Read Konkomba Matiu 27 Bible Online

Matiu 27 - Konkomba bible

Matiu 27

¹Naah nan won kutaag njakpiin, le kumanug a yudam nin bininkpeeb nan bon baah li ku Yisa man.

²Le bi lol u tikulor ki ta u ki ŋubin ubɔr yudaau wan wee bi yi u ke Palati a nɔɔn.

³Judasi, wan nan kɔɔr Yisa n kaah gbir ke bi yin ku Yisa n ni, le u sufu bii pam, le u ta tikur a ligibim pitaa-n ki ta jiin ki tan sei kumanug a yudam nin bininkpeebin.

⁴Le ki len ke, “N ŋa tibira, nan bu-n n kɔɔr uninfo wan kaa jɔɔ tibira.” Le bi jiin ke, “Aho, ti mu a baga ji be niin lee? Ni ye a yaa bɔr le.”

⁵Le Judasi ta iligin ki gab iwonjiɛn niin n-yaan le ki nyan ki tan jɔn uba.

⁶Le kumanug a yudam pii nligibimin nmɔn le ki ke, “I ye ncham a ligi le, ti siim kaa chee ke ti ta iligi nmɔn ki kpiɛ iwonjiɛn niin a ligin bu.”

⁷Mambu, le bi kal ki tiɛr jiin ilig nmɔn paam, ki nan ta daa uyɔgmaar a tiŋ ke bi li pii bicham nin yaan.

⁸Mambu le che bi yi kitiŋ nmɔn ke, Ncham a tiŋ hali nin dinan.

⁹Le ni gbeen ulinlenn Jerimaya kaah nan len nan ni ke: “Bi ta tikur a ligibim pitaa ki yɔn u bu, ke Iziral yaab biba kaah chee ke u daag le ye man ni,

¹⁰ki daa uyɔgmaar a tiŋ, ke Uyudaan Uwonbɔr kaah wɔɔnim man ni.”

¹¹Le bi ta Yisa ki tan siin kitiŋ nmɔn a bɔr yudaau a nintogil, le ubɔr yudaan mu baan u ke, “Fin le sin ye Juu yaab a bɔr win naa?” Le u jiin ki ke, “Nn, ke ŋaah len man ni.”

¹²Kumanug a yudam nin bininkpeebin kaah bii u man ni, waa nan jiin niba.

¹³Le Palati baan u ke, “Ŋaa gbir baah pag man ki biiŋ ŋaa?”

¹⁴Amaa le Yisa si ŋmin hali kaa jiin niba. Le ni gar ubɔr yudaan nin takpem.

¹⁵Tɔ, yuglagir a chiig a jim a yonn biɛn ke, kitiŋ nmɔn a yudaau ti nyan uninfo uba le kuloondiigin, wan wee bininfob ban win ki jaa.

¹⁶Uba nan be kuloondiig nmɔn yaan iyaayoo, le u yinl ye Barabasi, ke bininfobin nyi u toonbir bu.

¹⁷Baah nan nan lagin n-yonn man ni, le Palati baan bi ke, “Ŋma wee ni ban n nyan u kuloondiigin ki jaa: Barabasi bee Yisa wan wee bi yi u ke Masiya nnaa?”

¹⁸Nan bu-n Palati nan nyi naah ye linunchɔril bu le bi choo Yisa ki nan ŋa u nɔɔn.

¹⁹Palati kaah la nan ka ji Yisa tibɔr nan, le u poo tun ntoon ke: “Nyan a nɔɔ uninfo wan kaa jɔɔ bir nan a bɔrin na, nan bu-n kunyiɛg n won dɔgin uja nmɔn a dindɔgin ti mugim pam.”

²⁰Le kumanug a yudam nin Juu yaab a ninkpeeb bei kuninfogbaluŋin ke bin bei Palati ke un nyan Barabasi jaau wee ki sin ku Yisa.

²¹Le Palati le ji mann ki baan bi, “Bininfob bilee nan ni ban n nyan ŋma jaa?” Le bi jiin ke “Barabasi.”

²²Le Palati le ji mann baan bi ke, “Ke Yisa wan wee bi yi u ke Masiya n ma, ni ban n ŋa u nii?” Le bi biɛn len ke, “Kpaa mu lidapunpunl buu!”

