Read Konkomba Matiu 9 Bible Online

Matiu 9 - Konkomba bible

Matiu 9

¹Le Yisa nan kɔɔ kuŋaluŋ, ki don limɔgilin a dool liba paam, ki kun u tiŋin.

²Lig, bininfob biba nan ŋmag; tigbanann kpiindaan uba ki ta u paan kikpaarig bu, ki ta u dan Yisa ban. Yisa kaah kan ke bi ŋa u yada man ni, le u bei ubaarin ke, “N bija, che a sufu li pɔɔu ke n jiɛn a bir ki periŋa.”

³Lig, le ban wɔɔnn Uwonbɔr a siimin a ni biba nin tiɛr bi sufu-n ke! “U sugir Uwonbɔr le nmɔn.”

⁴Yisa ma nan biɛ baah tiɛr man na, le ki baan bi ke, “Ba ŋa wee ni tiɛr tipotiɛbir nan ni sufu-n naa?

⁵Maah bei ubaarin ke, n jiɛn u bir ki per waan, bee maah bi li bei u ke, fiim ki li choon n naa, ti bɔr tilee nan ti la ba pɔɔ?

⁶Amaa wee ni biɛ ke Uninfosaal a Big jɔɔ tininkper a pɔɔm kutingbɔŋ nan yaan ki li fir jiɛn bininfob a bir ki per bi…” Le ki bei uja wan wee u gbanann kpo nan ke, “Fiim wee ki yuur a wan dɔɔn waŋ ki li kun na.”

⁷Le uja nmɔn fii ki kun.

⁸Kuninfogbaluŋin kaah kan man ni, le bijawaam choo bi, le bi pag Uwonbɔr nin waah sei uninfosaal tininkper a pɔɔm nan a booli.

⁹Le Yisa nyan nin yaan ki chaa, ki tan kan uja uba, le bi yi u ke Matiu, ki miin u ka u toon yin le bilanpogaab a nanbonn; le Yisa bei u ke, “Fii ki li nɔɔm ni.” Le u fii ki nɔɔ u.

¹⁰Yisa kaah nan be Matiu a niin ki ji kujɔɔg a jiir n-yonn man ni, le bilanpogaab biba nin tibirdam takpem kɔɔn ki nan kal kpiɛ Yisa nin u bɔɔnɔɔbin bu ki ji bi ban.

¹¹Farasii yaab kaah nan kan man ni, le bi baan u bɔɔnɔɔbin ke, “Ba ŋa wee wan wɔɔnn ni nmɔn lagin ji nin bilanpogaab nin ‘tibirdam’ ban naa?”

¹²Le Yisa gbir baah pag man nmɔn le ki len ke, “Ban pɔɔ kaa ban utebiri, see ban bu-n.

¹³Amaa ni li chaau ki tan tinn ki biɛ ni taai: ‘N ban linyunyunbasanl le, naa ye kumanugi.’ Nan bu-n maa dan ke n nan yin bibuchim le, amaa tibirdam.”

¹⁴Le Jɔnn Wan nan Fu Bininfob Uwonbɔr a Nyunfulin nan a bɔɔnɔɔb dan Yisa ban ki nan baan u ke, “Tim nin Farasii yaab lolig bimɔb le n-yonn biɛn; ke ba ŋa wee a bɔɔnɔɔbin ma kaa lolig gaa?”

¹⁵Le Yisa jiin ki baan bi ke, “Lipiichanil be ke, bicham le jɔɔ npoobiin, n-yonn man wee lipiichanil daan la be bi ban nan naa? Aai. N-yonn chaan, le bi na li nyan lipiichanil daan ni ban, iyaayoo le bi yin lol imɔɔŋ.

¹⁶“Uba kaa li ta litanl pɔnl ki legin daala kpegi, ni ye u ŋa man ke, litanl pɔnlin li chiɛ daala kpegin, le nchiɛm nmɔn mann ki yann.

¹⁷Uba mu kaa yin chee ki ta ndapɔm ki ŋuun libokpegilin ni, ni ye wan ŋa man wee ndapɔmin nan mɔɔ ke, min yin pɔɔ liboolin le, le ndaamin wur, le liboolin mu n bii. Aai bi jɔɔ ndapɔm ki ŋu liboopɔnlin le, wee ni biɛn n laa bii.”

