Read Konkomba Mag 14 Bible Online

Mag 14 - Konkomba bible

Mag 14

¹Tɔ, iweehn ilee li nan gur nin bin tiɛr yuglagir a chiigin, ke idaa yan wee bi ti jɔɔ ŋma boroboro wan kaa ŋaan nnyɔgin a daai n piin, le kumanug a ninkpeeb nin ban wɔɔnn Uwonbɔr a siimin, ban baah li nɔɔ nsan man ki woon ki choo Yisa ki ku u, le ki bei tab ke,

²“Ni laa che ti choo u kuchiig nan yaan ni, n ba ke ti choo u iyaayoo ke, kuninfogbaluŋin li gaa tijar ti bu.”

³Yisa nan be Betani, uja wan nan ye kikɔŋ wee bi yi u ke Simɔnn nan a niin le, ki ji tijiir. Le upii uba nan kɔɔn ki ŋmag tulaali kan jɔɔ kudaag pɔɔrug nan, bi yi tulaali nmɔn ke naar, le bi nan yi kululog[9] nmɔn ke alabasita. Le upii nmɔn choo kululog nmɔn ki biir ki gbir tulaali nmɔn ki ŋa Yisa a yukper.

⁴Le bininfob ban be niin nin pag nin liŋuul ki ke, “Ba ŋa wee u bii tulaali nmɔn man naa?

⁵Ti bi li fir kɔɔr ki kan ilig ke yin jo libinl a yɔɔr, ki ta ter bilanjiim nan.” Le ki nan ŋulin u bu.

⁶Le Yisa bei bi ke, “Ni jiɛn upii nmɔn na. Ni wan ŋanl le u tun ki seim nan, ke ba ŋa wee ni mugir u man naa?

⁷Bilanjiim le yin gbaa be ni ban le iyoo biɛn, le ni li fir ki ter bi n-yonn man wee ni ban; amaa min kaa yin gbaa be ni ban jigin ni.

⁸Upii nmɔn tun nan wee u li fir tun seim le. Waah gbir tulaali wan ŋa n gbanann bu nan, u ŋaam ngbanann a piim a sili le nmɔn.

⁹Ibamɔn le n bei ni nan, nan yaan biɛn wee bi li mɔɔn n bɔŋann nin kutingbɔŋ biɛn nan yaan, bi li mɔɔn upii nan kaah ŋa nan ki seim nan bu, le ni li ye ntiɛrim ki jiin u bu.”

¹⁰Man le Yisa a bɔɔnɔɔb piig nin bilee a ni u ba, wan wee bi yi u ke Judasi Isikariya nan, jon kumanug a ninkpeeb ban ke un kɔɔr Yisa.

¹¹Le bi pooi nan penn, waah bei bi man Yisa bu-n, le bi siin u limɔsiinl ke bi li yɔ ilig ni bu. Le u ni nan piin ki ban isan yan wee u li ta Yisa ki ŋubin bi nɔɔn.

¹²Chinchinn a daal lan wee bi ti ŋma boroboro wan wee baa ŋaan nnyɔgin, wee ki ti ku npeebum iyaayoo ki ŋa Yuglagir a Tiɛrim a Chiig a jiirin, le Yisa a bɔɔnɔɔbin baan u ke, “A ban ti jo laa wee ki tan ŋa kuchiig nmɔn a jiir a sili ki sei ŋaa?”

¹³Le u tun bi ni bilee ki ke, “Ni li chaa kitiŋ nan yaan man. Ni li kan uja uba wee u tu linyunbool, ni li nɔɔ wa man,

¹⁴ki li chaa iniin yan wee u ta li kɔɔ n-yaan, wee ki bei uniindaan nmɔn ke, ‘Wan wɔɔn ke ti baaŋ ke, bicham a diig kan wee u ma ni u bɔɔnɔɔb yin ji yuglagir a tiɛrim a chiigin be laa?’

