Read Konkomba Matiu 28 Bible Online

Matiu 28 - Konkomba bible

Matiu 28

¹Juu yaab a kpakɔɔl kaah nan jin ki jon, ki won kutaag a jakpanyiɛn, nnyantoon a chinchinn a weem daal, le Meri wan nyan Magidalin nin u Meri kpiɛg nan fii ki jon Yisa a kaag a gɔnnim.

²Libol nmɔn, kitiŋ nan dam takpem le, nan bu-n Uwonbɔr a malaka le nan nyan paab ki jiirin, ki jon kukaag n-yaan ki tan binn likalool, ki kal li bu.

³Le u gbanann nyagin ke utaal a jugin, le u wan yee wan peen a li ke kitilangbɔŋ peŋin,

⁴Le bijawaam nan choo ban nan guu kukaagin takpem, le bi nin jegil ki nan lu lu ki dɔ ke bitakpiibin.

⁵Le malaka n bei bipiibin ke, “Ni laa san bijawaami. N nyi naah ban Yisa wan wee bi nan kpa u lidapunpunl bu-n.

⁶Waa be do; u fii nkumin na, ke waah nan len man ni. Ni dan ki nan lig waah nan dɔ nan yaan ni.

⁷Ni li chaa weem weem ki tan bei u bɔɔnɔɔb ke u fii nkumin na, le ki liir ni sam ki jon Galilii u. Daandaan nan n bei ni le, nin yaan le ni li kan u.”

⁸Le bipiibin nyan kukaag nmɔn ban ki guun jon ke bin tan bei u bɔɔnɔɔbin, le bijawaam jɔɔ bi, amaa le ki sin jɔɔ npopeen.

⁹Baah nan chaa-n, libol nmɔn le Yisa kenn bi nsann ki ke, “N poor ni,” le bi dan, ki choo u taafar le ki jiɛn u.

¹⁰Le Yisa bei bi ke, “Ni laa san bijawaam. Ni li chaa man ki tan bei n nabum nmɔn ke bi li chaa Galilii, nin yaan le bi ta li kam.”

¹¹Bipiib nmɔn kaah nan chaa-n, le ban nan guu kukaag nan a ni biba nan jir kun kitiŋ poolin, ki tan bei kumanug a yudam niwann nan biɛn tun.

¹²Le kumanug a yudam nmɔn nin bininkpeebin nan lagin kal ki lol, le ki sei bikaguubin ilig takpem,

¹³le ki bei bi ke “Ni len ke, ‘Yisa a bɔɔnɔɔb le dan kunyiɛgtasiig, iyoo yan wee ni dɔ jiɛn ni, le ki nan sun kur u gbanann.’

¹⁴Ni ye Uyudaan gbir man ke, tim le li degin ni bu u ban ki nyan ni.”

¹⁵Le bikaguubin gaa iligin, le ki jir ki tan mɔɔn, bininkpeeb nmɔn kaah wɔɔn bi man ni. Le Juu yaab gaa tibɔrin ki jin hali nin dinan.

¹⁶Le Yisa a bɔɔnɔɔb piig nin uba-n jon Galilii a jɔɔl liba a paab, nan yaan wee Yisa nan bei bi ke bin jon.

¹⁷Baah nan kan u n-yonn man nin, le bi jiɛn u. Amaa bi ni bibam nan biɛnn u le.

¹⁸Le Yisa fɔɔr mal bi, ki len ke, “Uwonbɔr seim paab nin tum a ninkpera.

¹⁹Ni bu, ni li chaa kutingbɔŋ nan yaan, binib a booli biɛn ban ki ŋa bi n-yaa bɔɔnɔɔb, ki fu bi Uwonbɔr a nyunful, Baa nin Bija nin Kasi a Naaŋ a yinl bu,

²⁰ki wɔɔn bi wee bin chee nan wee n pii wɔɔn nimin n biɛn. Ibamɔn bu n yin be ni ban le hali nin dulinya a diɛm.”