²³Le Palati baan bi ke, “Ba buu? U bir lee jann ye ti laa?” Le bi mann tiɛn paab ki ke, “Kpaa mu lidapunpunl buu!”

²⁴Palati kaah nan biɛ ke u pag ki chaa ke naa jɔɔ tinyɔɔrin, amaa wee bininfob a mɔb nan pɔɔgirin, le u ta nnyum ki nir u nɔɔi, bininfob n-yaa numin, le ki sin len ke, “N nɔɔ kaa be uja wan kaa jɔɔ tibir nan a cham a nyamin ni. Ni ye ni yaa bɔr le.”

²⁵Le bininfobin jiin ke, “Nn, che u cham li be tim nin ti buwaab a yuli buu!”

²⁶Le Palati nyan Barabasi ki jaa. Amaa le ki sin che bi boo Yisa inaalab, ki jaa bi ke bin tan kpaamu lidapunpunl buu.

²⁷Le kitiŋ nmɔn a yudaau Palati a tɔtogib ta Yisa ki kɔɔn Palati a naakoon[22], le bitɔtogib lagin ki nan gɔɔn u.

²⁸Bi nan pir u daala n le, le ki ta daalamaŋ ki yeen u,

²⁹ki loo ikunkon a yuchigirig ki chigin u. Ki ta kijaangbiɛg ki ŋubin u nɔɔjiim. Le ki gbaan u nintogil ki laa u ki ke, “Juu yaab a bɔru, ti pooriŋ!”

³⁰Ki piin ki siin timɔsann jaar u bu, le ki ga kijaangbiɛg kan wee bi bi ta ŋubin win ki ta fa fa u yul.

³¹Baah nan laa u ki gbee n-yonn man ni, le bi pir u daalamaŋin, le ki ta u tɔɔl a daala ki yeen u, le ki ta u ki jon nan yaan wee bin yin kpaa win.

³²Baah nan chaa nyan Palati a naakoon nin, le bi tan kan Sarene a tiŋ a jaa uba le u yinl ye Simɔnn, le bi choo u, ki mug u le u tu Yisa a dapunpunl.

³³Le bi tan foo nan yaan wee bi yi ke, Goligota (wee ni taai ye kuyukpabugin).

³⁴Le bi ta ndaam nin tiwantunton ki ŋmarin tab ki ta sei Yisa ke un nyu, le u len mi ki yii kaa nyun mi.

³⁵Baah nan kpa u lidapunpunl bu ki diɛ n-yonn man ni, le bi tɔn inaa ki por u wan yɔɔr,

³⁶le ki nin ka niin ki guu u.

³⁷Bi nan sɔb baah ke u tun tibir tan ni le ki tabin lidapunpunlin Yisa a yul bu: YISA WAN YE JUU YAAB A BƆRU WIN SƆ.

³⁸Bi mu ji nan kpaa binaayigib bilee ki kpiɛ Yisa bu, le uba be u nɔɔjiim paam le uba mu be u nɔɔgam paam.

³⁹Le ban choon ki jo niin nmɔn gugin bi yuli ki sugir u,

⁴⁰ke “Fin wan nan ke a li fir ber iwonjiɛn niin nan ki ji ta iweehn itaa ki maa fin sɔ, feem a ba jaau! Ni ye a sin ye Uwonbɔr a bija ke, a nya lidapunpunl nan a paab ki jirin!”

⁴¹Man le kumanug a yudam nin ban wɔɔnn Uwonbɔr a siimin nin Juu yaab a ninkpeeb n mu nan laa u.

⁴²Ki len ke “U feen bitab le ki jaar, amaa le kaa sin li fir ki fee u ba jaa! U ye Iziral a bɔru le! Che un nya lidapunpunl nan a paab ki jiirin wee ti ŋa u yada.

⁴³U gaa Uwonbɔr ki jin na Uwonbɔr li fee u ki jaa daandaan nan ni ye u ban u ke, nan bu-n u nan len ke, ‘N ye Uwonbɔr a bija le.’ ”

⁴⁴Baah nan kpaa binaayigib bilee ban ki kpiɛ u bu-n mu nan laa u man le.