¹⁵Le u li wɔɔn ni kudiititɔrug kan yab wee bi pii ŋa ni wan biɛn a sili, wee ni ŋa tijiir nmɔn niin.”

¹⁶Le Yisa a bɔɔnɔɔb bilee nmɔn jon kitiŋ nmɔn yaan, ki sin tan kan ke ni wan biɛn ŋa sili ke waah bi bei bi man ni na. Le bi ŋa kuchiig nmɔn a jiir.

¹⁷Le Yisa nin u bɔɔnɔɔb piig nin bilee nmɔn nan dan kujɔɔg.

¹⁸Baah ka ki ji tijiir n-yonn man nin, le u nan bei bi ke, “Ibamɔn le n bei ni nan, min nin nim kaah ka ki ji tijiir tan nan, ni ni uba li yin kɔɔrim.”

¹⁹Le ni bii bi sufu, le bi baan u uba ba uba ba ke, “A len min lee?”

²⁰Le u jiin ke, “Ni le ye ni piig nin bilee nan a ni uba wan wee min nin u ma lagin ki bɔr kisaŋ kiba ni nan le.

²¹Uninfosaal a Big le sin yin kpo le ke naah sɔb Uwonbɔr a gbɔŋin man nin, amaa tibɔbir li be wan yin kɔɔr u nan bu. Baa nan bi maa u daan gbaa ke, ni bi li sɔ u bu.”

²²Baah nan ji tijiir n-yonn man nin, le Yisa yuur boroboro ki miɛ Uwonbɔr, le ki war war ki sei u bɔɔnɔɔb, ki bei bi ke, “Ni gaa man. N gbanann le yen.”

²³Man le u ji nan yuur kiyiinyɔɔg nin isiloon a daam ki miɛ Uwonbɔr, ki ta sei bi. Le bi biɛn nyun.

²⁴Le u bei bi ke, “N cham le yen, le n cham li kpaar ki wur, bininfob takpem bu, ki wɔɔn ke Uwonbɔr poo tipoor pɔn na.

²⁵Ibamɔn le n bei ni nan, maa ji li nyi ki nyu isiloon a daam nan ni see lidaal man wee n na yin nyu miwanpɔm Uwonbɔr a naamin ni.”

²⁶Le bi nan gaa iwonjiɛn lan, ki nyan ki jon Olif a siigi a jɔɔlin a paab.

²⁷Le Yisa bei bi ke, “Ni biɛn nan na li yiim, ni sɔb Uwonbɔr a gbɔŋin ke, ‘Uwonbɔr na li ku upeekpaarin, le ipee n guun ki yaal.’

²⁸Amaa n nan fii nkumin ke, n li chinn ki liin ni sam ki jo Galilii.”

²⁹Le Piita bei ke, “N tab nan biɛn nan yiiŋ ke, min kaa li yiiŋi.”

³⁰Le Yisa bei u ke, “Ibamɔn le n beiŋ nan, kunyiɛg nan, a li niɛ itaa itaa ke ŋaa nyi mi le ukooja n ni mɔɔ milee.”

³¹Le Piita mann pag nin linunmanl ke, “Hali ni ye min nin fin n lagin ki kpo gbaa ke, maa li nyi ki niɛ ke maa nyiŋi.” Le u tabin mu len man.

³²Le bi jon nan yaan wee bi yi Gesemani nan. Nin yaan nmɔn le Yisa bei u bɔɔnɔɔb ke, “Ni li ka doou wee n jo ki tan miɛ Uwonbɔr.”

³³U nan ta Piita le nin Jemisi, nin Jɔnn ki jon. Le u sufu bii ki be ke u yin kpo le-n;

³⁴le u bei bi ke, “Npoobiin man choom nan li kum. Ni li ka do ki li lig man.”

