Read Konkomba Matiu 8 Bible Online

Matiu 8 - Konkomba bible

Matiu 8

¹Yisa kaah nan nyan lijɔɔl a paab ki jiirin n-yonn man ni, le bininfob takpem nɔɔ u bɔɔn.

²Le ki miin kikɔŋ kiba mu dan ki nan gbaan u nintogil ki ke, “Uyudaan, ni ye a ban ke a li fir che n wiɛm nan n diɛ.”

³Le Yisa tann u nɔɔ ki maa u ki bei u ke, “N ban man, a wiɛm nmɔn n diɛm!” Libol nmɔn le u wiɛm nmɔn sin diɛ.

⁴Le Yisa kpaan u ke, “Li nyi a bei uba tibɔr nan, amaa li chaa Uwonbɔr a minmanu ban ki tan ta a ba ki wɔɔn u, wee ki jin mann kumanug kan wee Moziz nan siin ni, wee ni li ye siɛra.”

⁵Yisa kaah nan tan kɔɔ Kapeniɛm n-yonn man ni, le Rom a tɔb a sanliiru wan ŋmag bitɔtogib kobig nan dan u ban ki nan balin u ke un ter u,

⁶Le ki ke, “Uyudaan, n toontunnu le dɔɔ iniin, le u gbanann kpo, le ni mugir u pam.”

⁷Le Yisa bei u ke, “N li jo ki tan teb u.”

⁸Le bitɔb a sanliir win jiin ke, “Uyudaan, maa kpaan nin a dan n niin ni. Amaa a pag limɔbonl a binba ke n toontunnu nmɔn li kan kutebug.

⁹Nan bu-n n baantɔɔl ye wan cheel tininkper a pɔɔm le, ki ŋmag bitɔtogib n bɔɔn. N bei uba le ke, ‘Li chaau,’ le un jo; ki bei utɔ mu ke, ‘Dan ni,’ le un dan. N le bei n toontunnu ke, ‘Ŋa nan na’ ke, u yin tun man le.”

¹⁰Yisa kaah nan gbir man nmɔn, le ni gar u; le u gbiɛ lig bininfob ban nɔɔ u bɔɔn nin ki bei bi ke, “Ibamɔn le n bei ni nan, maa laa kan uba wee u jɔɔ yada nan a booli Iziral yaabin ni.

¹¹N bei ni le, bininfob takpem na li nyann titogil nin bɔɔn, le bi ma nin Abiraham nin Azig nin Jekɔb li lagin kal ki ji tijiir, paab a naamin.

¹²Amaa nim ban ye nnaam nmɔn a ninfob nan, bi na li ta ni ki gab ngbaan, libunbɔnlin; nin yaan nmɔn le ni tan yin fabin ki mɔr ki ŋma inyin.”

¹³Le Yisa bei bitɔb a sanliir win ke, “Li kun na ŋaah ŋa yada man ni, nin tun man ki seiŋa.” Le u toontunnu nmɔn sin nan kan kutebug n-yonn nmɔn.

¹⁴N-yonn man wee Yisa nan kɔɔ Piita a niin ni, le u kan Piita a chɔɔpii kaah dɔ bu, ni nan ye kugbanantoŋ le.

¹⁵Le Yisa maa u nɔɔ; le u gbanantoŋ nmɔn diɛ, le u fii ki ŋa bi kuchɔŋ.

¹⁶Lidaal nmɔn a jɔɔg, bi nan ta bininfob takpem ban wee nnaanbiim nɔɔ bin ki dan Yisa ban; le u pag limɔbonl ki nyan nnaanbiim nmɔn, le ki ji teb bibaarib nmɔn biɛn.

¹⁷Waah nan tun man ni, nan gbeen ulinlenn Azaya kaah nan pag man n le ke, “U ma baantɔɔl le gaa ti gbanantoŋ nin ti wiɛn biɛn ki tu.”

¹⁸Yisa kaah nan nan kan ki miin kuninfogbaluŋ gɔɔn u n-yonn man ni, le u bei u bɔɔnɔɔbin ke bin fiim wee bin lɔŋ limɔgil nan a dool.

¹⁹Le ban wɔɔnn Uwonbɔr a siim n-yaa ni uba dan ki nan bei u ke, “Wan wɔɔn n li nɔɔŋ ki jo ŋaah chaa nan yaan biɛn.”

²⁰Le Yisa jiin ke, “Tiŋɔgir jɔɔ ifal, le nnɔɔm man laan paab nan mu jɔɔ titar, amaa Uninfosaal a Big kaa jɔɔ waah li dɔɔn nan yaan ni.”

²¹Le u bɔɔnɔɔru uba mu nan bei u ke, “N Yudaau, che n chinn jo tan pii n baa wee.”

²²Le Yisa bei u ke, “Li nɔɔm ni wee ki che bitakpiib li pii bi taba.”

²³Le Yisa kɔɔ kuŋaluŋin, le u bɔɔnɔɔbin biɛn nɔɔ kɔɔ.

²⁴Le ki miin ntafapɔɔrim fii ki daar limɔgil n-yaan, le kunyungbɔŋ daar ki yugir kɔɔ kuŋaluŋ n-yaa poolin ki nan ban min gbee, amaa le Yisa ma dɔ ki jiɛn.

²⁵Le u bɔɔnɔɔbin dan ki nan fiin u, ki bei u ke, “Uyudaan, fee ti ki jaau ke nnyum yin ji ti le!”

²⁶Le Yisa bei bi ke, “Nim yada parim dam nan, ba ŋa wee ni san bijawaamaa?” Le ki fii ki tiɛn nfaam nin kunyungbɔŋ n bu ke min ŋmin na, le mi sin ŋmin soon.

²⁷Le ni gar bi, le bi baan tab ke, “Uninfo nan ye ninfo bolin baa? Wee nfaam nin kunyungbɔŋ chee u mɔb baa!”

²⁸Yisa kaah nan lɔŋ Galilii a mɔgilin ki foo Gadara a tiŋin nan, le bijab bilee ban nan gbee nin nnaanbiim nan nyan tikarin ki kenn u. Bi nan bir pam ni bu che ni nan pɔɔ nin uba n fir ki nɔɔ nsan man chaa tikarin nmɔn yaan.

²⁹Le bi tiɛn ki ke, “Fin Uwonbɔr a bija, tim nin fin babu, a dan a nan jin ti fala wee iyoo kaa la foo?”

³⁰Idool takpem nan si ngbaan ki mal nin yaan ki ji.

³¹Le nnaanbiim nmɔn nan balin Yisa ki ke, “Ni ye a nyan ti ke a jaa ti wee ti tan kɔɔ idool nan yaan.”

³²Le Yisa bei bi ke, “Ni li chaau!” Le bi nyan bijab n-yaan, ki jon tan kɔɔ idool nmɔn yaan; le idool nmɔn biɛn nan guun ki jiir limɔgil takpenl n-yaan le nnyum jin bi.

³³Le ban guu idool nmɔn fii ki guun jon kitiŋ n-yaan, ki tan mɔɔn nan biɛn tun, nin nnaanbiim kaah nyan bijab n-yaan man.

³⁴Lig, le ki miin kitiŋ n-yaa ninfob biɛn fii ki guun too Yisa. Baah nan kan u n-yonn man ni, le bi balin u ke un nya bi tingbɔŋin na.