⁴⁵Naah nan nan foo nwosisiigin le kutingbɔŋ bɔŋ ki tan kpaa liwonkagil a kur titaa.

⁴⁶Tikur titaa nmɔn a yonn, le Yisa kunn papaab npɔɔn ki ke “Eli, Eli, lema sabagtani.” Ni taai wɔɔn ke, “N Wonbɔru n Wonbɔru ba ŋa wee a yii maa?”

⁴⁷Ban nan si niin ni a ni biba kaah gbir u yim nmɔn ni, le bi ke, “U yi Elaja le nmɔn.”

⁴⁸Libol nmɔn le bi ni uba guun ki tan yuur chiisɔgsu ki ta bɔ lidamunmɔŋilin ki ta sagin kudaagin, le ki ta sei Yisa ke un nyu.

⁴⁹Le u tabin bei u ke “Jiɛn mu, n jee Elaja li dan ki nan fee u jaa.”

⁵⁰Le Yisa ji mann kunn papaab, le ki nin kpo.

⁵¹Iyaayoo nmɔn le likinkenl lan ti jɔn iwonjiɛn niin n-yaa sisiigin bɔgir paab ki tan kpaa tum, le tum nan dam dam, le titangbapir wogir.

⁵²Le tikar loor, le bitakpiib ban nan kpo ki ye kasi a ninfobin takpem fii nkumin.

⁵³Ki nyan tikarin, le Yisa a kum a fiim a bɔɔn le bi kɔɔ Jerusalam, le ki degir bininfob takpem bu.

⁵⁴Bitɔtogibin a ninkpelu nin bitɔtogib ban kpiɛ u bu ki guu Yisa kaah kan kutingbɔŋ kaah damin nin nan biɛn tun ni, le bijawaam choo bi takpem, le bi len ke, “Ibamɔn buu, uja nan sin ye Uwonbɔr a Bija le.”

⁵⁵Le bipiib takpem ban nan nɔɔ Yisa ki nyan Galilii ki nan ter win, nan si nan fɔg le ki lig nan tun nmɔn.

⁵⁶Bi ni biba le nan ye Meri wan nyan Magidalin, nin Meri wan ye Jemisi nin Josef a na nan, nin Zebedi a poo.

⁵⁷Kujɔɔg kaah nan foo n-yonn man ni, le Arimatiya a tiŋ a jɔɔndaau uba dan, le u yinl ye Josef u mu nan ye wan nɔɔ Yisa le.

⁵⁸Le u jon uyudaan Palati ban, ki tan miɛ u ke un che un tan nyan Yisa a gbanann ki tan pii. Le Palati jaa u ke bin tan nyan sei wa.

⁵⁹Le Josef yuur Yisa a gbanann ki pɔbin kikinkenpeŋin.

⁶⁰Le ki ta u jon ki tan pii. U baantɔɔl a kaapɔŋ kan wee u nan lug kutangbapiig bu-n le ki bilin likalool ki biin ki mɔb, le ki jir kun.

⁶¹Le Meri wan nyan Magidalin nin Meri umiɛnin nan ka mal kukaag nmɔn ban.

⁶²Naah nan yin won kutaag, Juu yaab a kpakɔɔl daalin, le kumanug a yudam nin Farasii yaab jon Palati ban.

⁶³Le ki tan bei u ke, “Ti baa, ti tiɛr ke tibɔkar daan nmɔn kaah nan be-n, u nan bei ti ke, ‘Iweehn itaa daal n li fii nkumin.’

⁶⁴Mambu, sei bitɔtob bimɔb wee bi li ka ki guu kukaag nmɔn ki tan kpaa iweehn itaa nmɔn daal, naa ye man ke, u bɔɔnɔɔb na li dan ki nan kur u, ki sin len ke u fii nkumin le. Le bi bɔkar nmɔn na li jo chinchinn yaarin.”

⁶⁵Le Palati bei bi ke, “Ni ta ban guu wee bin tan guur kukaag nmɔn naah ban man.”

⁶⁶Le bi ta ban guu le bi tan guu kukaag nmɔn, le ki ŋa titann pɔn kukaagin nbamɔm.