³⁵Le ki fɔɔr ki jon nintogil wama, ki gbaan le u yutunl tan mar tum, ki miɛ Uwonbɔr, ke ni bi li fir ke, Uwonbɔr n bin che npoobiin man chaan u ban nan n bin jo lagir u bu, ki ji len ke,

³⁶“N baa, n baa, niba li kaa be le ŋaa li fir tun ni. Laa che n nyu kiyiinyɔɔg nan yaan ni; Amaa che a yaa bam le n tun, wee ni laa ye n yaa bami.”

³⁷Le u jirin u bɔɔnɔɔb bita n ban, ki miin bi jiɛn na. Le u baan Piita ke, “Simɔnn, a jiɛn lee? Ŋaa li fir kal guurim wamaa?”

³⁸Le ki bei bi ke, “Ni ligir ki miɛ Uwonbɔr a wee ki laa kɔɔ nton nan yaan ni. Ni naam ma ban ni tun nan ŋan, amaa le ni gbanann kaa pɔɔ.”

³⁹Le ki ji jir u wonmiɛlin ki tan miɛ ke waah bi miɛ man chinchinn ni,

⁴⁰ki ji nan jirin ki miin u bɔɔnɔɔbin jiɛn na, nan bu-n njiɛm le nan jɔɔ bi takpem. Le baa nyi baah li bei u man ni.

⁴¹Waah nan jirin itaa itaa-n, le u baan bi ke, “Ni le la biɛ ni dɔ jiɛn ki fooraa? Ni kpaan man na. N-yonn nmɔn foou. Bi ta Uninfosaal a Big ki ŋubin tibirdam a nɔɔn na.

⁴²Ni fiim wee ti jo. Lig wan kɔɔrimin le chaan nin.”

⁴³Yisa kaah la be pagin, le u bɔɔnɔɔb piig nin bilee-n a ni uba wan wee bi yi u ke Judasi nan ŋmag kuninfogbaluŋ ban wee Uwonbɔr a toontum ninkpeeb nan tun bi, bi ma nan ye kumanug a ninkpeeb nin ban wɔɔnn Uwonbɔr a siim nan nin bininkpeeb, le biba ŋmag takoobi, le biba mu ŋmag ilangul,

⁴⁴le Judasi wan kɔɔr Yisa nmɔn pii wɔɔn bi ke, “Wan wee n sɔɔn ki poor u ke ni li nyi ke u ma yen. Wee ni choo u ki li ŋmag u nbamɔm ki li jɔɔ u chaau.

⁴⁵Judasi kaah nan foon n-yonn man nin, libol nmɔn le u jon Yisa ban ki yin u ke, “Wan wɔɔn,” le ki sɔɔn ki poor u.[10]

⁴⁶Le bininfobin mu choo Yisa ki ŋmag u kenken.

⁴⁷Le u bɔɔnɔɔbin a ni uba nar u takoobi ki gaa kumanug a ninkpelu n-yaa yomu a tul ki par.

⁴⁸Le Yisa baan bi ke, “N ye ban kɔnn bininkpeeb a sanliiru le ni dan nan choom a le ke n ye ufeer le naa?

⁴⁹N nan ti be ni ban le iwonjiɛn niin n-yaan iyoo biɛn le ki wɔɔn bininfob Uwonbɔr a bɔr, le naa ti chorimi, amaa ni kpaa talar le ke Uwonbɔr a gbɔŋ a bɔri tin gbeen.”

⁵⁰Le u bɔɔnɔɔbin biɛn guun ki jiɛn u.

⁵¹Le unaachipɔɔn uba yee likinkenl a binba ki nɔɔ Yisa a bɔɔn. Le bi nan bib u ki choo u kinkenl,

⁵²le u jiɛn likinkenl nmɔn bi nɔɔn, le ki guun nin lijakpalomil.

⁵³Le bi ta Yisa ki jon kumanug a ninkpelu a niin, nan yaan wee kumanug a ninkpeeb, nin kitiŋ nmɔn a ninkpeeb, nin ban wɔɔnn Uwonbɔr a siimin lagin.

