Read Konkomba Mag 11 Bible Online

Mag 11 - Konkomba bible

Mag 11

¹Yisa nin u bɔɔnɔɔb kaah nan nan mal Jerusalam, ki foo ntim man wee bi yi mi ke, Befeg nin Betani nan, mi nan tab lijɔɔl lan wee bi yi ke Olif a Siigi a Jɔɔl[4] nle, le u tun u bɔɔnɔɔb bilee, ki bei bi ke,

²“Ni li chaa ntim man be ni nintogil nan, ni tan foo ke, ni li kan kiboŋ kan wee uba kaa la nyi jig ki, wee ki lol nkaafiin nin. Ni lor ki li jɔɔn n ban do.

³Ni ye uba baan ni ke ba ŋa wee ni lor kiboŋ nmɔn ke, ni bei u ke, ‘Uyudaan li ban ki, u li jiin ki weem ni.’”

⁴Le bi sin jon ki tan kan kiboŋ lol iniin iba a kaafiin. Baah sin lor ki n-yonn man nin,

⁵le bininfob biba nan si niin ki baan bi ke, “Ba ŋa wee ni lor kiboŋ nmɔn naa?”

⁶Le bi bei bi Yisa kaah bi len man nin, le bininfob nmɔn jir ŋmin, le bi lor ki jon.

⁷Baah nan ta kiboŋ nmɔn ki foo Yisa ban n-yonn man nin, le bi ta biwan yeewaŋ ki paan kiboŋ nmɔn bu, le Yisa jig.

⁸Le bininfob takpem nan jɔɔ bi kinken ki yar nsan bu, le biba mu par tifasɔnn ki ter nsan.

⁹Ban nan liir Yisa a sam nan nin ban nan paa u bɔɔn nan, bi nan yigin le ki ke, “Jilima daan! Uwonbɔr a kaar be wan dan u yinl nmɔn nan bu.

¹⁰Uwonbɔr a kaar biɛ li be ti yaaja Defid a naam man chaan nbu. A ji ye jilima daan le paab!”

¹¹Le Yisa foo Jerusalam ki kɔɔ iwonjiɛn niin n-yaan, le ki lig tiwann biɛn; naah nan na yin bɔŋ n bu, le u ma nin u bɔɔnɔɔb piig nin bilee nyan ki jir Betani a tiŋin.

¹²Ni nan won kutaag le Yisa nin u bɔɔnɔɔb nyan Betani ki jir Jerusalam; le nkom nan jɔɔ u.

¹³Le u nan kan bikinkam kaah jɔɔ tifasɔnn ki si nan fɔg. Le u jon busub nmɔn a taatum ke u ta li kan iloon, amaa u nan tan foo kaa kan niba, see tifar a binba, nan bu-n ikinkan a saŋi kaa la nan foo.

¹⁴Le u bei busub nmɔn ke, “Uba kaa ji li nyi ki ji a loon yi, la nyan dinan ki chaa.” U bɔɔnɔɔbin nan gbir u mɔboi nmɔn na.

¹⁵Le bi nan nan foo Jerusalam; le Yisa jon ki tan kɔɔ iwonjiɛn niin n-yaan, ki ŋɔɔr ban kɔɔr nin ban daag biɛn ki nyan, ki tir ban kpenn ilig a teebul ki gabir, ki liɛr ban nan kɔɔr ilanjel nan a jali ki gabir,

¹⁶waa nan chee ke uba n ji tu niba ki jo iwonjiɛn niin nmɔn yaan ni,

¹⁷le ki nan bei bininfobin ke, “Ni sɔb Uwonbɔr a gbɔŋin ke, u ma Uwonbɔr len ke, ‘Bi li yi N niin ke bininfob biɛn a wonmiɛl a niin’; le nim ta ŋa ban feen a kikaabol.”

¹⁸Le kumanug a yudam nin ban wɔɔnn Uwonbɔr a siim nan gbir waah ŋa man; le ki ni nan ban nsan man wee bi li ku u, le ki sin san u bijawaam, u wɔɔnim nan ŋa kuninfogbaluŋin ligaril le takpem.

¹⁹Kijɔɔg kaah nan nan foo n-yonn man nin, le u ma nin u bɔɔnɔɔb nan nyan Jerusalam a tiŋin.

²⁰Njakpanyiɛn jigin, le bi nɔɔ nsan ki chaa, le ki kan bikinkamin koor le nin ki siboi ki si.

²¹Piita kaah tiɛr Yisa kaah won len man nin, le u bei u ke, “Wan wɔɔn, lig, ŋaah won poo bimɔb ki ŋa bikinkam ban ni koora.”

²²Le Yisa bei bi ke, “Ni ŋa Uwonbɔr yadau man.

²³Ibamɔn le n bei ni nan, wan biɛn bei lijɔɔl takpenl nan ke lin fii ki tan lu limɔgil takpenl nan yaan, wee kaa biɛn u sufu ni ke, wee ki ŋa yada ke waah len man nan li tun ke, ni sin li tun ki sei u.

²⁴Ni ma bu le n bei ni ke, ni li jɔɔ yada ni sufu ni ke naah miɛ ki ban niwann nan ni nmɔn ni pii gaa niwann nmɔn na, le ki sin li kan.

²⁵Ni ye ni yin miɛ Uwonbɔr ke, wee ki tiɛr ke uba tun ki bii ni ke, jiɛn per wa, wee ni baa wan be paab nan mu li jiɛn ni toonbir per ni.

²⁶[5] Amaa ni ye naa jiɛn ni tab a bir ki per bi ke, ni baa wan be paab nan mu kaa li jiɛn ni bir ki per ni.”

²⁷Le Yisa nin u bɔɔnɔɔb nmɔn yaan ti nan jirin Jerusalam, le u kɔɔ iwonjiɛn niin n-yaa poolin ki choon gɔnn. Le kumanug a ninkpeeb nin ban wɔɔnn Uwonbɔr a siim nin kitiŋ nmɔn a ninkpeeb dan u ban,

²⁸ki nan baan u ke, “Ŋma seiŋ npɔɔn man wee a jɔɔ tun nan biɛn nan naa? Ŋma seiŋ npɔɔn nmɔn naa?”

²⁹Le u bei bi ke, “Ni che n baan ni nbinbaan nba chinchinn. Ni ye ni li fir ki jiin n binbaan nmɔn ke, n mu li wɔɔn ni maah kan npɔɔn nmɔn nan yaan wee ki jɔɔ tun ni niɛ nan biɛn.

³⁰Jɔnn kaah nan fu bininfob Uwonbɔr a nyunfulin, Uwonbɔr le nan sei u npɔɔn bee uninfosaalaa? Ni beim ni!”

³¹Le bi jir ki tan gbeer tab ki ke, “Ti len ke, Uwonbɔr le sei u npɔɔn nmɔn ke, u li baan ti ke, ke ba ŋa wee taa ŋa u yadaa;

³²ke ti ji li fir bei ke bininfob le nan sei u npɔɔn naa?” (Bi nan san bininfob n le, bi biɛn nan chee ke Jɔnn ye Uwonbɔr a linlenu le nin ibamɔn.)

³³Mambu, le bi jiin Yisa ke, “Taa nyi.” Le u mu bei bi ke, “Tɔ, n mu kaa yin bei ni wan seim npɔɔn man wee n jɔɔ ki tun nan ni.”