¹⁸Yisa kaah la nan be pag ki tenn bi n-yonn man ni, lig, ki miin uyudaan uba dan ki nan gbaan u nintogil, ki bei u ke, “N bisa le kpo; mambu, dan ki nan ta a nɔɔ ki paan u bu-u, wee un kan limiɛfol.”

¹⁹Le Yisa nan fii nin u bɔɔnɔɔb le bi nɔɔ u jon.

²⁰Ki miin upii uba mu nan kan tipiir ke taa diɛri, ki tan kpaa ibin piig nin ilee; le u nan dan Yisa ban ki linn Yisa a bɔɔn le ki maa u daala takpeŋ a gbaam.

²¹Upii nmɔn nan tiɛr u sufu ni ke, “Ni ye n le pii u daala a gbaam ki maa ke, n li kan kutebug.”

²²Le Yisa gbiɛ lig ki kan u, le ki len ke, “N bisa, che a sufu li pɔɔu. Ŋaah ŋaam yada-n bu le a kan kutebug.” Libol nmɔn, le u sin kan kutebug.

²³Yisa kaah nan tan kɔɔ uyudaan a niin n-yonn man ni, le u kan biwopeeb pee iwol, le kuninfogbaluŋ mu mɔr tikpemɔr ki fabin,

²⁴le u ke, “Ni li chaau. Kibisiɛgin kaa kpo, u jiɛn le.” Amaa le bi laa u.

²⁵Baah nan ŋɔɔr bininfobin ki nyan a bɔɔn; le Yisa kɔɔ ki choo kibisiɛgin a nɔɔ, le u fii sir paab.

²⁶Le bi nan mɔɔn tibɔr nmɔn kutingbɔŋ nmɔn a gbanann biɛn.

²⁷Yisa kaah nan nyan niin ki nan jo chaa nintogil nan, le bijajɔɔm bilee nan paa u bɔɔn, le ki yin u ki len ke, “Fin Defid a yaabil! San ti kunyunyunbaag ni.”

²⁸Yisa kaah nan chaa ki tan kɔɔ iniin iba ni n-yonn man ni, le bijɔɔmin foon ki nan kɔɔ niin. Le u baan bi ke, “Ni ŋa yada ke n li fir sei ni kutebugaa?” Le bi jiin ki ke, “Nn, Uyudaan.”

²⁹Le u ta u nɔɔ ki maa binumbili, ki ke, “Naah ŋa yada man ni, nin tun man ki sei ni”;

³⁰le binumbili ligir, le u kpaan bi nbamɔm ke, “Ni li nyi ni bei uba nan tun nan bu.”

³¹Amaa le bi nyan ki mɔɔn u bɔr nmɔn kutingbɔŋ nmɔn yaan biɛn.

³²Baah nan fii ki nyan n-yonn man ni, le ki miin bi ŋmag uja uba ki dan Yisa ban, wan wee kinaanbiig nan be u ni wee waa fin pagi.

³³Le Yisa nyan kinaanbiigin uja nmɔn ni, le u ni nan piin ki pag. Ni nan gar kuninfogbaluŋin le, le bi nin pag ke, “Taa la nyi kan nan ni, tim Iziral a tiŋ nan yaan ni.”

³⁴Amaa le Farasii yaab len ke, “Nnaanbiim a bɔru le sei u npɔɔn ke un nyan nnaanbiim bininfobin.”

³⁵Yisa nan choon ki gɔnn ntintakpem nin ntinbum biɛn nin, ki kɔɔ tiwonjiɛndirin, ki mɔɔn Uwonbɔr a naam a bɔŋann ni ki wɔɔn bininfob, ki che ban bu iwiɛn a booli kan kutebug.

³⁶Waah nan kan kuninfogbaluŋin, le kunyunyunbaag choo u, nan bu-n ni nan mugir bi le bi be kaa jɔɔ wan li ter bi, ki nann ipee yan kaa jɔɔ upeekpaari.

³⁷Le u bei u bɔɔnɔɔbin ke, “Idi-n beer ki yaba, amaa le bidichiɛbin waar.

³⁸Mambu, ni li miɛ bukpaab nmɔn daan na wee un kpiɛn bidichiɛb u kpaab nmɔn yaan ni.”