.

⁵⁶Amaa ni niɛ nan tun ke nin gbeen bilinlem kaah nan sɔb nan Uwonbɔr a gbɔŋin nin le.” Iyaayoo nmɔn ki miin u bɔɔnɔɔbin biɛn guun ki jiɛn u binba le.

⁵⁷Le ban choo Yisa ta u ki jon kumanug a yudaau Kayafasi a niin, nan yaan wee ban wɔɔnn nsiim nin kitiŋ nmɔn a ninkpeeb nan ka guu-n.

⁵⁸Baah nan jɔɔ Yisa chaa-n le Piita tan be nan fɔg ki nɔɔ u bɔɔn, le ki tan paar si kumanug a yudaau nmɔn a niin a kaafiin, ki nan kɔɔ nloob, ki tan ka ban guu-n ban, ke un kan ni joorim.

⁵⁹Le kumanug a yudamin nin Juu yaab a bɔjib ban wee bi yi bi ke sanhidirin nan pɔɔn bi ba ke bin gbir tibɔkar dam a mɔnn, ki kan Yisa a bir wee ki ku u.

⁶⁰Le bininfob sin jin tibɔkar dam nmɔn a siɛra u bu, amaa le kaa kan u biri. Ni bɔɔn bu le bilee nyan sir

⁶¹ki len ke, “Uja nan le ke, ‘N jɔɔ npɔɔn man li fir ber iwonjiɛn niin nan ki ji ta iweehn itaa ki ma i.’ ”

⁶²Le kumanug a yudaau nmɔn fii sir, ki baan Yisa ke, “Ŋaa yin jiin naa? Ba a siɛra wee bijab nan pag ki galiŋaa?”

⁶³Amaa le Yisa kaa jiin tiba. Le kumanug a yudaau nmɔn mann baan u ke, “Poo Uwonbɔr wan fo nan bu, fin le sin ye Masiya Uwonbɔr a bija-n ke, a bei ti ni.”

⁶⁴Le Yisa jiin u ke, “Nn, ke ŋaah len man ni. Amaa n bei ni le: Naah nyan daandaan nan ki chaa, ni li kan Uninfosaal a Big kaah ka Liwonbɔr Gbingbemilin a nɔɔjiim paam, ki na li kan waah be paab titalangbann ni ki chaan.”

⁶⁵Le kumanug a ninkpelu nmɔn dar u baantɔɔl a daala ki chiɛ ki ke, “U sug Uwonbɔr a. Ke ti pii ji ban siɛradam ti ŋa baa? Lig, ni biɛn nan gbir waah sug Uwonbɔr man na.

⁶⁶Ke ni tiɛr niin?” Le bi jiin ke, “U kpaan nkum le.”

⁶⁷Iyaayoo nmɔn, le bi siin timɔsann ki jaar u bu, ki boo u. Le biba mu pebir u ntapam,

⁶⁸le ki ke, “Bugir ki sei ti ni, Masiya, biɛ njee ŋma pebiŋ nan naa?”

⁶⁹Piita kaah nan ka kumanug a ninkpelu n-yaa niin a loobin, le iniin nmɔn a toontun bisiɛg kiba dan u ban ki nan bei u ke, “A mu ti be nin Yisa wan nyan Galilii nan le.’

⁷⁰Amaa le Piita niɛ bininfob nmɔn biɛn ban ke, “Maa nyi nan wee a pag nan a taai.”

⁷¹Le ki sin fii nyan ki tan be ntimansanmɔnn. Le kibisiɛg kiba mu ji nyan ki tan kan u ki bei ban be niin nin ke, “Uja nan mu nan ti be nin Yisa wan nyan Nazarif nan ban le.”

⁷²Le Piita ji niɛ ki poo ke, “Maa nyi uja nmɔn ni.”

⁷³Le ni kpiɛ wama le bijab ban si niin ni fɔr ki mal Piita ki ke, “A sin ye bi ni uba le, nan bu-n a pipagir le wɔɔn man.”

⁷⁴Le Piita poo bimɔb ki jaa u ba bu ki ke, “Maa nyi uja nmɔn ni.” Libol nmɔn le ukooja mɔɔ.

⁷⁵Le Piita nin tiɛr Yisa kaah bi bei u tibɔr tan nin ke: “Ukooja kaa la li mɔ le a niɛ nfimitaa ke ŋaa nyimi.” Le Piita nyan nkaafiin ki tan mɔɔ takpem.