Read Konkomba Mag 2 Bible Online

Mag 2 - Konkomba bible

Mag 2

¹Iweehn ilee kaah nan jon a bɔɔn, le Yisa ji nan jir Kapeniɛm; le bi gbir ke u jir iniin na.

²Le bininfob takpem lagin, hali ke npaan wama kaa ji nan be iniin nmɔn yaan ni, wee uninfo n fir ki nɔɔ foo ntimansanmɔnn ni; le u mɔɔn Uwonbɔr a bɔr ki tenn bi.

³Bininfob biba le nan ta tigbanann kpiin daan uba ki dan Yisa ban; bi nan ye bininfob bina le.

⁴Baa nan fir ki foon u ban ni, bininfobin kaah nan yab nbu, le bi nan ga logir kudiigin a yul bu, le ki ta tigbanann kpiin daan nin pɔbin likinkenlin ki jiin tan bil Yisa a nintogil.

⁵Yisa kaah nan kan baah ŋa u yada man nin, le u nan bei tigbanann kpiindaan n ke, “N big, n jiɛn a bir ki periŋa.”

⁶Iyaayoo nmɔn ban nan wɔɔn Uwonbɔr a siimin a ni bi ba nan ka niin le ki tug bi sufu ni ke,

⁷“Ba ŋaa wee uja nan pag man naa? U sugir Uwonbɔr le. Ŋma li fir ki jiɛn uninfo a bir ki per waa, kaa ye Uwonbɔr a binbaa?”

⁸Lipotiɛl nan kaah nan be bi sufu ni n-yonn man nin, libol nmɔn Yisa nan nyi u sufu ni baah tug man, le ki baan bi ke, “Ba ŋa wee ni tiɛr man naa?

⁹Maah bei ubaarin ke, ‘N jiɛn u bir ki pir nbu’ bee maah li bei u ke, ‘Fiim ki yuur a wan dɔɔn wan ki li chaa nnaa’, tibɔr a kerim milee nan ti la ba pɔɔ?

¹⁰Amaa ni li nyi ke Uninfosaal a Big jɔɔ npɔɔn kutingbɔŋ nan yaan, ki li fir jiɛn bininfob a bir ki per bi.” Le ki nan gbiɛ lig wan a gbanann kpen ni ki bei u ke,

¹¹“N beiŋ le fiim ki yuur a wan dɔɔn waŋ ki li chaa kun a niin na.”

¹²Libol nmɔn le u fii ki yuur u wan dɔɔn waŋ ki nyan bi biɛn nan a numbimin. Le ni gar bi takpem; le bi nan pag ki don Uwonbɔr a yinl ki ke “Taa la nyi kan ligaril nmɔn a kpiɛgi.”

¹³Ni bɔɔn bu le Yisa ji nan jir Galilii a mɔgil n-yaa gbaam, le bininfob takpem nan lagin u ban, le u wɔɔn bi Uwonbɔr a bɔr.

¹⁴Waah nan choon ki chaa-n, le ki tan kan uja uba le u yinl ye Liifai, wan nan ye Alifiu a bigin, ki miin u be u toon yin le, lampogaab a nanbonn. Le Yisa bei u ke, “Fii ki li nɔɔm ni.” Le u fii ki nɔɔ u.

¹⁵Yisa kaah nan be ji kujɔɔg a jiir Liifai a niin nin, le bilanpogaab nin tibirdam lagin ki ka nin Yisa a bɔɔnɔɔb ki ji tijiir. Bi nan yab le takpem ki nɔɔ u.

¹⁶Le ban wɔɔnn Uwonbɔr a siim, ki nan ye Farasii yaabin, bi nan kan Yisa kaah lagin ki ka ji tijiir nin tibirdam nin bilanpogaab; le bi baan u bɔɔnɔɔb n ke, “Ba ŋa wee ni lagin ki ka ji nin bininfob nan a bosuu?”

¹⁷Yisa kaah gbir man diɛ le ki bei bi ke, “Ban pɔɔ kaa ban utebiri, see ban bu-n. Maa dan ke n nan yin bibuchimi, amaa n dan ke n nan yin tibirdam le.”

¹⁸Iyaayoo nmɔn le Jɔnn Wan nan Fu Bininfob Uwonbɔr a Nyunful nan a bɔɔnɔɔb nin Farasii yaab nan lol bimɔb; le bininfob biba dan ki nan baan Yisa ke, “Jɔnn a bɔɔnɔɔb nin Farasii yaab a bɔɔnɔɔb lolig imɔɔŋ le, ba ŋa wee a yaa bɔɔnɔɔbin ma kaa lolig bi mɔɔŋi yaa?”

¹⁹Le Yisa baan bi ke, “Lipiichanil be ke, bicham li fir ki lol bimɔb iyoo yan wee upiidaan nan la be bi ban nan naa? Baa li firi, lipiichanil daan nan kaah la be bi ban nan, baa li fir ki lol bimɔbi.

²⁰Amaa iyoo chaan le bi na li nyan lipiichanil daan nin bi ban, iyaayoo le bi ni li lol imɔɔŋ.

²¹“Uba kaa li chee ki taa litan pɔnl ki legin litan kpegili, ni ye u ŋa man ke litan pɔnlin yin chiɛ liwan kpegilin le, le libonl nmɔn n mann ki kpiɛ.

²²Man mu le uba kaa li fir ta ndapɔm ki ŋuun libookpegilin ni, ni ye u ŋa man wee ndapɔmin nan mɔɔ ke, mi yin pɔɔ liboolin le, le ndaam nmɔn n wur yɔli, le liboolin mu n bii. Mambu, bi jɔɔ ndapɔm ki ŋu liboopɔnlin le.”

²³Juu yaab a kpakɔɔl liba daal, le Yisa nin u bɔɔnɔɔb nɔɔ bukpaab biba ni. Baah nan nɔɔ ki chaa nmɔn le u bɔɔnɔɔb n genn iyoo ki pur ŋma iwankal.

²⁴Le Farasii yaab n baan u ke, “Ba ŋa wee bi tun nan wee ti kpakɔɔl daal kaa chee ke ti li tun naa?”

²⁵Le u bei bi ke, “Naa la nyi ki karin Uwonbɔr a gbɔŋin Defid kaah nan tun man n-yonn man wee nkom nan choo uma nin uninfob wee baa nan jɔɔ tijiirin naa?

²⁶Abiata wan nan ye kumanug a yudaau a yonn, wee Defid nan kɔɔ Uwonbɔr a niin ki tan yuur boroboro wan wee bi ta sei Uwonbɔr nan ki ŋman le ki ŋa sei u ninfob le bi mu ŋman. Nsiim mu kaa nan chee ke uba n ŋman boroboro nmɔn ni see Uwonbɔr a minmanib a binba.”

²⁷Le Yisa nan mann ki bei bi ke, “Uninfosaal a terim bu le Uwonbɔr siin likpakɔɔl daal nmɔn, amaa naa ye likpakɔɔl daal bu le u nan naan uninfosaali.

²⁸Ni ma bu, Uninfosaal a Big le ye likpakɔɔl daal nmɔn a yudaau.”