Read Konkomba Mag 4 Bible Online

Mag 4 - Konkomba bible

Mag 4

¹Yisa ji nan jir limɔgil n-yaa gbaam, ki tan be wɔɔn bininfob Uwonbɔr a bɔr. Le kuninfogbaluŋ nan lagin u ban, waah nan kan ki miin bininfob n yabin, le u kɔɔ ki kal kuŋaluŋ a poolin, ki jiir nnyumin, le bininfobin nan paar si limɔgil n-yaa gbaam.

²Le u nan ga bi libɔŋal ki wɔɔn bi tibɔr takpem.

³U nan bei bi ke, “Uja uba le nan jon u kpaabin un tan yaal ndibim,

⁴waah nan be yaal nan, le u wanbooli iba nan lu nsanpoolin, le nnɔɔm pii i biɛn ki jin.

⁵Le iba mu ji lu kutintiɛgin nan yaan wee titann kaa yabin. Titann kaah kaa nan yabin, le i nan pan ki yabig weem,

⁶amaa nween kaah nan fa i wama-n, le i nan piɛg. Yaah kaa nan fir jiin inyaan nin bu, i biɛn nan kpo le.

⁷Le iba mu nan lu ikunkon ni, ki nan yegin pan ki yabig nin ikunkon nin. Le ikunkon nin ŋuuri ki ku le yaa fir naan ni.

⁸Le iba mu lu ntanŋam a bol, le iba naan nbim pita pita, le iba mu naan piloob piloob, le iba mu naan kokobig.”

⁹Yisa kaah nan ga bi libɔŋal nan ki diɛ n-yonn man nin, le u bei bi ke, “Wan jɔɔ litul ke un gbirim.”

¹⁰Ni bɔɔn bu bininfob biba nan be Yisa ban, bi ma nin u bɔɔnɔɔb piig nin bilee-n nan dan Yisa ban, n-yonn man wee u nan be u binba-n, ki nan baan u libɔŋal n-yaa taai.

¹¹Le u bei bi ke, “Nim bu ke Uwonbɔr pii chinn ki kpiir ki wɔɔn ni U naam a bɔwoon kaar nna, bininfob ban kaa be U naamin ni le u gaar bi ibɔŋal.

¹²‘Wee bi le li gbaa lig amaa le kaa yin kan ni, ki ji gbaa gbir kaa sin yin biɛ ni taai yi; ni ye bi biɛ ni taai ke nba ke bi li kpenn bi binbem wee Un jiɛn bi toonbir ki per bi.’”

¹³Le Yisa nan baan bi ke, “Naa biɛ libɔŋal nan a taai yaa? Ke ni yin ŋa niin ki biɛ ibɔŋal yan gurin a taai yaa?

¹⁴Wan nan yaal iwanboolin le ye wan pag Uwonbɔr a bɔr,

¹⁵bininfob bi ba nann iwanbool yan lu nsanpoolin nin le, ni ye bi gbir Uwonbɔr a bɔr ke, Sintani kɔɔ bi ni le ki nyan ti bi sufu ni weem.

¹⁶Bininfob biba mu le ye iwanbool yan nan lu kutintiɛgin nin, bi gbir le ki ga tibɔr nmɔn weem nin npopeen,

¹⁷amaa le imɔleen nin kaa yin fir ki jiin inyaan bi sufu ni nbamɔmi, ni ma bu baa ŋmag ti yuur iyoo yan wee bininfob ŋa bi fala, bee limugil nan dan tibɔr nmɔn bu, le bin ta gab weem.

¹⁸Le bininfob biba mu nann iwanbool yan nan lu ikunkon nin le, bi gbir tibɔrin ke,

¹⁹le dulinya nan a bɔr nin njɔɔm a bam nin tiwann ban kaar a booli a booli n kɔɔ ki nyagin tibɔr nbu bi sufu ni, ki ku ti le taa yin fir ki naan ni.

²⁰Amaa bininfob biba mu be le ke iwanbool yan nan lu ntanŋam a bol nan le. Bi gbir tibɔrin ke bi gaan ti le, le ti naan, pita pita, piloob piloob, nin kokobig.”

²¹Le u ji baan bi ke, “Ŋma la nyi ki nyɔɔ fila wee ki ta kiyiikpoŋ ki chigin ki bu, bee ki ta ki woon gadu a lɔŋin naa? Aai, see ke u ta ki tɔɔn niwann nan kper a paab.