⁵⁴Le Piita be Yisa a bɔɔn, nan fɔg hali nin baah tan kɔɔ kumanug a ninkpelu nmɔn a niin. Le Piita jon ki tan kal kpiɛ bi toontum bu, le bi wor nŋmi.

⁵⁵Le kumanug a ninkpeeb nmɔn nin bininkpeeb nmɔn biɛn pɔɔn bi ba ke bin gbir siɛradam a mɔnn, wee ki kan Yisa a bir wee ki ku u, le kaa kan u biri.

⁵⁶Siɛradam takpem nan por tibɔkar le ki tenn u, amaa le bi bɔkar nmɔn kaa nɔɔ nin tabi.

⁵⁷Le bijab biba fii ki sir ki por tibɔkar npaan ni ke,

⁵⁸“Ti gbir u bei ke, u li ber iwonjiɛn niin yan wee bininfob nan maa nan, ki ta iweehn itaa ki ji maa ki, wee nin laa ji ye bininfob li maa ki.”

⁵⁹Nin ni biɛn nan yɔli, bi bɔkar nmɔn mu kaa biɛ nan nɔɔ tabi.

⁶⁰Le kumanug a ninkpelu win nan fii ki baan Yisa ke, “Tibɔr tan wee bijab nan pag ki jiin a paam nan a taai yaa? Ŋaa jɔɔ ti jiim maa?”

⁶¹Le Yisa ŋmin, kaa jiin tiba. Le u ji mann ki baan u ke, “Fin le sin ye Masiya wan ye u ma Uwonbɔr a Bija n naa?”

⁶²Le Yisa jiin ke, “Nn min le yen. Ni na li kan Uninfosaal a Big kaah ka Utindaan Uwonbɔr a nɔɔjiim paam, ki ji na li kan u ki miin u be titalangbann ni le ki jiirin!”

⁶³Le kumanug a ninkpelu nmɔn tɔɔl choo u daala ki jiɛ, le ki ke, “Taa ji ban siɛra dami!

⁶⁴Min tɔɔl kan waah sug Uwonbɔr man na. Ni tiɛr nii?” Le bi biɛn chee ke u biiu, u kpaan nin nkum le.

⁶⁵Le bi ni biba siin timɔsann jaar u bu; le ki piin u num paam le ki pebir u ntapam ki ji baan u ke, “Biɛ njee ŋma pebiŋ ŋaa.” Le ban guu win mu boo u.

⁶⁶Piita la nan be nloob le ki wor nŋmi, le kumanug a ninkpelu a niin a sapɔɔn toontunn uba nan kan u,

⁶⁷ki lig u chiir, ki nan bei u ke, “A mu nan nɔɔ Nazarif a ninfou Yisa nmɔn le.”

⁶⁸Le Piita niɛ ke, “Min kaa nyi wi, min kaa nyi tibɔr tan wee a pag nan a taai,” le ki fii nyan. Libol nmɔn le ukooja mɔɔ.

⁶⁹Le usapɔɔn nin ji kan u niin ki mann bei bininfob ban si niin nin ke, “Uja nan mu ye u bɔɔnɔɔbin a ni uba le.”

⁷⁰Le Piita ji mann niɛ. Le ni kpiɛ wama le ban be niin nmɔn mann baan Piita ke, “A sin ye bininfob nan a ni uba le, nan bu-n a ye Galilii a ninfou le.”

⁷¹Le Piita poo ke, “Ni ye n por tibɔkar ke, Uwonbɔr n dar n tula, min kaa nyi naah pag uja wan nan a bɔri.”

⁷²Libol nmɔn le ukooja mɔɔ kpiɛ itaa ilee; le Piita nin tiɛr Yisa kaah bi bei u man ni ke, “A li len ke ŋaa nyi mi itaa itaa le ukooja n nin mɔɔ.” Iyaayoo nmɔn le Piita nin piin ti mɔɔr.