²²Tibɔr tan biɛn woo nan see ke ti nan nyan npaan ni, le tan mu buu mu na li kpiir.

²³Wan jɔɔ litul ki yin gbir ke un gbirim.”

²⁴Le ki ji bei bi ke, “Ni mann ki pel naah gbir tibɔr tan nan nbamɔma. Naah magir man ki tenn nin, man mu le bi na yin mag ki jiin ni, ke nin jo man.

²⁵Wan jɔɔ-n le bi yin mann kpiɛ u takpem, wan mu kaa jɔɔ ke, u li lann wama nan wee u jɔɔ-n.”

²⁶Le Yisa ji nan len ke, Uwonbɔr a naamin nann uninfo kaah ti ŋa ke un tan bu tibur u kpaabin nin le,

²⁷wee ki kɔɔ jiɛn kunyiɛg, ki nan fii njakpanyiɛn, ki miin iwanboolin biɛn pan ki yabig wee waa nyi yaah ŋa man ki pan ki yabig man ni.

²⁸Kitiŋin li ti che iwanboolin pa ki yabig ki ŋa nbim. Linyagil li ti chinn ki nya, ni bɔɔn bu le li yul nni ŋɔɔrin, le ki ni nan ŋa nbim.

²⁹Idi nmɔn nan beer n-yonn man ke, le ukpaar nni piin u dii nmɔn a chiɛm nin u dichiɛjug, nan bu-n lidichiɛl fo le nmɔn.”

³⁰Le Yisa ji nan baan bi ke, “Ti lee ni yin ta Uwonbɔr a naam nan ki bigin baa? Ti yin gaa bininfob libɔŋal li la baa wee ni won bininfob a num paam maa?

³¹Mi nann nnyiɛnbim man wee uninfo ti ŋa ke un ta bu u kpaabin nin le, maa yab foo kutingbɔŋ nan yaan a wanbooli biɛn ni,

³²le min nan pan ki yabig takpem, ki jɔɔ ibon takpen; le nnɔɔm nin tiɛ bitɛr ki bon bu.”

³³Yisa nan gaa ibɔŋal pam nin Uwonbɔr a bɔr npaam. U nan gaa ibɔŋal ki kpaan bi baah li ŋa man ki biɛ ni taai.

³⁴Waa nan nyi ki pag tibɔr wee taa ye libɔŋali. Amaa u nan ti pag ki wɔɔn u bɔɔnɔɔbin le ibɔŋal nmɔn biɛn a taai n-yonn man wee bi ti nan be bi binba ke.

³⁵Lidaal nmɔn a jɔɔg le Yisa bei u bɔɔnɔɔb ke, “Ni che ti lɔŋ limɔgil nan a dool.”

³⁶N-yonn nmɔn le bi nan jiɛn kuninfogbaluŋin, le bi nan ta Yisa nin kuŋaluŋ kan yaan wee u nan be-n ki chaa. Tiŋalin tiba mu na be niin.

³⁷Baah nan be kuŋaluŋin ki chaan le bi nan miin litafaapɔɔril le daar, le kunyungbɔŋ piin ki fii ki ban mi li kɔɔ kuŋaluŋin a poolin, ke ki nan ban ki-n mii.

³⁸Iyaayoo nmɔn Yisa nan dɔ kuŋaluŋ nmɔn a bɔɔn ki kul pira ki jiɛn. Le u bɔɔnɔɔbin nan faa u ligir ki bei u ke, “Wan wɔɔn, nnyum kaah yin jin ti-n, ŋaa yin gar ti buu?”

³⁹Le u fii sir le ki tiɛn ntafaam nbu, ki sin bei limɔgilin mu ke, “Ŋmin soon na.” Le ntafaamin nan jiɛn, le kunyungbɔŋin mu ŋmin soon.

⁴⁰Le u nan baan u bɔɔnɔɔb nmɔn ke, “Ba ŋa wee ni san bijawaamaa? Naa la ŋa Uwonbɔr yadaa?”

⁴¹Le bijawaam mann choo bi takpem. Le bi nin baan tab ke, “Ninfo boliba yen naa? Wee ntafaam nin kunyungbɔŋ biɛn nan chee u mɔbaa?”